Af gervikúnstum pakkamanna í Valhallar­liðinu. Málflutningur Guðlaugs Þórs er hruninn

"Einfaldasta skýringin" hans Davíðs Þor­láks­sonar* á þriðja orku­pakk­anum er því miður ósönn. Orku­pakk­arnir hafa ekki fært orku­mark­aðnum nein "heillaspor fyrir alla lands­menn", heldur fleiri milliliði og í mesta lagi um 300 kr mun á verði "sam­keppnis"-aðila raforku á mánaðar­legum rafmagns­reikn­ingi heimila. En þar sem kaupa þurfti raforku til húsahitunar, hækkaði fyrsti orkupakkinn verðið um 100%!

"Neytendavernd", sem einu rökin fyrir þriðja orkupakkanum, er því falsrök og yfirdrep.**

Frjálshyggjumaður sem Davíð ætti að hafa orðið var við ásóknina í að einka­væða orku­lind­irnar, ásókn sem mun knýja á um sundur­hlutun Lands­virkjunar og það fyrir tilstilli ákvæða þessa 3. orku­pakka. Ennfremur verður svo einokunar­vald eins stýri­aðila, "lands­reglarans", óháðs stjórn­völdum hér og Alþingi, en undir stýri­valdi ACER, annað en fagnaðar­efni fyrir frjáls­huga Íslendinga. Og Davíð sonur Þorláks fylgist ekki með ef hann hefur ekki séð nýjustu sannanir fyrir því að frakkur málflutn­ingur Guðlaugs Þórs í málinu er hruninn.

* Í Fréttablaðsgrein Valhallar­vinarins Davíðs Þorlákssonar þennan fimmtudags­morgun, einnig hér á Vísi.is: https://www.visir.is/g/2019190419984/rakhnifur-ockhams, og einnig þar birtist þessi athugasemd undirritaðs.

** Þetta eru ennfremur hlálega aum og léleg rök fyrir jafn-gríðarlega viðamiklu tilskipana­verki sem hér er reynt að innleiða með þriðja orku­pakkanum. "Much ado about nothing" -- mikið aðhafzt fyrir ekkert, mætti segja um slík gervirök, en flestir meðvitaðir um, að hér leynist fiskur undir steini: Menn færu aldrei út í að setja Alþingi í uppnám í margar vikur og taka jafnvel áhættu með ríkisstjórn­ar­samstarf og eyða í það ómældum fjárfúlgum, ef þetta smáræði, gervi-neyt­enda­verndin, væri ástæða þessa viðamikla löggjafarstarfs. 

En um aðrar "kúnstir að baki orkupakka" geta menn lesið í forsíðufrétt í Mbl. í dag af ummælum ESB-sinnans Þorsteins Pálssonar, fyrrv. forsætisráðherra, og í leiðara sama Morgunblaðs, sem landsmenn fá almennt frítt í fjöldreifingu í dag.

Í sama Morgunblaði er mjög góð grein eftir einn af samherjunum hér í Samtökum um rannsóknir á Evrópusambandinu og tengslum þess við Ísland, þ.e. Ragnhildi Kolka lífeindafræðing, og nefnist grein hennar (bls. 42): Af hverju ég? Greinin fæst væntanlega birt hér í heild, þótt síðar verði. En það er ekki hægt að sleppa lesandanum við því að sjá þennan öfluga texta í grein Ragnhildar (hér má hafa í huga, að hún hefur fylgt Sjálfstæðisflokknum):

"... Þrátt fyr­ir fjálg­leg­ar yf­ir­lýs­ing­ar um und­anþágur og fyr­ir­vara við samn­ing­inn, frá flokks­for­ustu Sjálf­stæðis­flokks­ins, þá ein­fald­lega trúi ég ekki að fyr­ir­var­arn­ir haldi. Orkupakki 3 er hluti af lang­tíma áætl­un um orku­mál Evr­ópu­sam­bands­ins. All­ur pakk­inn tek­ur mið af orkuþörf ESB – ekki Íslands. Og þó svo að for­svars­menn þess­ara mála hér á landi skeyti ætíð við varnagl­an­um „að ACER-stofn­un­in fái ekk­ert vald hér á meðan eng­inn sæ­streng­ur teng­ir okk­ur við meg­in­landið“ þá vit­um við að sú teng­ing er rétt hand­an við hornið. Leyf­is­beiðnirn­ar bíða í bun­um. Án þess­ar­ar teng­ing­ar er pakk­inn okk­ur óviðkom­andi, því eins og staðan er í dag þá falla auð­lind­ir þjóðar­inn­ar utan EES-samn­ings­ins. Ef, hins veg­ar, við sam­þykkj­um pakk­ann jafn­gild­ir það af­sali valds yfir orku­auðlind­un­um, því um leið og sæ­streng­ur er lagður (og hann verður lagður), þá höf­um við glatað tæki­fær­inu til að gera okk­ar eig­in samn­inga á eig­in for­send­um. Þá hef­ur valdið yfir auðlind­inni, hvort sem er lög­gjaf­ar-, rík­is eða dómsvald, verið flutt til ESB og við sitj­um eft­ir sem hrávöru­fram­leiðandi, svo geðslegt sem það nú er.

Eng­in rök, sem haldið geta vatni, liggja fyr­ir um nauðsyn þess að samþykkja þessi mál sem nú eru til umræðu á Alþingi. Lof­orð um stór­lega bætt­an hag neyt­enda byggj­ast á arðgreiðslum í sjóði sem ráðamenn geta ausið úr að geðþótta – og kall­ast sjóðasukk. Neyt­and­inn, í það minnsta hinn ís­lenski, borg­ar bara hærra verð fyr­ir sitt raf­magn sem jafn­vel fæst þá skammtað. Lof­orð um þriggja fasa raf­magn á hvert byggt ból og „orku­ör­yggi“ hljóm­ar eins og páska­egg til for­stjóra Góu. Ríkt land sem býr yfir gull­námu eins og Lands­virkj­un þarf ekki á slíkri ölm­usu að halda. Þeir sem vilja virkja hverja sprænu þurfa hins veg­ar á hinu yfirþjóðlega valdi að halda til að fá fram­kvæmda­leyf­in sem fást með því að skrúbba græna lit­inn af um­hverf­is­sinn­um. All­ir sem á annað borð hafa fylgst með sam­skipt­um þjóða við ESB gera sér grein fyr­ir að fyr­ir­var­ar halda ekki. Við stönd­um núna frammi fyr­ir glötuðum fyr­ir­vör­um varðandi land­búnaðar­mál­in rétt eins og bresku sjó­menn­irn­ir sem trúðu á fyr­ir­vara varðandi fisk­veiðirétt sinn. Og Brex­it-deil­an, sem nú tröllríður heims­frétt­un­um, snýr að stærst­um hluta um van­trú á fyr­ir­vör­um. (Leturbr.jvj)

Þá er í Morgunblaðinu í dag afar mikilsvert framlag Hjörleifs Guttorms­sonar, náttúrufræðings og fyrrv. ráðherra, til þessara mála, þar sem hann með sínum rökum sýnir m.a. fram á, að "fyrirvarar" þeir og "undanþágur", sem utanríkis­ráðherrann þóttist geta flaggað með þings­ályktunar­tillögu sinni, standast engan veginn og munu ekki halda gegn regluverki og æðstu völdum Evrópu­sambandsins á þessu sviði, sem við værum þarna að setja okkur undir. Megi þeim aldrei haldast á völdum hér, sem þjóna erlendu yfirvaldi yfir okkar auðlindum, yfir starfsaðstöðu fyrirtækja okkar og kjaramálum íslenzkrar alþýðu.

Grein Hjörleifs nefnist Svo bregðast krosstré ... Opið bréf til Katrínar Jakobsdóttur forsætisráðherra. Megi sem flestir lesa þessar frábæru greinar í Morgunblaðinu í dag.

Jón Valur Jensson.

Kúnstir að baki orkupakka

Mikill völlur á Evrópusambandinu nánast ofan í Stjórnarráði Íslands

Sendinefnd? Þarf lítil sendinefnd mikið rými? Hvaða erindi á sendiherra ESB hér í landi, sem er ekki í ESB, annað en að hóta (eins og hann gerir nú í blaðaviðtali) og blekkja?
Liggur kannski fiskur undir steini?

Þannig ritar Snjáfríður M. Árnadóttir Egilson á Facebók sinni.

Sendinefnd ESB á Íslandi er greinilega komin til að vera, rétt eins og í meðlimaríkjunum. Sendiherrar ESB, a.m.k. tveir eða þrír þeirra, hafa þegar brotið Vínarsáttmálann um skyldur sendiráða.

Og nú breiða þeir úr sér rétt við Stjórnarráð Íslands, á Kalkofnsvegi 2.

Jón Valur Jensson.

PS. Paþetískt er að hlusta á verjendur þriðja orkupakkans í yfirstandandi umræðum á Alþingi, sem sjónvarpað er á sjónvarpsrás þingsins.

ESB á Íslandi flytur

Theresa May á síðustu metrunum eftir vinstra feilsporið

Ýmsir hafa dáðst að þrautseigju hennar, að gefast aldrei upp við allar mögulegar útfærslur á því að slíta sig frá ESB að meira eða minna leyti, en nú ofbýður þing­mönnum Íhalds­flokksins og hafa lesið henni pistilinn, sem hún kaus að þegja við, end­an­lega skák og mát. 

Hin áhrifa­mikla 1922-nefnd óbreyttra þing­manna flokks­ins fundaði með May á skrif­stofu hennar í Down­ingstræti 10 og tjáði henni "að bæði flokks­menn og aðrir stuðnings­menn flokks­ins hefðu snú­ist gegn henni. Heim­ild­armaður Daily Telegraph seg­ir May hafa hlustað á þing­menn­ina lýsa því, hvernig hún væri að stórskaða Íhalds­flokk­inn, án þess að segja neitt. Hún hafi síðan neitað að ræða um framtíð sína. Aðstæðurn­ar eru sagðar minna á síðustu dag­ana áður en Marga­ret Thatcher, þáver­andi leiðtogi flokks­ins, sagði af sér fyr­ir tæp­um 30 árum." (Mbl.is).

Út af sakramentinu fór hún ekki aðeins með því að makka með Jeremy Corbyn, leiðtoga Verkamannaflokksins, heldur með því að taka í mál hið ómögulega: að Bret­land yrði "áfram í tolla­banda­lagi Evr­ópu­sam­bands­ins eða í tolla­banda­lagi með sam­band­inu. Þar með gæti landið ekki samið um sjálf­stæða viðskipta­samn­inga við önn­ur ríki, en það er eitt­hvað sem stuðnings­menn út­göng­unn­ar hafa litið á sem einn stærsta kost­inn við að yf­ir­gefa Evr­ópu­sam­bandið." (Mbl.is)

En þarna var Theresa að snúa gersamlega við blaðinu frá fyrri afstöðu sinni, "hafði áður ít­rekað þver­tekið fyr­ir að Bret­land yrði áfram inn­an tolla­banda­lags Evr­ópu­sam­bands­ins." En for­ystu­menn ESB hafa verið að þrýsta á May og Cor­byn að ná sam­an um að Bret­ar verði áfram inn­an tolla­banda­lags­ins. Nú hrynur sú spilaborg og frúin á útleið, eftir því sem bezt verður séð.

JVJ.

Telja Theresu May vera vandamálið

Sameinast verður gegn þriðja orkupakkanum sem brýtur gegn stjórnarskránni

Frábært var hjá Ögmundi Jón­assyni og samherjum hans þennan laugardag að funda í Safna­húsinu gegn orku­pakk­anum (sjá frétt). Ekki er lang­sótt hjá honum að tala um, að hér séu ýmsir syngj­andi vöggu­vísur, til þess ætlaðar "að svæfa fólk þar til allt er um garð gengið." Þetta eru vögguvísur eins og sú skreytni Guðlaugs Þórs, að eitt símtal hans og eins kommissara í Brussel dugi til að veita Íslandi undanþágu frá orkupakkanum. Það sanna er, að til þess þyrfti samþykki hins volduga ráðherra­ráðs ESB í Brussel, ESB-þingsins fjölmenna í Strassborg og Brussel og framkvæmda­stjórnar ESB (með kommiss­örunum 28!). Eins fara fleiri Sjálfstæð­isflokks-málpípur með blekkjandi vöggu­vísur um þetta mál, ekki sízt Þórdís Kolbrún iðnaðar­ráðherra, varaformaður flokksins!

 

Verði 3.orkupakkinn stjórnar­skrár-andstæði og þjóðhagslega skaðvænlegi samþykktur af landráða­mönnum á Alþingi, liggur beint við að spyrja, hvort það sé ekki herútboð til þjóðarinnar að hefja markvissa baráttu fyrir nýjum kosningum og uppsögn EES-samningsins.

 

Svik ráðherra Sjálfstæðis­flokksins við landsfund sinn eru greypileg, en unnt að bæta og refsa fyrir þau með því að svipta þá embættum sínum og titlum í flokknum. Formaður flokksins sveik líka landsfund og þjóðina í Icesave-málinu. Það er komið meira en nóg af svo illu.

 

Jón Valur Jensson.

Hafnar þriðja orkupakkanum

Tæp­lega 60% Íslend­inga and­víg inn­flutn­ingi ESB-hrámetis, aðeins rúml. 25% fylgjandi!

Ætla ESB-þjónarnir að ná þessu?

Þetta varðar hrá­ egg, hrátt ófrosið kjöt og óger­il­sneyddar mjólk­ur­vör­ur. "Rúm­lega helm­ing­ur Íslend­inga er hlynnt­ur því að málið verði sett í þjóðar­at­kvæðagreiðslu, verði frum­varp þessa efn­is samþykkt á Alþingi" (Mbl.is segir þarna frá Gallup-könnun). 15,2% segj­ast hvorki hlynnt né and­víg inn­flutn­ingn­um.

Það stóð aldrei til, þegar EES-samn­ingurinn var samþykktur 1993, að landbúnaðar- og sjávar­útvegsmál féllu undir hann. En nú er Brussel-valdið komið á fullt í allt annarri stefnu gagnvart okkur og fylgir því eftir með þvílíkri áreitni, að kalla má áþján fyrir Alþingi og þjóðina.

Hinn ágæti Hörður Kristjánsson, ritstjóri Bændablaðsins, ritaði þar ritstjórnargrein, Að standa í lappirnar, 15. þ.m. og sagði m.a.:

Það hefur verið stöðugur næðingur um íslenskan landbúnað um árabil og ekki síst af mannavöldum. Nú stendur yfir enn ein atlagan sem snýst um að afnema lagalegan rétt Íslendinga til að halda uppi vörnum gegn innflutningi búfjársjúkdóma og ofursýkla. Allt á þetta svo rætur í aðild Íslands að við­skipta­samningi EES.

 

Því hefur verið haldið fram fullum fetum síðan mjög umdeildur EES-samn­ingur var samþykktur á Alþingi 12. janúar 1993 og tók gildi 1. janúar 1994, að þar væri um hreinræktaðan viðskiptasamning að ræða. Hann snerist nær eingöngu um gagnkvæmt tollfrelsi milli aðildarríkja samningsins. Í samnings­aðildinni fælist ekkert valdaframsal. Enn reyna menn svo að halda því fram að afnám íslenskra laga og reglugerða að kröfu Evrópu­sambandsins sem ætlað er að koma í veg fyrir innflutning búfjár­sjúkdóma sé ekki framsal á völdum Alþingis til að setja slík lög. – Hvað er það þá? 

 

Og fyrir rúmum mánuði ritaði Hörður í Bændablaðið:

Hér hefur hver reglugerðin af annarri frá ESB verið stimpluð góð og gild og oftast athuga­semda­laust. Virðist þá gilda einu hvort slík reglugerðar­innleiðing eigi yfir höfuð nokkurn skapaðan hlut við íslenskan veruleika. Svo yppta menn bara öxlum ef einhverjum dettur sá dónaskapur í hug að gagnrýna flumbru­ganginn.

Til að réttlæta ófögn­uðinn er gjarnan settur fram sá frasi að þetta sé allt gert í þágu íslenskra neytenda. Þannig er málatilbúnaðurinn t.d. í kringum innleiðingu á inn­flutn­ingi ferskra land­búnaðar­afurða. Ferskt skal það vera og alveg tryggt að ekki sé þá heldur hróflað við glænýjum og ferskum evrópskum lyfja­ónæmum ofurbakt­eríum. Það eru sem sé sérstakir hagsmunir íslenskra neytenda að þeir fái að sitja við sama borð og þeir evrópsku þegar kemur að úthlutun sýkinga sem lækna­vísindin hafa ekki lengur nein  úrræði til að ráða við. Við skulum fyrir alla muni ekki trufla slíkt ferli ...

En íslenzkir neytendur hafna því einmitt, að þetta sé gert í þágu þeirra. Svo mikið er ljóst af hinni nýju skoðanakönnun.

Gallup ætti að kanna hug manna til þriðja orkupakkans! En það er enginn áhugi á áframhaldandi ágangi Evrópusambandsins með lymskulegar og uppáþrengjandi lagagerðir sínar og tilætlanir til okkar Íslendinga að lúta þeirra forystu og fyrirskipunum, m.a. um okkar rafmagnsmál, þar sem afleiðingin yrði vís með að leiða til niðurbrots vissra atvinnugreina, m.a. í landbúnaði, sér í lagi hjá garðyrkjubændum.

Jón Valur Jensson.

Andvíg innflutningi á hráum matvælum

Evrusvæðið hættulega berskjaldað gagnvart efnahagskreppum

Þetta er nú mat Alþjóðagjald­eyr­is­sjóðsins og sagt komið til af pólit­ískum mistökum sem gerð hafa verið í tengsl­um við evru­svæðið.

 Fram­kvæmda­stjóri AGS, Christ­ine Lag­ar­de, sagði á fimmtu­dag­inn að bank­ar á evru­svæðinu stæðu ekki nógu styrk­um fót­um kæmi til frek­ari efna­hagserfiðleika.

Lausn­ina sagði Lag­ar­de, sem er fyrr­ver­andi fjár­málaráðherra Frakk­lands, auk­inn samruna inn­an Evr­ópu­sam­bands­ins og meðal ann­ars með einni sam­eig­in­legri inni­stæðutrygg­ingu. (Mbl.is)

Það er ekkert nýtt, að krísur og áföll í Evrópusambandinu þyki þar jafnóðum vera tilefni til enn meiri samrunaþróunar -- handhæg réttlæting fyrir því að stórríkið fái enn og aftur að belgja sig enn meira út, með meiri valdheimildum o.s.frv., en þá um leið með enn meira í húfi fyrir öll evrusvæðis-ríkin, skyldi þetta mikla hrófatildur verða fyrir nýjum áföllum, sem ekki voru fyrirséð eða gert ráð fyrir í skólabókadæmum tilraunasmiðanna í Brussel og í Evrópubankanum.

Og þetta er það sem íslenzkir ESB-sinnar hafa verið að mæla með eins og trúarjátningu, sem sjálfu akkeri stöðugleikans!

Jón Valur Jensson.

Evrusvæðið hættulega berskjaldað

Innleiðing Orkupakka #3 á fölskum for­sendum? - eftir Bjarna Jónsson verkfræðing

Innleiðingin verður á öllum orku­pakkanum gagnvart ESB:

Því fer víðs fjarri, að ein sam­eig­in­leg frétta­til­kynn­ing ís­lenzks ráð­herra og eins fram­kvæmda­stjóra ESB hafi nokkra laga­lega skuld­bind­ingu í för með sér fyrir Evr­ópu­sam­band­ið (ESB).
Að undan­skilja gerð nr 713/2009 við inn­leið­ingu Al­þing­is á ESB-Orku­bálki #3 hefur þess vegna ekkert laga­legt gildi gagnvart ESB.
Þetta þýðir, að ESB-gerð, sem brýtur gegn Stjórnarskrá að mati Stefáns Más Stefánssonar og Friðriks Árna Friðrikssonar Hirst, verður innleidd í lög á Íslandi samkvæmt Evrópurétti. ESB verður óbundið af þeim fyrirvara Alþingis að skilja gerð 713/2009 frá innleiðingu Orkubálks #3 í EES-samninginn.
Sæstrengsfjárfestar munu geta sótt um leyfi til Orkustofnunar fyrir sæstrengslögn til Íslands, eins og ekkert hafi í skorizt, þ.e. eins og enginn fyrirvari þessu lútandi hafi verið settur í íslenzk lög. Af munu hljótast málaferli, sem aðeins geta endað á einn veg.

Réttur vettvangur breytinga/aðlögunar fyrir EFTA-ríkin:

Að gera lögformlegt samkomulag við ESB um að fella niður heila gerð í heildstæðum ESB-lagabálki fyrir innleiðingu í einu EFTA-landi er ómögulegt á símafundi. Yfirlýsing samþykkt á símafundi hefur aðeins pólitíska þýðingu hér innanlands, en alls enga réttarlega þýðingu eða skuldbindingu fyrir ESB.
Eini rétti formlegi vettvangurinn fyrir slíka undanþágu eru samninga­viðræður í Sameiginlegu EES-nefndinni, þar sem saman koma fulltrúar allra viðkomandi EFTA-landa og ESB. Breytingar, sem út úr slíkum samninga­viðræðum kynnu að koma, þurfa síðan að hljóta samþykki Fram­kvæmda­stjórnar­innar, Ráðherra­ráðsins og ESB-þingsins.
Við þessar aðstæður er ekkert til, sem hægt er með réttu að kalla „orkupakka á íslenzkum forsendum“. Með því er slegið ryki í augun á fólki með lögfræðilegum loftfim­leikum hér innanlands.

Sæstrengurinn „Ice-Link“:

Í umræddri fréttatilkynningu ráðuneytanna (UR, ANR) 22.03.2019 stendur: „Á sameiginlegum þing­flokks­fundi stjórnar­flokkanna 20. marz sl. var ákveðið að draga til baka umsókn um sæstrengs­verkefnið IceLink inn á fjórða PCI-listann (e. Projects of Common Interest). Hefur erindi þess efnis þegar verið sent.“ Núgildandi PCI-listi er nr 3, ekki nr 4, og gildir hann fram á árið 2020.
Hvers vegna var ekki óskað eftir að fjarlægja „Ice-Link“ af núgildandi lista ? Það er vegna þess, að slík beiðni myndi engin áhrif hafa. Beiðni ríkis­stjórn­ar­innar er ekki einu sinni nægjanleg til að forðast, að „Ice-Link“ fari á nýja listann árið 2020. Þótt hann fari út af fjórða listanum, getur hann farið inn á fimmta listann 2022. Hvaða réttmætur hagsmuna­aðili sem er, getur óskað eftir því við ACER/ESB, að „Ice-Link“ eða t.d. „Ice-Ire“ (sæstrengur til Írlands) fari inn á PCI #4, t.d. raforku­fyrirtækið E´ON eða annar sæstrengs­fjárfestir. Þótt beiðni ríkis­stjórnar Íslands verði vafalaust vegin og metin, hefur hún ekki neitunar­vald um málið.
Það er ekki sopið kálið, þótt í ausuna sé komið, því að í Kerfisþróun­ar­áætlun ESB er gert ráð fyrir „Ice-Link“, og hann er einnig í samevrópskri heildaráætlun (energy corridors) fyrir orkuflutninga. Þar eru mörg samþykkt skjöl og formleg ferli, sem við eiga, svo að áhrif íslenzku ríkisstjórnarinnar eru takmörkuð. Þessi beiðni frá Íslandi dugar ekki endilega til að hindra, að strengurinn fari inn á PCI#4.

Hreinar línur:

Sú leið, sem ríkisstjórnin ætlar að fara í orkupakka­málinu, er ófær, af því að hún brýtur EES-samninginn og er þar með á skjön við Evrópurétt. Annaðhvort verður þingið að samþykkja Orkupakka #3, eins og hann kom frá Sameiginlegu EES-nefndinni, eða að hafna honum alfarið. Það er ekki hægt að samþykkja aðeins hluta af honum, en hafna eða fresta hinu.
Afleiðingin af þessu er sú, að hagsmuna­aðilar, t.d. Vattenfall í Svíþjóð, geta kært ólögmætan gjörning Alþingis (að Evrópurétti) fyrir ESA, og þá mun þessi innleiðing hrynja, eins og spilaborg, og eftir mun standa í íslenzkri löggjöf Þriðji orkumarkaðs­laga­bálkurinn án nokkurrar undantekningar, þ.á.m. sá hluti hans, sem 2 af 4 lagalegum ráðgjöfum utanríkis­ráðu­neytisins töldu brjóta í bága við Stjórnarskrá Íslands.
Þar með virðist einnig myndast grundvöllur fyrir málshöfðun á hendur ríkinu fyrir íslenzkum dómstólum fyrir stjórnar­skrárbrot.

Bjarni Jónsson rafmagnsverkfræðingur.

Leggja til orkupakka með fyrirvara

Til hvers er Sjálfstæðisflokkurinn að bjóða 1900 manns á landsfundi sína? Til að óvirða þá?

Af hverju er þessum Bjarna Benediktssyni alltaf leyft að vera við stýrið og virðist þó aldrei geta farið eftir landsfundum sínum í meiri háttar málum? Nú eins og í Icesave-málinu getur þetta reynzt þjóðinni skeinuhætt, jafnvel hrikalega! Hann er með skilnings­litla konu sem vara­formann, sem hleypt hefur verið í fjögur ráðuneyti og snýr öllu við sem viðkemur Þriðja orku­pakkanum.

Þá er hann með utanríkisráðherra sem sömuleiðis virðist gangast upp í þjónkun við Evrópusambandið. Léleg voru rök þess manns í gærkvöldi, og léleg verða þau áfram fyrir því alvarlega fullveldis­framsali og þeim fjárhagsskelli á þjóðina, sem myndi hljótast af þessum Þriðja orku­pakka, eins og færustu menn (ekki lög­fræði­strákar sem skoða málið um svo sem eina helgi) hafa leitt í ljós. Sjálfur þegir Bjarni sem fastast, kannski að gaddfreðna í nýju "ísköldu mati"? Og þá mun þjóðin spyrja: Hvað hrekur hann til þess? Hvaða nauðsyn er á þessum bannsettans Þriðja orkupakka? ENGIN fyrir okkur! en áhættan gríðarleg. Farðu að taka pokann þinn, Bjarni, ef þú ræður ekki við að verja þjóðina!

Hér má sjá hvernig Bjarni Jónsson rafmagns­verkfræð­ingur tætir í sig skelfilegan málatilbúnað Þórdísar Kolbrúnar Reykfjörð Gylfa­dóttur iðnaðar-, nýsköpunar-, ferðamála- og dómsmála­ráðherra: 

Ráðherra um víðan völl

Jón Valur Jensson.

Vill vísa orkupakkanum til þjóðarinnar

Blaðamaður sem snýr öllu á haus? - og er utanríkisráðherrann öllum heillum horfinn?

Af hverju kallar Þórarinn Þór­ar­insson, áberandi pólitískur blaða­maður Frétta­blaðs­ins, sjón­ar­mið Styrmis Gunnars­sonar gagn­vart Þriðja orku­pakk­anum "minni­hluta­sjónar­mið hans" í Sjálf­stæðis­flokknum?

Er Þórarinn svona illa upplýstur um meginmál? Veit hann ekki af samþykkt Landsfundar Sjálfs­tæðis­flokksins um að við eigum EKKI að samþykka 3. orkupakkann?

Veit Þórarinn ekki, að yfir 90% Íslendinga eru andvíg þessum sama Þriðja orkupakka skv. gildri skoðana­könnun á liðnu ári?

Hverjum er Þórarinn að þjóna með þessum skrifum sínum?

Ummæli Þórarins eru í þættinum Frá degi til dags í Frétta­blaðinu í dag og yfirskrift pistils hans Eintal sálar ... --- rétt eins og Styrmir sé nánast einn um andstöðu sína við Þriðja orkupakkann!

Þvert á móti hefur þeim farið mjög fjölgandi sem átelja harðlega daður Sjálfstæð­is­flokks-ráðherra við Þriðja orkupakkann og áform ESB-manna.

Ennþá alvarlegri spurninga en þessara hér fyrir ofan þarf því að spyrja þessa uppreisnar-ráðherra Sjálfstæðis­flokksins, sem eru að mæla Þriðja orku­pakkanum bót, þrátt fyrir að í 1. lagi er engin þörf á honum (enginn sýnt fram á nauðsyn hans) og í 2. lagi er hann stórhættulegur bæði fullveldi okkar í orkumálum og myndi valda hér keðjuverkunum til margföldunar rafmagnsverðs til almennings og fyrirtækja.

Í Morgunblaðinu í gær lét Guðlaugur utanríkisráðherra svo um mælt, að það væri "auðvitað markmiðið" að fara fram með frumvarp um Þriðja orkupakkann fyrir 30. þessa mánaðar! Jæja, er það "auðvitað" markmið ríkisstjórnar lands sem vill varðveita fullveldi sitt? og er það "auðvitað" (eins og "kalda matið" hans Bjarna Ben. á Icesave-samningum) markmið þessa utan­ríkis­ráðherra að sniðganga með öllu landsfundar­samþykkt síns eigin flokks?!

Jón Valur Jensson.

SI styðji verkalýð fremur en landeyður

Samtök iðnaðarins, SI, eru meðal við­semj­enda verka­lýðs­félaga. Þau ættu fremur að bæta kjör manna en að styðja þjóð­fjand­sam­lega starf­semi.

"Samtök iðnaðarins studdu Já, Ísland sem að­hyllt­ist samstarf við Evrópu­samband­ið."

Þetta kom fram í nýrri bók Helga Magnússonar, Lífið í lit, sem Björn Jón Bragason sagnfræðingur skráði. Frá þessu sagði í grein Jakobs Bjarnar í gær á vefsíðu Vísis.

Öfugmæla­samtökin Já, Ísland unnu að því að Ísland yrði enn eitt litla tannhjólið í Evrópu­sambandinu. Samtök iðnaðarins ættu fremur að stuðla að bættum kjörum verkalýðs á Íslandi heldur en að gera landið að undirlægju ráðherraráðs, framkvæmda­stjórnar og annarra stýri­appar­ata þessa stórvelda­sambands, sem að mestu leyti, í atkvæðavægi í ráðherraráðinu og á ESB-þinginu, hefur verið undir stýrivaldi hinna gömlu nýlendu­velda* álfunnar, en um það hefur áður verið fjallað hér í greinum.

* Tíu aflóga nýlenduveldi ráða lögum og lofum í Evrópusambandinu

Jón Valur Jensson.

Hlakkar til að fara í verkfall