Hverjum þjónar Brynjar Níelsson? Hann ber fyrst & fremst skyldu gagnvart þjóðarhag, stjórnarskrá og fullveldi landsins, ekki form. & varaform. flokks síns, Noregsstjórn eða ESB!

Það er áhyggjuefni að svo sjálf­stæð­ur þingmaður sem Brynj­ar Ní­els­son iðulega er, skuli eiga erf­itt með þor til að hafna kate­gór­ískt Þriðja orku­pakka ESB. "Ég vil reyna að kom­ast hjá því í lengstu lög, ef það er hægt, að inn­leiða þenn­an orkupakka," sagði hann á nýju stöðinni K100 í dag. "Ef það er hægt" -- að hugsa sér!!

Ef hann er óviss, hvað er honum þá að fyrirstöðu að neita að taka þátt í rússn­eskri rúll­ettu um þjóðar­hag og fullveldi landsins?

Ef hann er beittur þrýstingi, vill hann þá gjöra svo vel að upplýsa um, hvaðan hann kemur! -- innan lands frá eða utan frá?

Ef frá eigin forystusveit, Bjarna formanni, Þórdísi varaformanni, hinum hagsmunatengda Birni Bjarnasyni, fyrrverandi ráðherra (tengdaföður Heiðars Guðjónssonar sem er að reyna að fá IceLink í gagnið!), þá má Brynjar til með að upplýsa flokksmenn sína um það! 91,6% aðspurðra stuðningsmanna Sjálfstæðisflokksins í MMR-skoðana­könnun í vor voru andvíg þessum Þriðja orku­pakka -- höfnuðu honum! Það gerði landsfundur flokksins líka, sem og tveir fjölmennir almennir fundir sjálfstæðismanna í haust, með einróma samþykktum þar! Ef einhverjar valda­spírur í flokknum vilja ganga gegn þessum eindregna vilja flokks­manna, þá á sem fyrst að koma upp um þá, afhúpa þá og véla­brögð þeirra.

Ef þrýstingur í málinu kemur frá Brussel beint, skal Brynjar gjöra svo vel að upplýsa um það!

Ef frá Noregi, þaðan sem ráðherra(r) hafa komið til að þrýsta á um að Stór­þingið fái vilja sínum framgengt -- þeim orku­pakka-vilja sem 70% norsku þjóðar­innar er gersam­lega andstæð! -- þá skal hann líka viður­kenna hitt, að við höfum engar skyldur gagnvart norsku ríkis­stjórn­inni í þessu efni.

Ef hann veit til þess, að norskir vald­hafar beiti þving­unum, mútum eða hótunum um refsi­aðgerðir í þessu máli, skal hann upplýsa um það! 

Jón Valur Jensson.

Vilja ekki innleiða orkupakkann

Mun fylgið streyma frá Sjálfstæðisflokknum til tveggja annarra flokka vegna Þriðja orkupakka ESB? (m/viðauka)

"Vonandi rennur það upp fyrir æ fleirum á þingi, að það er allt of mikil áhætta fólgin í því fyrir hag lands­ins að inn­leiða Þriðja orku­pakka ESB. Áhætt­an við að hafna honum er hjóm eitt í sam­an­burð­inum. Að lenda í stappi við ESB síðar út af leyfis­umsókn fyrir sæstreng er hið versta mál, því að þá stendur ESB með pálmann í hönd­unum. Nú er rétt­urinn okkar til að hafna, en rétt­ur­inn til að hafna sæstrengs­umsókn eftir samþykkt bálksins verður aftur á móti ekki okkar. Slík höfnun yrði stórmál gagnvart EES, en höfnun pakkans ekki."

 Svo mælti Bjarni Jónsson rafmagnsverkfræðingur réttilega!

 

Iðnaðarráðherra, með vafasama, ESB-mótaða starfsmenn á sínum vegum, lætur sem samþykkt "pakkans" sé lítið mál, þegar í reynd fjöregg fullveldis okkar í orkunýtingar- og verðlagningarmálum er í húfi, eins og ofangreindur Bjarni hefur rökstutt manna bezt. 

Það var gleðilegt að sjá grein Sigmundar Davíðs Gunnlaugssonar í Morgunblaðinu í gærmorgun, Suma pakka er betra að afþakka. Miðflokkur hans stendur einarður gegn því að hleypa Þriðja orkupakkanum í gegnum þingið. Það sama á við um Flokk fólksins.

 Margir kjósendur Sjálfstæðisflokksins hafa þessa sömu afstöðu, og farnar eru að sjást og heyrast yfirlýsingar nokkurra þeirra um að þeir ætli að yfirgefa flokkinn, ef hann eða ýmsir þingmanna hans gera ógæfumuninn til að troða þessu þjóðfjandsamlega máli í gegn, þvert gegn afstöðu landsfundar flokksins og samhljóða samþykktra yfirlýsinga tveggja fjölmennra, almennra flokksfunda hans í haust.

Nú er Sjálfstæðisflokkurinn kominn niður í um 20,5% í skoðanakönnun. Hefur hann efni á því að taka sviksamlega afstöðu í þessu máli og hrinda frá sér fleiri flokksmönnum? Með því móti gæti flokkurinn endað með minna hlutfall atkvæða en hinir úthrópuðu Svíþjóðardemókratar (17%) eða orðið ámóta smár og Alþýðubandalagið gjarnan var (um 16%)! Þá yrði flokkurinn í bezta falli varadekk undir samsteypustjórnir vinstri flokka á komandi árum!

Sjálfstæðismenn þurfa því að sjá þetta bæði sem baráttu fyrir fullveldis­réttindum þjóðarinnar á sviði náttúruauðlinda og orkuiðnaðar og enn­fremur sem baráttu fyrir því, að þeirra eigin flokkur endi ekki á ruslahaugi sögunnar.

Iðnaðarráðuneytið hefur ekki komið með nein gild rök fyrir því, að það yrði okkur til hagnaðar að samþykkja Þriðja orkupakkann -- og heldur ekki, að það yrði okkur til tjóns að gera það ekki.

En þau þurfa ekki að hanga í þeirri hugsun einni. Líti þau bara til þess, að í skoðanakönnun MMR í vor reyndust margfalt fleiri andvígir samþykkt þessa ESB-pakka heldur en hinir, sem hlynntir voru. Ætlar Þórdís Reykfjörð að ganga gegn eindregnum vilja þjóðarinnar í málinu og hvers vegna? Ætla Bjarni Benediktsson og þingflokksformaður hans að umbera það, að þingmenn Sjálfstæðis­flokksins svíki stefnu hans og greiði atkvæði með orku­pakkanum? -- þessari líka óþurftar­sendingu frá Brussel-valdinu!

 Sigmundur Davíð ritaði í nefndri grein, Suma pakka er betra að afþakka: 

"Ég skora á ríkisstjórnina að fara nú þegar fram á að Ísland fái undanþágu frá orkupakkanum og skili honum svo til sendanda. Í því efni getur ríkisstjórnin reitt sig á stuðning Miðflokksins."

Ennfremur ritaði hann þar í byrjun: 

"Þegar Evrópusambandið afhendir pakka, snýst það gjarnan um að taka eitthvað af viðtakendunum, setja þeim nýjar takmarkanir og skerða ákvörðunarrétt þeirra, jafnvel sjálfstæði heilla þjóða."

Og undir lokin ritaði Sigmundur:

"Það að koma í veg fyrir að erlendar stofnanir öðlist yfirþjóðlegt vald á Íslandi og aðrir hagsmunir samfélagsins verði veiktir ætti ekki að vera pólitískt þrætuepli innan lands, ekki frekar en önnur mál sem snúa að því að verja hagsmuni landsins út á við eða sjálft fullveldið.

Það er grátlegt að stjórnvöld telji það ekkert tiltökumál að framselja sneið af sjálfstæði landsins á sama tíma og haldið er upp á að 100 ár séu liðin frá því að Ísland endurheimti fullveldi sitt. Um leið fara svo fram umræður um hvort eigi að afnema svo kallað fullveldisákvæði stjórnarskrárinnar til að auðvelda slíkt framsal í framtíðinni."

Það er von að þessum flokksforingja blöskri.

VIÐAUKI:

Styrmir Gunnarsson, fv. ritstjóri Mbl., benti á þetta á vefnum Styrmir.is:

"Á landsfundi Sjálfstæðisflokksins sl. vetur var samþykkt ályktun þess efnis að flokkurinn hafnaði frekara framsali á yfirráðum yfir íslenzkum orkumarkaði til stofnana Evrópusambandsins. Í skoðanakönnun sem Maskína gerði fyrir Heimssýn sl. vor kom fram, að 91,6% kjósenda Sjálfstæðisflokksins eru sama sinnis. Afstaða fundarmanna í gær fór ekki á milli mála. Forysta og þingflokkur Sjálfstæðisflokks geta ekki hundsað viðhorf almennra flokksmanna í þessu máli."

Og undirritaður spyr: Hvernig getur Bjarni Benediktsson hundsað álit yfir 90% kjósenda Sjálfstæðisflokksins? Stefnir hann að endalokum flokksins eða klofningi? Hvað verður þá eftir af honum? Hvað er svona mikils virði fyrir BB og BB frænda hans, fyrrv. dóms- og menntamálaráðherra, að þeir vilji taka þessa áhættu fyrir þann gamla flokk? Eða má hann bara vel við því að tapa enn fleiri stuðningsmönnum?!!!

Jón Valur Jensson.

"Ef þessi tilskipun ESB verður samþykkt á Alþingi, eru varnir okkar farnar"

Snilld var ræða Vig­dísar Hauks­dóttur lögfr. og fv. alþm. á fund­in­um um 3. orku­mála­pakka ESB á Há­skóla­torgi í gær. Hér eru nokk­ur af helztu atr­iðum ræð­unn­ar, sem fljót­lega verð­ur raun­ar hægt að nálg­ast í heild á mynd­bands­upp­töku af henni á net­inu.

Vigdís er mjög vel heima um þessi mál, síðan hún stóð í stríðu í Alþingi að tala gegn ESB-umsókn Samfylk­ingar­manna, og þekkir á þeim ýmsa fleti, sem öðrum eru ekki endi­lega ljósir, eins og fram kom í ræðu hennar. Hefur hún áfram fylgzt vel með ESB-málum og sér það glögglega, að í þessu tilfelli enn einnar EES-tilskipunar og tillögu um að innfæra hana í lög Íslands er um að ræða enn eitt dæmi um "spægipylsuaðferðina", þ.e. að koma öllu regluverki Evrópu­sambands­ins á okkur í smáum eða stærri skömmtum, hverjum eftir annan.

"En hér er verið að fjalla um náttúru­auðlindir" Íslands.

Ásækni ESB í þessu efni ber að skoða í ljósi þess, að "mikill orku­skortur er í Evrópu, verið er að loka þar ýmsum orku­verum, kola- og kjarn­orku­knúnum, sem eru talin úrelt og mengandi." (Orð V.H. hér jafnan höfð með tilvitn­unar­merkjum.)

"Ef Ís­land væri í ESB, stæði þessi um­ræða um Þriðja orku­mála­pakkann ekki yfir, því að við værum þá undir Lissa­bon-sátt­mál­anum" og lög ESB lög hér og engin von til þess að atkvæði okkar hefði neitt vægi gegn því í ESB-stofn­unum. (Af þessu sést raunar, hve gersamlega valdalaus við hefðum verið eftir "inngöngu" í Evrópusambandið, við myndum engu ráða t.d. um ákvörðun um sæstrenginn, og eins og bent hefur verið á, gæti ESB þá t.d. látið reisa hér ótal vindmyllur um landið og spillt hér útsýni. Aths. JVJ.)

"Það er skylda eins ríkis í ESB að skaffa öðru ríki þar orku, ef hana skortir."

"Það var í raun búið að opna orkupakkann [þ.e. stefnuna á þann þriðja] í ESB, þegar ESB-umsóknin [hans Össurar & félaga] stóð yfir," því að Lissabon-sáttmálinn gaf framkvæmdastjórninni valdheimildir í þessa átt.

"Íslendingum var lofað láni frá ESB til að leggja sæstreng, ef Ísland gengi í ESB"! Þetta var þegar umsóknin um inngöngu í Evrópusambandið var á döfinni hjá Samfylkingunni 2009, þá var lofað þessu láni, partur af því að lokka okkur inn, en þarna sést, að strax var meðvitað farið að stefna á þennan sæstreng á meginlandinu árið 2009.

"Þingmenn eru undir gríðarlegri pressu ekki aðeins frá ESB, heldur einnig frá norskum stjórnvöldum að samþykkja 3. orkupakkann." En eins og ítrekað kom fram á fundinum (og Vigdís veit vel), myndi norska þjóðin kunna Alþingi heilar þakkir fyrir að hafna þessari ESB-tilskipun, því að 70% Norðmanna eru andvíg innfærslu hennar þar í landi.

"Ef þessi tilskipun ESB verður samþykkt á Alþingi, eru varnir okkar farnar."

"Á ráðstefnu Háskólans í Reykjavík um málið voru aðallega fylgismenn tilskip­unar­innar í panelnum." [Svo var einn lesandi að kvarta hér á Fullveldis­vaktinni, að ráðstefnan á Háskóla­torgi HÍ í gær hefði verið "aðeins einhliða áróðurs­fundur"; en ekki varð þess vart, að viðkomandi segði það sama um fund HR! Ennfremur reyndi formaður Heimssýnar, próf. Haraldur Ólafsson, hvað hann gat til að fá meðmælendur Þriðja orkupakkans til að verða meðal ræðumanna í gær -- reyndi það í ráðuneytinu og víðar, en fekk engan til að taka að sér slíkt hlutverk; þetta upplýsti hann í fundar­slita­ræðu sinni í gær.] 

Norðmenn vita, að þessi tilskipun, gerð fyrir mun stærri þjóðir, á ekki við um aðstæður í þeirra landi, og ennþá síður á hún við á Íslandi. Ennfremur er enn ekki víst, að það myndi borga sig að flytja rafmagnið þessa löngu leið, svo mikil eru afföllin með núverandi tækni.

Undir lokin vék Vigdís að því, að mikið hefði verið reynt á sínum tíma að gera gys að henni fyrir að tala um "hreina orku" frá orku­auðlind­um Íslands og hins vegar "skítuga orku" frá evrópskum orkuverum (kola-, olíu- og kjarnorku­knúnum), sem við fengjum hingað til baka. En nú eru einmitt orku­fyrir­tæki hér farin að selja eignar­kvóta í sínum vottaða orkuforða og taka við óhreinum, neikvæðum kvótum í staðinn, þannig að nú geta t.d. íslenzk garðyrkju­fyrirtæki ekki lengur auglýst sig með vörur sem fram­leiddar eru með græna, endur­vinnan­lega orku að baki, því að þá yrði sagt við þau: Nei, þið eruð ekki með hreina og vottaða kvóta! (en þetta er eitt af því, sem hlotizt hefur af því, að gengið er út frá vísinda­tilgátunni um manngerða hlýnun jarðar í loftslags­málum).

Jón Valur Jensson.

Þriðji orkupakkinn í febrúar

Enn eykst skefjalaus útaustur úr ríkissjóði vegna EES-báknsins

Fram­lög Íslands til upp­bygg­ing­ar­sjóðs EES vegna aðild­ar Íslands að EES-samn­ingn­um verða 566 millj. kr. 2019, eru 276,5 millj. 2018, verða 899 millj. 2020 og einn millj­arður og 26 millj­ón­ir árið 2021.

Þvílík aukning, hátt í fjór­földun á þremur árum! En hvað kemur okkur við einhver upp­bygg­ing í Búlgaríu eða Rúmeníu, Lettlandi eða Slóveníu? Jú, millj­arður skal það verða! En Fjölskyldu­hjálp Íslands og hennar fátæku skjólstæðingar fá engar þrjár milljónir, hvorki úr ríkissjóði né borgar­sjóði, þá skal frekar kastað milljarði austur fyrir gamla járntjaldið, handa fátækum sem Brussel-liðið getur ekki annazt, og lokað fleiri götum í Reykjavík, svo að hver bílstjóri fari að átta sig á því að hann er persona non grata, enda beri borgin meiri ábyrgð á útlendum en innlendum borgarbúum.

Þá stendur til "að veita 162 millj­.kr. auka­lega til sendi­ráðs Íslands í Brus­sel á næsta ári til þess að styrkja starf­semi þess og fjölga full­trú­um fagráðuneyta þar vegna aðild­ar Íslands að samn­ingn­um um Evr­ópska efna­hags­svæðið (EES)" (mbl.is).

Já, þetta verður Gósentíð hvítflibbanna í ráðuneytunum, ESB-þotuliðsins:

Enn­frem­ur seg­ir í fjár­laga­frum­varp­inu að und­ir­bún­ing­ur sé þegar haf­inn að því að efla sendi­ráðið í Brus­sel og fjölga full­trú­um fagráðuneyta inn­an þess.

Þetta fer að minna á ljóð Steins Steinarr:

... Húsameistari ríkisins, ekki meir, ekki meir!

Jón Valur Jensson.

Hundruðum milljóna meira vegna EES

Bragð er að þá barnið finnur: jafnvel Baldur Þórhallsson sér þetta!

Á sama tíma og æ fleiri sjá annmarkana á því að halda áfram í EES vegna yfirgangs ESB sem þvingar upp á okkur þungbærum lagaklöfum,* kemur í ljós, að jafnvel það að neyða okkur til refsiaðgerða gegn Rússum er enn einn anginn af EES-"samstarfinu"! En Baldur þessi er einn mesti ESB-maður á norðurhveli jarðar, hefur lengi mælt með innlimun landsins í Evrópusambandið, enda árum  saman verið margmilljóna-styrkþegi þess.

En í áðurnefndum refsiaðgerðum hefur þjóðin verið neydd til að taka þátt, sér til skaðræðis, af meðvirkri stjórnmálaelítu, sem gæti nú farið að syngja sitt síðasta, ef hún áttar sig ekki á því, að hún er alveg að klofna frá þjóðinni.

* Persónuverndarlögunum, sem koma sér afar illa fyrir sveitarfélög og fyrirtæki, og Þriðja ESB-orkumálapakkanum.

Jón Valur Jensson.

Tökum þátt vegna EES-samningsins

Þrumugóður fundur sjálfstæðismanna gegn Acer-orkumálapakka ESB

Um 90-100 manns munu hafa sótt fundinn í Valhöll kl.17.30 til um kl. 20 í kvöld. Tillaga til fundar­álykt­un­ar var sam­þykkt sam­hljóða, mót­atkvæða­laust. Miklar umræður voru eftir erindi framsögu­manna, sem voru Styrmir Gunn­arsson, fyrrv. ritstjóri, dr. Stefán Már Stef­áns­son, prófessor í Evrópu­rétti við HÍ, Bjarni Jónsson rafmagns­verk­fræð­ingur og Elías B. Elíasson verkfræðingur, sem starfað hefur áratugum saman hjá Landsvirkjun. Fundarstjóri var Jón Magnússon hrl., fyrrv. varaþingmaður, og fór það vel úr hendi.

Vafi hafði leikið á afstöðu forystu Sjálfstæðis­flokksins til ACER-málsins, en einungis einn ráðherra hans, varaformaður flokksins, Þórdís Kolbrún Reykfjörð Gylfa­dóttir iðnaðar- og ferða­mála­ráðherra, mun hafa sótt fundinn, auk a.m.k. eins þingmanns, Birgis Ármanns­sonar. Hvorugt þeirra tók til máls á fundinum. Meðal annarra fundarmanna, sem sátu allan fundinn, var Davíð Oddsson, fyrrv. forsætisráðherra, nú ritstjóri Morgunblaðsins.

Þetta er fundar­ályktun þessa sögulega fundar í Valhöll:

Fund­ur­inn skor­ar ein­dregið á for­ystu Sjálf­stæðis­flokks­ins að hafna þriðja orkupakka Evr­ópu­sam­bands­ins á þeim grunni að hann stang­ast á við ákvæði stjórn­ar­skrár­inn­ar, opn­ar Evr­ópu­sam­band­inu leið til yf­ir­ráða yfir einni helstu auðlind Íslands og hækk­ar verð á raf­orku og af­leiðing­ar til langs tíma eru óviss­ar.

Allur fundurinn var tekinn upp á mynd­band og verður væntan­lega aðgengi­legur hvað úr hverju.

Jón Valur Jensson.

Fullveldisframsal að vild evrókrata? Nei takk!

Með hjásetu við stjórn­laga­þings­kosn­ingar 27.11. 2010 færðu margir [hægri og miðju-] stjórnar­and­stæð­ing­ar Sam­fylk­ingu og fimmtu her­deild ESB þann áfanga­sigur á leið þeirra í Evrópu­stór­veld­ið að gefa þeim færi á lúmsk­um stjórn­ar­skrár­breyt­ingum. Afleið­ingin: [aðeins] 37% kjörsókn og áberandi stór hlutur ESB-sinna.

A.m.k. 10-11 af 25 efstu í kosningunni, sem reyndist ógild og að engu hafandi, eru eindregnir fylgis­menn inntöku Íslands í Evrópu­sambandið, þ. á m. klókur fyrrv. starfsmaður ESB, Eiríkur Bergmann Einarsson. Er hann nú á launum hjá Evrópu­fræðasetri á Bifröst, sem þiggur mikla styrki frá framkvæmdastjórn ESB! Svo tvöföldum í roðinu var falið að véla um stjórnarskrá og beita áhrifum sínum meðal græsku­lítilla „ráðsmanna“.

Aðrir helztu ESB-harðlínumenn í hópi hinna 25 eru Vilhjálmur Þor­steinsson í CCP, Gísli Tryggvason í Neytenda­stofu, sem leggst lágt við að afla „frumvarpinu“ (!) stuðnings­manna (sjá: lifsrettur.blog.is/blog/lifsrettur/entry/1255535/), Guð­mundur Gunnarsson úr Rafiðnaðarsambandinu, Illugi Jökulsson, Pavel Bartozek og Þorvaldur Gylfason, iðinn áróðurs­meistari sem heldur uppi blekk­ingum af alvarlegasta toga (sjá: jvj.blog.is/blog/jvj/entry/1263309/). Með fylgdu ESB-sinnar eins og Silja Bára Ómarsdóttir, Þórhildur Þorleifs­dóttir og Freyja Haraldsdóttir.

Að hvöt Illuga Jökulssonar sniðgengu 30 þingmenn úrskurð Hæsta­réttar um ógildingu kosn­ing­anna. Í trássi við stjórn­laga­þings­lögin, sem enn voru í gildi, var kosningin ekki endurtekin, en 25 manna hópnum boðið að setjast í nefnd í umboði 30 þingmanna, þ.e. „stjórn­lagaráð“. Þá var þeim gert óvænt tilboð, eins og til að liðka til fyrir þátt­tök­unni: að sitja í 4 mánuði á fullum alþingis­manns­launum í stað tveggja, eins og verða átti um stjórnlaga­þingið (sjá um það stór­alvar­lega mál og ólögmæta ferli: jvj.blog.is/blog/jvj/entry/1263312/).

Í takt við evrókratíska ofhleðslu „ráðsins“ rættust verstu hrakspárnar: laumað inn grófri fullveldisframsalsgrein, nr. 111. Jafnvel gamlir íhaldsmenn í „ráðinu“, Pétur Gunnlaugsson á Útvarpi Sögu (jvj.blog.is/blog/jvj/entry/1263311/) og Ari Teits­son, féllu sem skotnir fyrir ódýrum áróðurs­brellum Þorvaldar og Eiríks til að réttlæta þá lúsléttu heimild til fullveldis­framsals. Er Pétur sízt linari en þeir í áróðri með 111. greininni, segir hana gera fullveldisframsal „erfiðara“ en núverandi stjórnarskrá og fullyrðir að stjórnarskráin skipti engu máli, ef ákveðið verði að ganga í ESB, því að þá víki hún fyrir lögum ESB.

Þetta er fleipur, meðan við erum utan ESB. Margar greinar stjórnarskrárinnar fela í sér, að allt löggjafarvald yfir okkur sé í höndum Alþingis og forsetans (og í vissum tilfellum: þjóðarinnar). Ef stjórnvöld reyna að brjóta 2. gr. hennar, 16., 26. gr. o.fl. með því að undirrita aðildarsamning sem gefur ESB formlega beint og æðsta löggjafarvald yfir landinu, sem og, að landslög hér verði víkjandi fyrir ESB-löggjöf sem rekst á þau, þá verður sú gjörð yfirvalda samstundis kærð til Hæstaréttar af sjálfvöktum fjöldasamtökum sem augljóst stjórnarskrárbrot.

Að segja að „þjóðin“ fái þá „vörn“ í 111. gr. að geta kosið gegn fullveldisframsali lýsir blindni, því að 30-35% kosningabærra manna gætu þá verið að taka afdrifaríka ákvörðun um framsal ríkisvalds, þ.m.t. allt æðsta löggjafarvald, til erlends stórríkis, sennilega fyrir fullt og allt, þ.e.a.s. ef atkvæði féllu nokkuð jafnt í 60-70% kjörsókn um málið. Geta 30% kallast „þjóðin“?

Útvarp Saga er í áróðursferð fyrir stjórnlaga­pakkann. Enginn laga­prófessor eða stjórn­skipunar­fræðingur kemst þar að hljóðnemanum, en „ráðsmönnum“ boðið nær daglega á rauða dregilinn, jafnvel ESB-innlimunar­sinnum eins og Þorvaldi, Eiríki Bergmann og Vilhjálmi Þorst. En þrír þáttagerðarmenn, sem dirfðust að gagnrýna stjórnlagaráð, voru látnir taka pokann sinn, ég, Baldur Ágústsson fv. forsetaframbj. og Jón Magnússon hrl. Ríkisstjórnarútvarpið stendur svo undir því nafni með hlutdrægu, ójöfnu vali manna í Silfur Egils o.fl. þætti í þágu stjórn­laga­ráðs – ítrekuð hlutleysisbrot, en stjórnar­skrá lýðveldisins liggur óbætt hjá garði og ekki minnzt á hana á atkvæða­seðlinum!

Í 82. tillögugr. er í raun búið til embætti varaforseta Íslands, í höndum eins manns, flokkspólitísks forseta Alþingis, fulltrúa stjórnar­meirihluta! Á að treysta honum fyrir málskotsvaldinu? Hví var forseta Hæstaréttar ekki fremur falið það valdahlutverk á hendur?

Í 113. gr. „ráðsins“ er 5/6 alþingismanna gefið vald til að breyta stjórnarskrá án þess að spyrja þjóðina! Fjórflokkurinn hefur yfirleitt haft fleiri en 5/6 þingsins. Þetta hentar honum vel.

Úr 74. gr. stjskr. vill „ráðið“ fella niður heimild til að láta banna viss félög. Gæti t.d. átt við kynþátta­haturs­félög, eins og Björg Thorarensen lagapróf. bendir á, alþjóðleg glæpasamtök, mafíur, hrottagengi.

Ráðið vill fella niður 2. tl. 72. gr. stjskr., en það ákvæði leyfir stjórnvöldum að takmarka eign útlendinga í fasteignum og er helzta vörn innan­ríkis­ráðherra gegn jarðeigna-ásælni Kínverja hér á landi.

Sama stjskr.ákvæði er traust vörn gegn kaupum útlendinga á útvegs­fyrirtækjum hér. Hefur Jón Bjarnason alþm. bent á, að ráðið vill þessa takmörkun á fasteigna­kaupum útlendinga feiga. Slík niðurfelling virðist þjónkun við óskir ESB-innlim­un­ar­sinna sem laumuðust inn í hið ólögmæta „ráð“.

Mestu varðar að menn afstýri því stórslysi að liðkað verði fyrir innlimun Íslands í ESB. Það er þeim mun mikil­vægara sem við eigum þar við að etja afl 1570 sinnum fólks­fleira veldis en íslenzku þjóðarinnar, afl sem notar sína fjárhags­yfirburði til að dæla hingað áróðursfé og hyggst gera það í vaxandi mæli.

Grein þessi birtist upphaflega í Morgunblaðinu 20. október 2012, höfundur er guðfræðingur, prófarkalesari og form. Samtaka um rannsóknir á Evrópu­sambandinu.

Svo bregðast krosstré sem önnur tré

Raunalegt er að sjá Björn Bjarnason ljá stefnunni á Acer-orku­mála­pakk­ann, með fram­sali ríkis­valds héðan, stuðning sinn í grein í gær. Væri honum sæmst að kafa djúpt og af allri sinni skarp­skyggni í greina­skrif Bjarna Jóns­sonar raf­magns­verk­fræðings í málið og losa sig við sínar blekk­ingar­hugmyndir, enda þekkir Bjarni allan þennan málaflokk eins og handar­bakið á sér, verkfræði­lærður í Noregi, hefur fylgzt með allri EES-umræðunni þar og hefur langtíma reynslu sem rafmagns­verkfræð­ingur að störfum í okkar eigin virkjana- og raforkudreifingar-geira.

Nafn Rögnu Árnaóttur, fyrrv. utanþings­ráðherra, sem Björn Bjarnason treystir á, er engin trygging fyrir því, að hún sé hér góður vegvísir, eða eru þeir margir sem trúa leiðsögn hennar og Dags B. Eggerts­sonar um Hvassahrauns­flugvöll sem lausn á okkar flug­samgöngum?!

Undirritaður (upptekinn mjög í dag) frétti af þessari grein Björns á snjáldur­skinnu sinni (facebók) eftir miðnættið, þar sem flugmaðurinn eldklári Þorkell Ásgeir Jóhannsson lagði inn þessa athugasemd: 

Björn Bjarnason rekur nú mikinn áróður með 3. orkupakkanum með vísan í greinargerð Rögnu Árnadóttur um efnið. En greinin sú afhjúpar eitt lykil­atriði málsins í kafla 4.4, neðst í fyrstu mgr, þar sem segir að ESA muni taka þátt í starfi ACER án atkvæðisréttar! Aðkoma ESA sem eftirlits­aðila (sem átti að róa EES-ríkin gagnvart valdaafsalinu til ACER) er því einungis til málamynda. (Feitletr. JVJ)

Vonandi er ekki að bresta flótti í þinglið Sjálfstæðisflokksins um málið, þ.e.a.s. frá einarðri varðstöðu um fullveldið, en landsfundur hefur þegar tekið afstöðu GEGN þessu yfirvofandi þingmáli ESB-vinanna.

Falli Sjálfstæðisflokkurinn (e.t.v. undir forystu Guðlaugs Þórs Þórðarsonar og leiðsögn Björns Bjarnasonar) fyrir fagurgala ESB-manna um málið, þá er hann að fella gildan part af full­veld­is­réttindum okkar og verð­skuldar ekkert minna en sitt eigið gengisfall í augum eigin óbreyttra flokksmanna.

Jón Valur Jensson.

Með svikara við fullveldi Íslands í forsetastóli og ráðabruggi um framsal fullveldis til ESB sýnir Alþingi þjóðinni óvirðingu sína

Blöskranleg eyðsla stjórn­valda í Þing­valla­fund og eigin yfir­bygg­ingu megn­ar sízt á aldar­afmæl­is­ári að fegra eða rétt­læta athæfi þings­ins gagnvart stjórn­ar­skrá; og Stein­grímur J. Sig­fús­son í stafni sem forseti Alþingis er eins og hver önnur smekkleysa, eftir að hann sveikst aftan að full­veldis­rétt­indum landsins með því að ganga berlega á bak orða sinna með fullri þátttöku í því gerræði Samfylk­ing­arinnar að sækja um inngöngu í Evrópusambandið vorið 2009.

Fjárveitingu vegna þessa Þingvallafundar Alþingis í dag hækkaði þingið úr 40 milljónum króna í 82 milljónir. Á sama tíma bárust fregnir um, að kostnaður við aðstoðarmenn ráðherra er yfir 400 millj. kr. á ári, en hver þeirra fær að meðaltali 19 milljónir á ári, þ.e. langt yfir eina og hálfa milljón á mánuði.

Kosningasvik Steingríms J. árið 2009 voru greypileg. 

Orð Steingríms J. Sigfússonar hér á eftir eru á tæru: hvernig hann narraði þjóðina með eindregnu kosningaloforði fyrir maíkosningarnar 2009 um að fara EKKI í aðildarviðræður, um að hans flokkur væri traustastur í málinu, en sneri svo algerlega við blaðinu með þátttöku sinni og annarra í VG í ESB-umsókn Össurar og Jóhönnu strax þá um sumarið. Sjáið þetta afhjúpandi hálfrar mínútu myndband, daginn fyrir kosningarnar 2009:

https://www.youtube.com/watch?v=AIBuEnFQ6ac

Þar segir orðrétt:

• Sigmar í Kastljósi: "Kemur það til greina, Steingrímur, bara svo að ég spyrji þig, kemur það til greina að hefja undirbúning að því að sækja um, strax núna eftir kosningar? ..."
• Steingrímur: "Nei."
• Sigmar: "... vegna þess að þannig hefur Samfylkingarfólkið talað ..."
• Steingrímur: "Nei."
• Sigmar: "... að þetta byrji í sumar?"
• Steingrímur: "Nei."
• Sigmar: "Hvenær getur þetta byrjað?" 
• Steingrímur: "Það samrýmist ekki okkar stefnu, og við hefðum ekkert umboð til slíks, og þó við reyndum að leggja það til, forystufólkið í flokknum, að það yrði farið strax í aðildarviðræður, gagnstætt okkar stefnu í maí, þá yrði það fellt í flokksráði Vinstri grænna. Þannig að slíkt er ekki í boði."

Allt þetta sveik svo hr. Steingrímur J. Sigfússon í beinu framhaldi af kosning­unum vorið 2009 og beitti, að séð varð, þvingunum til að fá þingmenn eigin flokks til að greiða atkvæði með Össurar-umsókninni!

Hvernig datt alþingismönnum í hug, árum seinna, að kjósa svo stórvarasaman mann sem eftirmann Jóns Sigurðssonar forseta, sem forseta sjálfs Alþingis?! Við verðum að horfa upp á hann vera helztan í forsvari Alþingis á 100 ára afmælisfundi á Þingvöllum í dag!

Og nú hafa þingmenn staðið í ráðabruggi um að veikja sjálf fullveldis­ákvæði stjórnarskrárinnar! Um þetta hefur verið fjallað nýlega, meðal annars í Reykjavíkurbréfi Morgunblaðsins sl. sunnudag.

Í klausu Reykjavíkurbréfs undir millifyrirsögn: Falin stórfrétt, er talað um, að af ríkisstjórninni

"hefur ekki verið neitt að frétta. Það þýðir þó ekki endilega að alls ekki neitt sé að gerast. Því að þeir sem allra best fylgjast með vita til að mynda að ríkisstjórnin er óvænt að baksa við það á bak við tjöldin að undirbúa breytingar á stjórnarskrá til að tryggja að hægt verði að ganga í ESB með sem minnstum vandræðum. Þetta hljómar ótrúlega en er samt satt. Fyrir flokk sem hangir enn í að vera stærsti flokkur landsins birtist þetta sem einhvers konar þráhyggjuleg taka tvö á hlaupinu út undan sér í Icesave „eftir ískalt mat“ sem laskaði flokkinn varanlega, en þó ekki nægjanlega, að því er virðist." [Leturbr.jvj.]

Og þessu er fylgt eftir með meiri upplýsingum Reykjavíkurbréfs af málinu:

"Byrjaðir aftur

Nýlega var haldinn furðulegur formannafundur í sumarbústað forsætis­ráðherra á Þingvöllum. Það væri í sjálfu sér frétt, þótt ekkert hefði gerst þar. [...] þegar horft er til þess sem raunverulega var rætt. Því á þessum einstæða formannafundi voru á dagskrá umræður um breytingar á stjórnarskrá og þá einkum um hvaða leiðir væru helst færar til að grafa undan fullveldi landsins, á miðju hundrað ára afmæli þess fullveldis, sem verið er að grafa undan. [Feitletr.jvj]  

Þingvallafundur hinn opni

Heyrst hafði á skotspónum fyrir löngu að til stæði að mæta á Þingvöll til þess að minnast ársins, sem hefur að öðru leyti að mestu farið fram hjá þjóðinni, enda eru hátíðartilburðirnir líkastir því að myndarlegt átthagafélag haldi upp á virðulegt afmæli.

En á þessum fundi sem aðeins hefur verið hvískrað um ætti þá að gefast tilvalið tækifæri til þess að segja upphátt það sem nú er pukrast með á harðlokuðum fundi í ráðherrabústaðnum á Þingvöllum.

Sem sagt hina einu raunverulegu ástæðu fyrir því að sífellt sé haldið áfram með algjörlega óþarft tal og breytingabrölt gagnvart stjórnskránni, sem kennd er við Þingvöll og lýðveldisstofnunina og samþykkt var með 98 prósentum atkvæða þjóðarinnar. Enn skal unnið að því að tryggja að hægt verði að gera óvinum sjálfstæðis og fullveldis Íslands léttbærara að koma aðför sinni áfram."

Þetta eru stóralvarleg tíðindi, sem stjórnvöld finna vonandi sóma síns vegna tilefni til að draga til baka, en höfundur Reykjavíkurbréfs kann hér með af­hjúp­un sinni að hafa lagt fram þann björgunarhring sem borgið getur þjóðinni frá þessu illa ráðabruggi um að veikja fullveldi lands okkar og þjóðar. Það mun rísa reiðialda í þjóðfélaginu, ef í ljós kemur, að varnaðarorð Reykjavíkurbréfs voru öll á rökum reist. Ekki síður en í Icesave-málinu mun þá þjóðarviljinn fá miklu áorkað og engu hlífa, sem undan verður að láta. Stjórnarslit gætu þá orðið fyrir fullveldisdaginn 1. desember!

Jón Valur Jensson.

Blásið til hátíðarfundar á Þingvöllum

Íhlutun ESB í innanríkismál Póllands sýnir í hnotskurn valdhrokann í Brussel

Evrópusambandið sýnir nú hug sinn í verki gagn­vart sjálf­stæð­um ákvörð­un­um að­ild­ar­ríkja í lög­gjaf­ar­málum: breytt­um starf­stíma hæsta­réttar­dóm­ara í Pól­landi hafnar ESB og fer í mál við Pólverja fremur en að láta þá um sína eigin stjórn á málum! Að baki býr svo sú hótun að svipta Pólland atkvæðisrétti sínum í Evrópu­sambandinu, verði ekki látið undan forræðishyggjunni þar!

Þetta sýnir ESB-ríkjum sem öðrum, að jafnvel svo stórt land sem Pólland getur ekki talið sér óhætt að gera ráð fyrir að halda fullveldi sínu þar að meira eða minna leyti óskertu.

Jón Valur Jensson.

ESB höfðar mál gegn Póllandi