Við þurfum ekki þennan Evrópufána

 

Prófessor Dr. Karl Albrecht Schachtschneider í almennum og borgarlegum lögum við Nuremberg háskólann dregur upp hrikalega en raunverulega mynd af næstu skrefum í þróun Evrópusambandsins, þar sem evrukreppan á óhjákvæmilega eftir að snarversna.

"Við verðum að ganga út frá þeirri staðreynd, að þessi pólitíska elíta vill halda áfram í rauðan dauðann að bjarga evrunni."

"Grundvöllurinn er að með evruna og þá stefnu að bjarga henni, þá er raunverulega markmiðið að skapa Ríki Evrópu." 

"Þessi stefna mun leiða til efnahagslegs hrun allra þjóða."

"Í suður Evrópu er staðan orðin óbærileg. Kreppan og samdrátturinn, sem eru þessu samfara, hafa engan veginn leitt til verðbólgu en hún mun koma. Áhrifin verða meiri í Frakklandi, sem mun draga Þýzkaland með sér niður."

"Við megum eiga von á allsherjar stjórnmálaóreiðu."

"Fólk mun rísa upp við vissar kringumstæður og þau uppþot munu verða kerfisbundið lamin niður af erlendu lögregluliði, það er þegar búið að skipuleggja deildirnar - The Eurogendfor - svo það mun koma tími byltingartilrauna með mismiklum árangri.....og við munum sjá Evrópu stjórnað af harðræði á einræðislegan hátt."

Smelltu til að sjá viðtalið hér. 

gs 

Fjármálastöðugleikaáætlanir ESB sundra Evrópu í norður og suður

Ríkisstjórnin er dugleg að strá skattapeningum í alls konar gæluverkefni. Nú síðast í "sérfræðingahóp um fjármálastöðugleika". Að venju er setið á löngum fundum og mikið magn af orðum framleitt og prentað á pappír. Í þetta sinn á 50 síðna þykkri skýrslu á ensku. Hvað kostaði þessi vinna? 

Spyrja má fyrir hvern ríkisstjórnin er að vinna? Erlenda kröfuhafa eða íslenskan almenning?

Nú er lagt til, að lögin sem björguðu þjóðinni frá gjaldþroti verði afnumin og í þeirra stað sett "væntanleg tilskipun" ESB. Þetta er í sama véfréttarstíl og "skýrsla" Seðlabankans um að íslenska krónan sé ónýt og eina leiðin fyrir Íslendinga til að lifa af sé að fleygja krónunni og taka upp evru.

Sem mundi mótsvara 7 þjóðargjaldþrotum á sjö dögum eins og gamall vitur maður ættaður frá órólega svæðinu sagði.

Reynslan af stöðugleika evrunnar hefur sýnt sig og sannað: löndin í suður Evrópu eru mörg eins og Grikkland þegar gjaldþrota. Gjaldþrota bönkum er haldið gangandi með peningaprentun á meðan búrókratarnir koma bankabandalagi, skattabandalagi, fjármunabandalagi og öðrum nauðsynlegum bandalögum í gegn í bandalagi bandalaganna. Lesist leggi niður síðustu leifar sjálfsforræðis aðildarríkjanna og steypi fjárlögum evruríkjanna í ein sameiginleg fjárlög með nýjum allsherjar fjármálaráðherra evrusvæðisins.

Áætlunin er sú sama og hjá keisaranum í Róm. Hann sem drottnaði yfir öllum þegnum risasvæðis síns með reglunni: gjaldið keisaranum það sem keisarans er.

Búrókratarnir í Brussel eru fyrirmynd Jóhönnu Sigurðardóttur forsætisráðherra litlu eyjunnar, þar sem allir gera allt vitlaust: fólk fellir Icesave, veiðir makríl, neitar að ganga í ESB, stendur á stjórnarskránni, er illa við að borga skatta og notar krónu sem gjaldmiðil.

Slíkir þverhausar þurfa náttúrulega mörg og mikil sérfræðiálit helst frá útlöndum, alla vega frá gáfuðu fólki, sem skilur dýrðarljómann hjá ESB. Jóhanna Sigurðardóttir vill, að eftirmenn hennar fái störf í hásætum hirðarinnar í Brussel svo þeir geti leiðbeint þverblindum íslenskum almúganum í betliraðirnar til Brussel.

Því þannig virkar kerfi fjármálastöðugleikans og innlánatryggingarkerfis ESB, að enginn ræður lengur sinni för og verður að sækja um leyfi fyrir matarpening yfir daginn hjá þeim, sem vitið og valdið hafa og engin lög ná yfir vegna þess hversu óskeikulir þeir eru enda valdið frá himnum komið en ekki sauðsvörtum þorska- og álmúganum.

Best að leggja þetta plagg með öllum hinum dýru orðunum í kringlótta gatið og sturta niður./gs 

Vilja afnema ábyrgðaryfirlýsingu

Átta aðildarríki ESB senda inn mótmælabréf við hækkun lífeyriskostnaðar starfsmanna ESB

Lekið hefur út mótmælabréf átta aðildarríkja ESB sem mótmæla harðlega auknum fjárálögum vegna hærri krafna ESB um lífeyrisgreiðslur til starfsmanna sambandsins. Samkvæmt bréfinu er áætlaður heildarkostnaður vegna lokalauna starfsmanna, sem fara á eftirlaun ESB 2045, um 2 miljörðum enskra punda.

Það þýðir, að t.d. Bretar verða að borga um 270 miljónir punda aukalega í gjald til ESB til að búrókratar geti hætt störfum og farið á eftirlaun við 63 ára aldur á meðallárslaunum upp á 57,000 pund.

Frá þessu skýra Express og Telegraph í Bretlandi. 

Löndin átta eru Bretland, Þýzkaland, Frakkland, Austurríki, Danmörk, Holland, Finnland og Svíþjóð. Þau lýsa yfir áhyggjum af ört hækkandi kostnaði vegna kjara starfsmanna ESB, sem geta hætt störfum 63 ára gamlir á 70% launum. Togstreita ríkjanna átta, sem eru aðal fjárveitendur sambandsins, stafar einnig af því, að ESB krefst sífellt hærri fjárlaga og meiri peninga frá aðildarríkjunum t.d. með því að auka fjárlög ESB frá 45 miljörðum enskra punda upp í 57 miljarða enskra punda á ári milli 2014 og 2020.

Framkvæmdastjórnin svarar ekki bréfinu og bendir á, að hún verði að fá bréf undirritað af öllum 27 ríkjunum til að taka kvartanirnar til greina.

Fyrir nokkru var haldinn fundur í Stokkhólmi, þar sem vinnualdur var til umræðu og tók Jóhanna Sigurðardóttir forsætisráðherra Íslands þátt í honum. Á blaðamannafundi eftir fundinn sögðu ráðherrar á fundinum að vegna efnahagsástandsins yrði fólk að vinna lengur en áður, til 67 ára aldurs eða jafnvel lengur. Þá sagði Jóhanna Sigurðardóttir að það væri ekkert mál að vinna til sjötugs.

Greinilega er framkvæmdastjórn ESB ósammála./gs 

Minna en helmingur 55-64 ára í vinnu

Ríkisstjórn Undralands í Undralandi

Enn á ný staðfesta kannanir staðfastann vilja mikils meirihluta þjóðarinnar um að betra sé að gera aðra hluti en halda aðlögunarferlinu til streitu. Í næstum öllum skoðanakönnum um forgangsröðun hefur meirihluti landsmanna talið endurreisn atvinnumála og úrlausn efnahagsmála vera mikilvægari verkefni en aðildarbrölt að ESB eða stjórnarskrárbreytingar (að ekki sé nú talað um að afnema núgildandi stjórnarskrá).

Að auki er þróun ESB í alræðisríki án lýðræðis fyrir venjulegt fólk né heilu þjóðirnar öll svo hrikaleg með rísandi öldu almennings í mörgum aðildarríkjunum gegn ESB, að mörgum Íslendingum ofbýður. Við erum lítil friðsöm þjóð, sem verðum að neftóbaki í valdamaskínu ESB, sem hefur tröllvaxið síðustu árin og er stjórnað af búrókrötum í Brussel og óreiðufólki í fjármálafyrirtækjum með aðkomu Alþjóða Gjaldeyrissjóðsins. Þetta Þríeyki hefur þegar hneppt heilu þjóðirnar í áratuga skuldafjötra og sér ekki enn fyrir endann á þeim ljóta leik.

Veruleikafirring íslensku ríkisstjórnarinnar bæði hjá Samfylkingu og Vinstri Grænum er þess vegna mikil. Jafnvel svo mikil, að Lísa mundi spyrja sig hvenær hún gæti vaknað aftur í veruleika sínum: Undralandi. Ef landsmenn gætu verið jafn heppnir og Lísa.

Ríkisstjórnin, sem kennir sig við allt fagurt á prenti og talmáli er ekkert annað en vesæll þjófur, sem í skrifandi stund reynir að stela fjallkonunni frá landsmönnum. Kosið verður um ráðgefandi tillögu að landráði á laugardaginn, sem afnemur mörg af þeim réttindum, sem núverandi stjórnarskrá tryggir landsmönnum. T.d. réttinn að breyta stjórnarskránni.

Fólskan ríður ekki við einteyming. Vonandi tekst Íslendingum að losa sig við þessa furðulegustu ríkisstjórn allra tíma og fjölmiðlar Undralands brátt að vakna upp af svefnlyfjum hennar.

Þegar upp er staðið, þá eiga Íslendingar sig sjálfir þótt andlausir, feigir embættismenn reyni að selja út landið í von um betri stöður í Brussel. /gs

 

Hlé verði gert á ESB-viðræðum

"Fallbyssan" talar - fólkið þegi

Ríkisstjórnin ætlar að skjóta landsmenn í kaf með "nýrri stjórnarskrá", hvað sem tautar og raular.

Búið er að hlaða byssuna til að skjóta niður gömlu stjórnarskrána, sem sýnt hefur og sannað kosti sína í verstu efnahagsþrengingum lýðveldistímabilsins. Lögfræðingahópur fenginn til að skjóta niður öll mótmæli.

Skiptir engu máli hversu margir kjósa né hvað landsmenn segja. Allt verður að fóðri í byssukjaftinum til að valta yfir landsmenn. Alþingi fær ekki að ræða efnislega um málið svo þeir þingmenn, sem standa við loforð sitt að vernda stjórnarskrá lýðveldisins fái ekki að tala.

Í þágu ESB. Ríkisstjórnin er á síðustu metrunum að koma sér á Brusselspenann og fá flotta titla fyrir uppgjafa ráðherra, sem enginn vill ráða aftur í starf embættismanna á Íslandi.

Ólöglegt stjórnarráð með kvittun frá Hæstarétti um að þeir hafa ekki löglegt umboð almennings ætlar að afnema góðu stjórnarskrána okkar. Kjósa á um málið á ólöglegum degi, sem Alþingi hefur ekki valið.

Upplásnir hrokagikkir menntaklíku 101 Reykjavík ætla að:

1. Afnema stjórnarská lýðveldisins frá 1944

2. Afnema kristni sem opinbera trú á Íslandi

3. Afnema jafnvægi milli landsbyggðar og þéttbýlis

4. Afnema rétt þjóðarinnar að greiða þjóðaratkvæði um fjárlög, fjáraukalög, þjóðréttarskuldbindingar, skatta og ríkisborgarrétt

5. Afnema vald landsmanna við breytingar á stjórnarskrá

6. Innleiða ríkiseign á auðlindum þjóðarinnar

7. Innleiða völd til þingmanna að afsala ríkisvaldinu til erlendra ríkja

Þetta er hin hliðin á Icesave og makríldeilunni. Þetta er landráðasamningur svo ESB geti komist yfir sjávarauðlind Íslendinga og utanríkissamninga landsmanna.

Vonandi rísa landsmenn upp og senda þessa hrákasmíði beinustu leiðina í ruslafötuna!

SEGJUM ÖLL NEI! 

Gústaf Adolf Skúlason

Álit á tillögum stjórnlagaráðs

Spillingin í styrkjakerfi ESB er algjör

Fréttin um kaup ESB á fiski til að "hækka" verð til neytenda gengur þvert á "stefnu" sambandsins um jafna samkeppnisaðstöðu. Með því að nota fé skattgreiðenda til að kaupa fisk til að farga á ruslahaugunum er ESB að grípa beint inn í markaðslögmál framboðs og eftirspurnar og setja frjálsa samkeppni úr leik.

Það er með eindæmum, að þetta skuli viðgangast. En við nánari athugun á styrkjum ESB þarf enginn lengur að vera hissa á þeirri ógeðfelldu spillingu, sem nærist með miðstýringavaldi búrókratanna í Brussel.

Á vefsíðu FISHSUBSIDY.ORG koma margar miður fagrar staðreyndir fram í dagsljósið. Meðal annars, hvernig ESB greiðir styrki til útgerða til að vinna að endurbótum skipa á sama tíma og ESB veitir styrki til sömu útgerða til að stykkja niður sömu skip og verið er að endurbæta og selja í brotajárn eða eldivið!

Hér er listi yfir sjávarútvegsstyrki ESB til aðildarríkja, smellið á löndin til að sjá hafnir, útgerðir og skip:

http://fishsubsidy.org/countries/

Gegnum árin verða styrkirnir að óheyrilega háum upphæðum, sem skipta miljörðum evra úr vasa almennra skattgreiðenda aðildarríkjanna. Ekki er furða þótt lönd eins og Frakkland, Spánn og Portúgal neita að breyta fiskveiðistefnu ESB, þegar sjávarútvegur landanna nærist að miklum hluta af styrkjum frá Brussel. Styrkjakerfið hefur skapað þvílíka óreiðu í peningamálum, þar sem almannafé er sólundað í hverja vitleysuna á fætur annarri og lögmál markaðarins eru algjörlega sniðgengin. Ekki er hægt fyrir Íslendinga að keppa við þetta bákn og ættu menn að fara að hugsa sinn gang og leita annarra miða um samstarfsaðila en gjörspillt ofurvald Brusselklíkunnar.

Tilvitnun Evrópuþingmannsins Christofer Fjellner frá Svíþjóð í Maríu Damanaki um að

"allt að 91% af fiskistofnum ESB hrynur innan áratugar ef ekkert róttækt gerist!"

útskýrir, hvers vegna ESB ásælist svo sterkt að komast inn á íslensku fiskimiðin til að ryksuga þann fisk, sem þar er. Það róttæka, sem Maria Damanaki vill að gerist er, að Ísland gangi með í ESB, svo hún geti deilt kvótum Íslandsmiða til franskra, spánskra, portúgalskra og allra annarra togara ESB á meðan fiskistofnarnir endast.

Íslendingar eiga að slá hnefanum í borðið í makríldeilunni og senda ESB tilbaka heim með heimalexíuna að fara að taka til í eigin húsi, áður en þeir fari að gera kröfur til annarra.

Íslendingar mega undir engum kringumstæðum semja við ESB með allan sinn flota að hleypa aðildarríkjum sambandsins í fiskveiðilögsögu Íslands. Endalok íslensks sjávarútvegs yrðu þá á næsta leyti. /gs

Kaupa fisk til að kasta

ESB kaupir fisk fyrir almannafé og eyðileggur til að halda uppi hærra verði til neytendans!

Sænski Evrópuþingmaðurinn Christoffer Fjellner er yfir sig hneykslaður á fiskistefnu Evrópusambandsins, sem notar peninga skattgreiðenda til að kaupa fisk fyrir ruslahaugana til að halda uppi fiskverði til neytenda. Hann hafði heyrt um þetta og bað rannsóknarstofu Evrópuþingsins að athuga málið. Í grein í Sænska Dagblaðinu 10. okt. skrifar Christoffer Fjellner: "Ég fékk sjokk. Bara árið 2009 voru yfir 17 000 tonn af ferskum fiski eyðilagt og af þeim voru 34 tonn í Svíþjóð. 2009 var ekkert sérstakt ár, 2008-2010 voru yfir 40 000 tonn af ferskum fiski eyðilagt í Evrópu. Í Svíþjóð var það ýsa, makríll, rauðspetta og rækjur. Ekkert bendir til þess, að ástandið fari batnandi, þvert á móti."

Christoffer finnst það sjúkt, að skattpeningar séu notaðir til að kaupa ferskan fisk og eyðileggja og meinar að þörfin á nýrri fiskistefnu sé bráðaðkallandi: "Við eigum ekki að fiska meira en hafið þolir og þann fisk, sem við fáum upp eigum við að borða en ekki kasta burt dauðum í hafið eða brenna. Nýjar rannsóknir sýna, að fiskistofnar Evrópu hafa minnkað það mikið, að þeir eru minna en 10% af stærð sinni eftir seinni heimsstyrjöldina. Sjávarútvegsráðherra Svíþjóðar Damanaki hefur varað við því að allt að 91% af fiskistofnum Evrópusambandsins geti hrunið innan 10 ára nema einver stjórkostleg breyting eigi sér stað."

Christoffer Fjellner leggur til þrjár mikilvægar aðgerðir til að laga fiskistefnuna:

1. ESB verður tafarlaust að hætta styrkveitingum til launa, verðlags og olíu í sjávarútvegi.

2. Bann við brottkasti til að koma í veg fyrir allt að 80% aflans sé hent dauðum til baka í hafið.

3. Afnám sjúks verðlagskerfis, sem þvingar skattgreiðendur að borga fyrir að henda fínum fisk á ruslahaugana til þess að hækka verð til neytenda.

Gústaf Adolf Skúlason

Vefurinn fishsubsidy.org birtir upplýsingar um styrki ESB til sjávarútvegs ásamt auglýsingamynd samtakanna um stöðvun styrkveitinga ESB til sjávarútvegs innan ESB, sjá hér fyrir neðan.

 

 

Átök á hörpuskelsmiðum í Ermarsundi

Friðsama Sviss eykur vígbúnað vegna aukins óróleika í Evrópu

Þrátt fyrir að vera friðsöm og sjálfstæð, óháð þjóð, þá eru Svisslendingar að bæta við fjórum herdeildum, sem staðsettar verða víðsvegar um landið til aukins öryggis vegna vaxandi óróleika í Evrópu. Nýjasta heræfing svissneska hersins í september, kölluð Stabilo due, var framkvæmd til að þjálfa hermenn í vörnum landsins, ef stöðuleiki innan ESB færi úr böndunum. Það síðasta, sem Svisslendingar vilja, er að vandamál ESB, steypist yfir litla friðsama landið þeirra.

John R. Schindler prófessor í öryggismálum USA skrifaði nýlega grein á vef sinn The xxcommittee og varar við að slökun hermála eftir fall kommúnismans geti komið sér það illa, að lönd ESB geti átt í erfiðleikum með að halda uppi almennri löggæslu ef kreppan fer á versta veg. Hann segir, að staðsetning nýrra herdeilda í Sviss sýni, að Svisslendingar undirbúi sig fyrir almennan óróleika, vegna kreppunnar í ESB.

Almennt mun vera álitið innan öryggismála í ESB, að ef næsti Anders Breivik mundi ráðast á múslíma í stað venjulegra evrópubúa, gæti ástandið fljótt breyst í hræðilegt ástand. Það er erfitt að sjá, hvernig her minni landa gæti ráðið við almennan borgaralegan óróleika.

"Og biðjið ekki Frænda Sam um aðstoð, þar sem það síðasta sem Pentagon vill, er að dragast inn í uppþot og götubardaga - sérstaklega til að kveða niður uppreisnir múslíma - hvar sem er í Evrópu."

Evruvandi eykur óstöðugleika

Evran er ávísun á stríð

Grikkland er að niðurlotum komið. Ríkið á ekki fyrir útborgun launa eða lífeyris næsta mánuð. Hlutverk stjórnmálamanna í Grikklandi hefur vegna ESB-aðildar og evru verið breytt í hlutverk betlara í skúmaskoti evrusvæðisins. Sama gildir reyndar um flesta stjórnmálamenn ESB. Eigin ríkisstjórn er heimastjórn ESB og vald þjóðþinga í fríu falli. Framkvæmdastjórnin er að gera aðildarríki ESB algjörlega háð sér um leyfa- og peningaúthlutun. Eins og miðstjórn Kommúnistaflokks Sovétríkjanna á valdatíma kommúnismans.

Það kemur að því, að fólk segir hingað og ekki lengra. Hversu miklar fórnir amenningur þarf að færa til að vinda ofan af tilrauninni með Bandaríki Evrópu og evruna er undir valdamönnum ESB og fjármagnseigendum komið. Hingað til hefur engin miskun verið sýnd.

Aftenposten í Noregi birti í gær sína skoðun á ástandinu:

SPÁNN: Búið er að setja hengilása á ruslagáma með matarafgöngum eftir að fátækir leituðu að mat í ruslinu. Bankana vantar 500 miljarða norskra króna til að rétta af rotin húsnæðislán. Hækkun virðisaukaskatts boðaður ásamt 12 % niðurskurði í velferð þegnanna. Stórar mótmælagöngur hafa lamað fleiri borgir. Landið íhugar alvarlega að biðja um neyðarlán frá ESB.

STÓRABRETLAND: Aukinn niðurskurður boðaður. 70 þúsund færri kennarar, 10 þúsund færri lögreglumenn, 30 þúsund færri hermenn. Minnka á gjöldin tilsvarandi 140 miljörðum norskra króna.

ÍTALÍA: Á Sikiley eru látnir ekki grafnir. Heilu héruðin eru á leiðinni í gjaldþrot. Ítalía er með ríkisskuld ca 16 þús miljarði norskra króna. Eða: 1.958 triljónir evra. Um 180 miljarða norskra króna niðurskurður í fjármálum margra ítalskra rannsóknarstofnana boðaður. M.a. lækkar fjármagn um 20% til Large Hadron Collider í Cern í Sviss. Virðisaukaskattur hækkar.

GRIKKLAND: Umfangsmikill niðurskurður, þjóðfélagslegur óróleiki og neyð, stóraukin útbreiðsla fátæktar. Ríkiskassinn að tæmast og yfirvöld geta ekki borgað laun, því ESB hefur enn ekki gefið grænt á næstu útborgun 240 miljarða evra. Forsætisráðherrann Antonis Samaras vill skera niður 11,5 miljarði evra aukalega. Um 90 miljarði norskra króna.

NOREGUR: Noregur er öðruvísilandið. Land sem er með 3730 miljarða norskra króna á bankabókinni eða um 3,7 sinnum árleg fjárlög norska ríkisins. Atvinnuleysið minnkar og er núna aðeins um 2,4%. Í stað niðurskurðar er rætt um nýjar miljarðafjárfestingar t.d. í fleiri barnaheimilum. /gs.

Grikkir komnir að þolmörkum

Fredrik Reinfeldt velur íslensku leiðina: engar greiðslur frá sænskum skattgreiðendum til ósjálfbjarga evrubanka

Fredrik Reinfeldt forsætisráðherra Svíþjóðar var í boði Francois Hollande forseta Frakklands í opinberri heimsókn í Frakklandi mánudaginn 1. október.

Í ræðu Frakklandsforseta, Francois Hollande, kom fram, að Svíþjóð er fyrirmynd annarra ríkja Evrópusambandsins í baráttunni við kreppuna, vegna aukinna atvinnuskapandi fjárfestinga í samgöngumálum m.a. á vegum og járnbrautarleiðum. 

Nýlega lagði ríkisstjórn Fredrik Reinfeldts fram fjárlög, þar sem gert er ráð fyrir að auka hæfni fyrirtækja til að mæta harðnandi samkeppni vegna kreppunnar með því að lækka skatta fyrirtækja úr 26,3 % niður í 22 %. Samtímis eru vinnuskapandi fjárfestingar stórauknar sér í lagi fyrir atvinnulaus ungmenni.

Ríkisstjórn Fredriks Reinfeldts hefur lækkað ríkisskuld Svíþjóðar frá ca 80% af þjóðarframleiðslu árið 1995 niður í ca. 40% árið 2011. Samtímis þessu hafa launþegar landsins fengið miklar kjarabætur með lækkun launaskatta mótsvarandi skattfrjálsum þrettánda mánuðinum ofan á umsamin laun í fimm áföngum á jafn mörgum árum.

Það er alfarið rangt hjá talsmönnum íslensku ríkisstjórnarinnar, einkum Samfylkingarmönnum, sem halda því fram að ekkert land innan ESB geri öðru vísi en að hækka skatta og skera niður þjónustu eins og ríkisstjórn Íslands hefur gert og áætlar að gera.

Frakklandsforseti Francois Hollande hrósaði Svíþjóð mjög í ræðu sinni en vegna andstöðu Svíþjóðar við myndun bankabandalags og greiðslum úr ríkissjóði til styrktar ósjálfbjarga bönkum á evrusvæðinu, vonaðist Hollande engu að síður, "að Svíþjóð myndi breyta afstöðu sinni og taka þátt björgunaraðgerðum ESB."

Fredrik Reinfeldt sagði í viðtali við sænska sjónvarpið að kvöldi mánudags 1. október, að "Svíþjóð muni ekki nota fé skattreiðenda til að borga ósjálfbjarga bönkum á evrusvæðinu." Hann sagði einnig,  "að Svíþjóð væri ekki hlynnt myndun bankabandalags." /gs