Þrátt fyrir barlóm og ósjálfstæði vinstri flokka er tryggur meirihluti gegn "ESB-aðild"

Aðildin sú er í raun hægfara innlimun í stórveldi (þ.m.t. sem herveldi). Merkilegt að vinstri menn séu hlynntir slíku, en það sýnir ný Capacent-könnun og hitt þó umfram allt, að meirihluti þjóðarinnar hafnar Evrópusambands-"aðild", þ.e. 54,7%, en 45,3% að þeir myndu styðja hana. 

• Greint var frá niður­stöðum skoðana­könn­un­ar­inn­ar á aðal­fundi Já Ísland sem fram fór í dag. Sam­kvæmt henni er meiri­hluti kjós­enda Fram­sókn­ar­flokks­ins (92%) og Sjálf­stæðis­flokks­ins (83%) and­víg­ur aðild að ESB en meiri­hluti kjós­enda Sam­fylk­ing­ar­inn­ar (89%), Bjartr­ar framtíðar (81%), Vinstri­hreyf­ing­ar­inn­ar - græns fram­boðs (55%) og Pírata (55%) hlynnt­ir henni. (Mbl.is)

Þetta eru merkilega skýrar línur milli mið- og hægri flokka annars vegar og vinstri flokka hins vegar. Þó eru greinilegar vomur á VG-fólki og Pírötum, því að enn eru þar ýmsir sem óttast erlenda auðhringa. Hitt hefur samt fylgt vinstri flokkum lengi að (1) hafa aðhyllzt útópíur, og það á við um ýmsa gamla VG-harðjaxla, sem trúðu í lengstu lög á sovézka "óskalandið", "verkalýðsríkið" sem reyndist spillt og grimmt niður í rót og í flestum sínum útöngum, auk þess að stunda blóðuga útþenslustefnu, oft undir fölsku yfirvarpi stuðnings við þjóðfrelsishreyfingar (!), og (2) að hafa fælzt allt, sem amerískt er, á svo afgerandi hátt, að "Evrópa" (með sín gömlu og grimmu nýlenduveldi!) fór að líta út eins og himnasending í stjörfum augum þeirra í staðinn.

Forsjárhyggjan, sem löngum tröllríður vinstri flokkum, sbr. skatta- og eyðslustefnu þeirra, bætir hér ekki úr skák, og fylgir þessu pólitíska liði einnig hvað varðar umhugsun þeirra um stöðu Íslands meðal annarra landa, því að Samfylkingarmenn sérstaklega virðast hafa tröllatrú á því, að forsjá Evrópusambandsins með okkar efnahag og löggjöf, dóms- og framkvæmdavaldi sé önnur og betri "lausn" en sú leið sem Jón Sigurðsson og aðrir baráttumenn fyrir sjálfstæði Íslands mörkuðu á 19. og 20. öld. Engu virðist það skipta þessa draumhuga Samfylkingar og "Bjartrar framtíðar", að spilling hefur grafið svo um sig í þessu óska-stórveldi þeirra, sjálfri Stóru-Mömmu á meginlandinu, að ekki þolir lengur dagsins ljós, og endurskoðendur hafa því ekki treyst sér til að votta endurskoðun reikninga þessa Brussel-bandalags í 14 ár samfleytt.

Svo tala menn um að "ganga í" þetta valdfreka bákn, af því að HÉR ríki spilling! - og það jafnvel haft á orði um dómstóla okkar, eins og ýmsir barlóms- og niðrunarpennar eru sérstaklega farnir að tíðka upp á síðkastið. En hver var það annar en sjálfur ESB-dómstóllinn sem tók þátt í því, með sínum fulltrúa í ómarktækum "gerðardómi" um Icesave-málið haustið 2008, að dæma ríkissjóð Íslands greiðsluskyldan að fullu um allar Icesave-kröfur Bretlands og Hollands?! Og hverjar stofnanir ESB tóku einnig þátt í þessu dóms(m)orði gerðardómsins aðrar en sjálf framkvæmdastjórn Evrópusambandsins (e.k. yfirríkisstjórn þess) og Seðlabanki Evrópu?!

Og þessum stofnunum, eins og öðrum í Evrópusambandinu, eiga menn nú að treysta! 

Þetta síðastnefnda hefur lengi verið leynd og ljós stefna Fréttablaðsins, en þakkarvert, að Eygló Harðardóttir félagsmálaráðherra hefur kallað eftir því, að það blað gefi út skýra yfirlýsingu um að það sé með inngöngu í Evrópusambandið sem grundvallarstefnu sína, með öðrum orðum að það sé ESB-málgagn. En brestur ekki útgefendur blaðsins þor til að játa það fullum fetum, að það vill inntöku landsins í stórveldi og þar með beita sér gegn vilja meirihluta þjóðariunnar og svíkja Lýðveldið Ísland?

Jón Valur Jensson. 

Meirihluti andvígur aðild að ESB

Fjórfalt fleiri Norðmenn andvígir ESB-inngöngu en þeir sem sækjast eftir henni

Miðað við þá, sem afstöðu tóku í nýrr­i skoðana­könn­un Sentios fyrir dag­blöðin Nati­on­en og Klassekam­pen, eru NEI-sinnar 79,8% Norðmanna, en já-sinnar aðeins 20,2%, og eru NEI-sinnar þannig 3,96 sinnum fleiri en jásinnar.

• Sam­kvæmt skoðana­könn­un­inni eru 70,5% Norðmanna and­víg aðild að ESB en 17,8% henni hlynnt. Meiri­hluti kjós­enda allra stjórn­mála­flokka í Nor­egi er á móti aðild, þar með taldir kjós­end­ur Hægri­flokks­ins sem er hlynnt­ast­ur inn­göngu í sam­bandið. 29,9% kjós­enda flokks­ins styðja aðild að ESB en 60% eru hins veg­ar á móti henni. 
• Mest andstaða er á meðal kjós­enda norska Miðflokks­ins en ein­ung­is 4,1% þeirra styður aðild að ESB. Mest­ur stuðning­ur er hins veg­ar á meðal kjós­enda Ven­stre en fjór­ir af hverj­um tíu kjós­end­um hans styðja aðild. (Mbl.is)

Ánægjuleg tíðindi af staðfestu norsku þjóðarinnar, ekki satt? Og sannarlega var gaman að heyra í hinum söngelska sjálfstæðissinna í Vestur-Íslendinga-þættinum í Sjónvarpinu í kvöld. Hann komst vandræðalaust í gegnum Öxar við ána – nokkuð sem ýmsir ungir menn á Reykjavíkurmalbikinu eiga orðið erfitt með fyrir sakir alls þess sem truflar athyglina og sýndarmennskunnar á mammonsvegum sem blekkir marga.

Jón Valur Jensson.

Meirihluti áfram gegn ESB-aðild

Öfugsnúinn áróður Fréttablaðsins

Reynið ekki, Fréttablaðs- og ESB-menn, að láta sem þið viljið efla fullveldisréttindi Íslands. Grein Jónu Sólveigar Elínardóttur í Frbl. í dag er dæmigerð um rangtúlkun þeirra. Hvergi er þar vikið að þeim áhrifum sem íslenzk yfirvöld geta haft á gerð EES-reglna, t.d. fengið vökulögum bílstjóra breytt eftir á, og fyrir fram er einnig hægt að hafa áhrif á gerð þeirra, bæði í ráðuneytunum, í nefnd Íslendinga, Norðmanna og Liechtensteina og í Alþingi. Allt um það líta margir á EES-samninginn sem þungan bagga á okkur, og hvar er sönnunin, töluleg, fyrir gagnsemi hans?

En Fréttablaðsmenn stefna markvisst að innlimun Íslands í ESB, það sama á við um þennan nýja skriffinn blaðsins, eins og sést á ráðleggingunum í grein hennar þar í dag. Þar hefðum við svo 0,06% áhrif í ráðherraráðinu til ákvarðana um ráðandi löggjöf, sem rutt getur hvaða íslenzkum lagaákvæðum sem er úr vegi, ef þau rekast á einhver atriði í lagaverki Evrópusambandsins!

Jón Valur Jensson. 

Bjarni Benediktsson, þú verður ekki látinn í friði, fyrr en þú gerir skyldu þína!

Sjálfstæðisflokkurinn er ekki ennþá (15 mánuðum eftir heitstrengingu landsfundar 2013) búinn að loka "Evrópustofu". Hvað veldur þínu seinlæti, Bjarni Benediktsson? Hefurðu bitið það í þig að óvirða vilja flokksmanna þinna? Skipta Samfylkingaratkvæðin meira máli? Dettur þér í alvöru í hug, að þau falli þér og þínum í skaut? Hve langt ætlarðu að ganga í meðvirkninni? Eða ertu að vinna fyrir einhverja allt aðra hagsmuni en þinna landsmanna og flokksmanna?

Hér skal vísað á fyrri, rökstudda grein um þetta grundvallarmál: 

Hvenær ætlar Sjálfstæðisflokkurinn að efna sitt kosningaloforð að loka "Evrópustofu"?

Jón Valur Jensson.

Hvenær ætlar Sjálfstæðisflokkurinn að efna sitt kosningaloforð að loka "Evrópustofu"?

Stendur kannski til að leyfa henni fyrst að eyða 433 milljónum í sinn áróður?!!!*

Takið eftir, að formaður flokksins, Bjarni Benediktsson, var hvergi með nein sviksamleg ummæli fyrir eða eftir kosningarnar 2013 um að EKKI ætti að loka "Evrópustofu".

Þetta er stefna flokksins, samþykkt á landsfundi 21.-24. febr. 2013 (leturbr. hér):

• Landsfundur telur að hagsmunum Íslands sé betur borgið með því að standa fyrir utan Evrópusambandið.
• Áréttað er að aðildarviðræðum við ESB verði hætt og þær ekki teknar upp aftur nema að undangenginni þjóðaratkvæðagreiðslu.
• Landsfundurinn mótmælir íhlutun sendiherra Evrópusambandsins á Íslandi í stjórnmálaumræðu þjóðarinnar og telur óhæfu að stækkunardeild ESB haldi úti starfsemi hér þar sem lagst er á sveif með einu stjórnmálaafli gegn öðrum.  Evrópusambandinu verði gert að loka kynningarskrifstofu þess hér. 

Síðan eru liðnir nær 15 mánuðir. Hvað líður efndunum? 

Loks skal minnt á þetta, sem birtist hér í grein fyrir tæpum 13 mánuðum: 

• Að lokum skulum við minnast þess, að stuðningur stjórnarsinna við 230 milljóna áróðursapparatið Evrópu[sambands]stofu virðist skýrt brot á 88. gr. landráðalaganna.
• Athafnasemi Evrópusambandsins í áróðursmálum á trúlega eftir að stóraukast : mest orkan sett í lokabaráttuna, þegar dregið gæti að hugsanlegri þjóðaratkvæðagreiðslu. En jafnvel þegar á liðnu ári voru réttarbrot ESB-manna í þessu efni orðin svo augljós og ófyrirleitin, að íslenzkur fyrrverandi sendiherra, Tómas Ingi Olrich, sá sig knúinn til þess að rita um það blaðagreinar til að afhjúpa, hvernig bæði "Evrópustofa" og framferði ESB-sendiherrans Timos Summa braut í bága við alþjóðlegar skyldur sendiráða samkvæmt bæði íslenzkum lögum og Vínarsáttmálanum. Sjá hér greinar hans: Summa diplómatískra lasta (eitilsnjöll grein í Mbl. 2. apr. 2012), sbr. pistil á þessu vefsetri: Lögleysu-athæfi sendiherra. 

* Sjá frétt hér: http://www.mbl.is/greinasafn/grein/1503834/ – þar segir m.a.: "Evrópusambandið hefur styrkt Evrópustofu um 2,1 milljón evra, sem svarar 325 milljónum króna á núverandi gengi, á tímabilinu 2011 til 2014. Til skoðunar er að framlengja samninginn til 2015 og gæti viðbótarfjárhæð vegna þess numið um 108 milljónum." – Samtals yrðu þetta 433 milljónir árin 2011–2015 !!! Það eru einungis hnjáliðaveiku flokkarnir, sem þora ekki að stöðva þessa ósvinnu –– flokkar sem eiga enga virðingu skilda fyrir hugleysi sitt. En sjálfstæðismenn hafa enn tíma til að ÞRÝSTA Á sína forystusveit að bregðast ekki flokksmönnum einu sinni enn með svikum við ofangreinda landsfundarsamþykkt.

Jón Valur Jensson. 

Rekið af ykkur slyðruorðið, stjórnarþingmenn!

Gunnar Bragi Sveinsson hljómar eins og hann sé ekki nógu sterkur á svellinu í ESB-málinu, þrátt fyrir á köflum augljósan vilja hans til að fá þingsályktunartillögu sína samþykkta um að draga Össurarumsóknina til baka. 

Við eigum öll, fullveldis- og sjálfstæðissinnar, og einkum þeir, sem eru í samstarfsflokki Gunnars Braga, Sjálfstæðisflokknum, að styðja við bakið á sérhverri viðleitni til að efnd verði kosningaloforð stjórnarflokkanna um "að aðildarviðæðum við ESB verði hætt og þær ekki teknar upp aftur nema að undangenginni þjóðaratkvæðagreiðslu," svo að vitnað sé til ályktunar landsfundar Sjálfstæðisflokks 24. febrúar 2013.

Gunnar Bragi á ekki að þurfa að upplifa sig sem einangraðan í þessu máli. Þetta er vilji stjórnarflokkanna beggja, og enn er meirihluti þjóðarinnar andvígur því að fara inn í Evrópusambandið þrátt fyrir sleitulausan og þjóðar-sundrandi áróður ESB-aflanna og það á sama tíma og æ meira hefur komið í ljós um viðamikla ágalla á stefnu og verkum þess stórveldabandalags.

Jón Valur Jensson. 

Ný ESB-tillaga kemur til greina

ESB-Guðmundi Steingrímssyni verður ekki að ósk sinni

Guðmundur Steingrímsson er glaðhlakkalegur yfir því, að Samfylkingu, 365 fjölmiðlum, ESB-hlynntu peningavaldi, hræsnandi VG-mönnum og vinnusvikurum á RÚV tókst að teppa tillögu utanríkisráðherrans, og sýnir þar sitt ESB-andlit.

"Þá eru viðræðurn­ar ekki eyðilagðar og þá er sá ávinn­ing­ur sem hef­ur hlot­ist af viðræðunum og allt þetta starf sem hef­ur farið fram í viðræðunum, ekki unnið fyr­ir gýg. Það er mjög mik­il­vægt. Þá er þess­um dyr­um haldið opn­um og það held ég að sé eitt­hvað sem menn geta þá sætt sig við, á meðan póli­tíska lands­lagið er svona, að það er rík­is­stjórn í land­inu sem vill ekki fara í viðræður við ESB,“ seg­ir Guðmund­ur.

En þetta er ekki spurning um það, hvort dyr geti verið opnar eftir mörg ár, því að vitaskuld geta Samfylkingarmenn og ESB-fylkingin öll reynt að opna þær dyr á ný og ganga inn í viðlíka viðræðugrunn, eða eru þeir kannski að lýsa yfir vangetu sinni til þess fyrir fram?!

En að Silfurskeiðar-Guðmundur þessi, sem stakk af frá stefnu föður síns eftir kynnin af ennþá flottara lífi í Brussel, skuli í alvöru hafa trú á því, að Bjarni Benediktsson og Sigmundur Davíð Gunnlaugsson eigi eftir að gera ESB-áhangendum það til geðs að halda lífi í Össurar-umsókninni (sem jafnvel fól í sér stjórnarskrárbrot), það má virðast lygilegt, því að áframhaldandi seta Bjarna á formannsstóli er undir því komin, að hann verði hættur að vinna á móti vilja og stefnu landsfundar í ESB-málum, næst þegar sú æðsta valdasamkunda flokksins kemur saman, og ekki er ESB-andstaðan linari í Framsóknarflokknum.

Það er ekki spurning hvort, heldur hvenær þingflokkar þessara flokka nota valdið, sem þeim hefur verið falið, til að þurrka þetta óhreinindamál af höndum sínum, mál sem þeir tóku engan þátt í að búa til og hafa enga lyst á að flekka hendur sínar á.

Já, nú er að fylgja eftir sannfæringu sinni, Bjarni og Sigmundur!

Jón Valur Jensson.

ESB-dyrunum haldið opnum

Eitthvað fyrir ráðvillta að læra af

Norðmenn hafa tvívegis "kíkt í pakkann" með mikilli fyrirhöfn, þekkja hann betur en við, en 70% þeirra vilja ekki í ESB, aðeins 20% vilja inn! Og aðeins 32% íbúa ríkja Evr­ópu­sam­bands­ins bera traust til sam­bands­ins skv. nýrri skoðana­könn­un sem gerð var á veg­um þess sjálfs, en 59% treysta Evr­ópu­sam­band­inu ekki. Glæsilegt, ekki satt? Þetta er þó fólkið sem hefur beina reynslu af þessu stórveldabákni.

• Mest van­traust er í garð Evr­ópu­sam­bands­ins á Kýp­ur (74%), í Portúgal (70%), á Ítal­íu (69%) á Spáni (67%) og í Bretlandi (66%). Mest traust á sam­band­inu er í Eistlandi og Rúm­en­íu (58%), Finn­landi (50%) og Belg­íu og Möltu (49%).
• Þegar hins veg­ar spurt var um af­stöðu fólks til Evr­ópu­sam­bands­ins sagðist rúm­ur þriðjung­ur, eða 34%, hafa annaðhvort mjög eða frek­ar já­kvæða af­stöðu til Evr­ópu­sam­bands­ins. Þar af 4% mjög já­kvæða. (Mbl.is)

Allmargir (þó ekki eins margir, þ.e. 26%) hafa frek­ar eða mjög nei­kvæða af­stöðu til sam­bands­ins. Þar af 6% mjög nei­kvæða, en 38% sögðust hins hvorki hafa já­kvæða né nei­kvæða af­stöðu til þess. (Mbl.is.)

Væri nú ekki ráð fyrir ráðvillta hér á landi að læra eitthvað af þessu?

Jón Valur Jensson.

Meirihlutinn ber ekki traust til ESB

Er blygðunarlaus peningaausturinn í ESB-áróður farinn að "skila árangri"?

Um sama leyti og 70% Norðmanna eru andvíg inngöngu landsins í Evr­ópu­sam­bandið og aðeins 20% fylgjandi, segjast 49,5 aðspurðra hér í MMR-könnun andvíg ESB-inngöngu, en 37,3% hlynnt henni. Hvað veldur? Fáfræði manna hér? Stöðugur ESB-áróður í ríkisfjölmiðlum árum saman? Landsölustefnan á fullu í 365 fjölmiðlum og DV? Hundruð milljóna króna sem ESB hefur fyrir ótrúlega meðvirkni og aumingjaskap ráðamanna hér komizt upp með að ausa í Evrópustofu? IPA-styrkirnir? Mútukenndu boðsferðirnar til Brussel –– eða allt þetta í senn?

Það er furðulegt, að ráðamenn uni því hér árum saman, hvernig misskipt er aðstöðu manna og samtaka til áhrifa með því að skrúfa fyrir fé til sumra, en opna allt upp á gátt til annarra! Evrópustofa mun eyða yfir hálfum milljarði í sinn áróður, verði hún ekki stöðvuð.

Þetta minnir á Icesave-málið: Ófyrirleitnu lygasamtökin Áfram Ísland! voru fjármögnuð af Samtökum fjármálafyrirtækja, SA, SI og öðrum til viðleitni sinnar að fá Icesave-svikasamningana samþykkta ...

• Sem start-gjald veittu þessi samtök Áfram-hópnum milljón krónur, hvert fyrir sig. Alls munu styrkir sem Áfram-hópurinn þáði hjá fyrirtækjum og almanna-samtökum hafa numið 20 milljónum króna. Til samanburðar fekk Samstaða þjóðar gegn Icesave um 20 þúsund krónur frá fyrirtækjum og almanna-samtökum.*

Já, þið lásuð rétt: um þúsund sinnum minna fekk Samstaða þjóðar gegn Icesave til verka sinna heldur en "Áfram Ísland!" sópaði til sín! Kom kannski eitthvað af því úr ESB-sjóðum? Engin furða, að þessi landssvikasamtök voru með rokdýrar auglýsingar í sjónvarpi og afspyrnuheimskulegar heilsíðuauglýsingar í dagblöðum!

 

En þetta er óviðunandi, þessi gersamlega ólíka vígstaða, hvað snertir peninga til verkefna (og eru þeir ekki á stundum "afl þeirra hluta sem gera skal"?) –– rétt eins og fjáraustrinum úr vösum skattborgara í pólitísku flokkana er gersamlega misskipt –– og nú langmest til Sjálfstæðisflokksins –– þess sem er svo veikur í hnjáliðunum nú um stundir!

 

Þótt með víðtækri samstöðu hafi tekizt að hrinda af okkur Icesave-svikasamninga-ásækni Evrópusambandsins, ESB-taglhnýtinganna á Íslandi, Samfylkingarinnar, Vinstri grænna, auðmannasamtaka, álitsgjafa í háskólunum og í Efstaleiti og annarra sem beittu sér gegn okkar skýru þjóðarréttindum, þá mega menn ekki gefa sér allt of glatt, að það sama takist gagnvart ásókn Evrópusambandsins í að ná Íslandi undir stjórn sína og lög. Þess vegna má enginn láta deigan síga – enginn meðvitaður má sofa á verðinum í þessari baráttu fyrir fullveldi Íslands.

 

Hér er athyglisvert að sjá þróun ESB-skoðanakannana MMR á mynd­ræn­an hátt

* Sjá hér: samstada-thjodar.blog.is/blog/samstada-thjodar/entry/1286301/ (endilega smellið á tengilinn og skoðið hvaða fólk þetta var – m.a. úr "Bjartri framtíð"!).

Jón Valur Jensson. 

37,3% vilja ganga í ESB

Svikaferli

Svikasátt er það við þá, sem enn reyna að fremja valdarán á Íslandi, að ríkisstjórnin hugsi sér að heykjast á því að hætta formlega við Össurarumsóknina um inntöku landsins í stórveldi. Ekkert mál er stærra né meira aðkallandi en að losa þjóðina undan þessu sundrungarvaldandi máli, sem keyrt var í gegn með stórfelldum kosningasvikum og stjórnarskrárbroti árið 2009.

Vitað er, að Samfylkingin þvingaði Vinstri græn til að fylgja sér í AGS-, Icesave- og ESB-málunum við stjórnarmyndun 2009, þvert gegn stefnu VG! Vinstri grænum hafði jafnvel stóraukizt fylgi í kosningunum 2009 út á það að formaðurinn uppteiknaði flokkinn sem skeleggastan allra flokka GEGN Evópusambandsumsókn. Svo var jafnvel það fylgi notað gegnum umboðs-svíkjandi kjörna þingmenn VG til að sækja um inntöku Íslands í stórveldið!

Samfylkingarforingjarnir láta sem sjálfstæðis- og framsóknarmenn hafi verið að svíkja kosningaloforð sín frá í vor (þótt landsfundur og flokksþing flokkanna hafi skýlaust viljað viðræðuslit og enga ESB-aðild), en þessir bleiku blekkjendur voru samt sjálfir meðvirkir í því (Árni Páll og Katrín Júl. sem ráðherraefni Samfylkingar 2009) að þvinga Steingrím og VG-þingflokkinn til að svíkja sín kosningaloforð með því að taka þátt í ólögmætu atferli kratanna í ESB- og Icesave-málunum.

Framið var stjórnarskrárbrot með afgreiðslu ESB-málsins 2009 og margföld brot gegn rétti Íslands og þjóðarhagsmunum í Icesave-málinu, til þókknunar ESB, sem sjálft reyndi blákalt að kúga okkur í því máli, þvert gegn eigin tilskipun frá 1994!

En nú má ætla, að hugdeigir menn í Sjálfstæðisflokki hafi hugsað sér að gefast upp fyrir þessu hræsnisfulla liði og aðdáendum Evrópusambandsins! Til hvers er þá slíkur flokkur, ef leiðtogar hans SVÍKJA LANDSFUND ÍTREKAÐ? Hvenær kemur að því, að landsfundur neyðist til að víkja slíkum leiðtogum frá að fullreyndu?

Jón Valur Jensson.

Samkomulag um þinglok