Ómótmælanleg staðreynd

Það er gott, að aðalritstjóri ESB-Fréttablaðsins viðurkenni loksins í leiðara,* að þjóðin vill ekki að lýðveldinu verði mokað inn í evrópskt stórveldi.

Rökin gegn Evrópusambandinu varða fyrst og fremst okkar eigið sjálfstæði og fullveldisréttindi, við hefðum minnst allra þjóða að græða á ESB og mestu allra hlutfallslega að tapa –– og höfum nú þegar þurft að berjast gegn ærnum og ófyrirleitnum bellibrögðum þessa stórveldabandalags gegn okkur í Icesave- og makríl-málunum og jafnvel nú síðast í vetur í kolmunna-málinu (ESB vill skerða hlutdeild okkar úr 17,63% í 4,8% í kolmunnaveiði í N-Atlantshafi á þessu ári : http://fullveldi.blog.is/blog/fullveldi/entry/1713658/ ).

* Í Frbl. í dag.

Jón Valur Jensson.

Nýjasta árás Evrópusambandsins á Ísland: gegn kolmunnaveiðum okkar!

Ekki lætur ESB sér nægja að hafa reitt hátt til höggs að Íslendingum í Icesave-málinu og gegn makríl­veiðum okkar, nú vill það skerða hlutdeild okkar úr 17,63% í 4,8% í kolmunnaveiði í N-Atlantshafi á þessu ári. En sem betur fer erum við þegar búnir að úthluta íslenzkum skipum "kol­munna­kvóta á grund­velli þess að hlut­ur okk­ar sé 17,63%, og skip­in eru byrjuð að veiða" (Mbl.is), enda er sjávarútvegsráðherra okkar ekki í ESB-Samfylkingunni.

Leitt er til þess að hugsa, að Evrópusambandið hefur vélað Fær­ey­ing­a inn í þennan þrýsting á samdrátt veiða okkar. En Færeyingar, sem næstum einir þjóða höfðu hjálpað okkur í Icesave-málinu (auk Póllands), höfðu reyndar verið sviknir af Íslendingum síðar;* eiginhagsmunaaðgerðir þeirra í kolmunnamálinu verður að skoða í ljósi þess, sem og í ljósi fyrri þjösnaskapar Brussel-manna gagnvart Færeyingum,** m.a. með þrýstingi á um löndunarbann í sjálfri Danmörku!

• Færeyingar og ESB leggja til að hlut­ur þeirra í kol­munn­an­um verði sam­tals 83,8% í stað 56,63% eins og verið hef­ur. Þar af var ESB með 30,5% heild­arkvót­ans og Fær­eyj­ar með 26,13%. Þá leggja ESB og Fær­eyj­ar til að hlut­deild Nor­egs minnki úr 25,75% í 11,4% en Rúss­ar haldi óbreytt­um hlut sín­um sem út­hafsveiðiþjóð. Þeir hafa veitt sem svar­ar um 7% af sam­an­lögðum kvóta strand­ríkj­anna. Fyrr­greind til­laga ESB og Fær­ey­inga um kvóta­skipt­ingu kol­munn­ans kom fram á strand­ríkja­fundi um veiðar á kol­munna fyr­ir árið 2015 í Clonakilty á Írlandi 21.-23. apríl. (Mbl.is)

Hér sést, að Evrópusambandið beitir sér gegn þjóðunum utan Evrópu­sambandsins, en þorir reyndar ekkert að stugga við Rússum! Samanlagt voru Íslendingar og Norðmenn með 43,38% kolmunnakvótans í fyrra, en nú vill Evrópusambandið skerða hann margfaldlega, allt niður í 16,2%, þó langmest hjá Íslendingum, 3,7-falt! Eru þeir svona tapsárir yfir því, að við viljum helzt ekkert með þá hafa?!

En var þetta kannski eins gott: að við fengjum að sjá framan í hið raunverulega stórveldi og innri hug þess gagnvart okkur? Ekki var hann félegur í Icesave-málinu!***

* Sjá þennan pistil á vef Þjóðarheiðurs - samtaka gegn Icesave: Færeyingar reyndust okkur bezt í Icesave-atgangi fjandsamlegra ríkja; skömmin er mikil þeirra ráðamanna sem standa ekki með þeim

** Hér sést fullveldi Dana í mikilvægu máli fokið út í veður og vind; Evrópusambandið hirti það -- Ennfremur: ESB vanvirðir rétt Færeyinga rétt eins og Íslendinga og hér: ESB í stríð við Ísland og Færeyjar og hér: Nýjasta árás ESB á Færeyinga fer fram úr öðrum hingað til

*** Sbr. ESB vann beinlínis gegn íslenzkri þjóð frá upphafi til enda í Icesave-atganginum - viðurkennt af áhrifamönnum hér! -- Auk þess, sem þar er rakið, 1) dæmdu fulltrúar ESB íslenzku þjóðina borgunarskylda í Icesave-málinu að kröfu Breta og Hollendinga, þ.e. í ófyrirleitnum "gerðardómi" sínum síðla hausts 2008, sbr. hér: ESB (útópía sumra!) vann harkalega gegn Íslandi í Icesave-málinu ; ennfremur 2): í loka-atlögunni tók Evrópusambandið þátt í málsókn Breta og Hollendinga gegn Íslendingum í Icesave-málinu fyrir EFTA-dómstólnum! sbr. hér: "Útilokað að láta eins og ekkert sé og halda áfram viðræðum um aðild að ríkjasambandi sem styður óréttmætan málarekstur gagnvart Íslandi" og hér: Framkvæmdastjórn Esb. er á bandi fjenda okkar í Icesave-málinu

Sjá einnig ýmsar greinar á þessu vefsetri, þar sem Færeyingar og yfirgangur Evrópusambandsins gagnvart þeim kemur við sögu:

http://blog.is/forsida/leit/?author_id=32945&query=F%E6reyingar -- einnig hér: http://blog.is/forsida/leit/?author_id=32945&query=F%E6reyjar

Jón Valur Jensson.

Vilja minnka hlut Íslands

Órúlegur sleðaháttur utanríkisráðherra við að afturkalla Össurarumsóknina ólögmætu

Eftir að leiðandi maður stærri stjórnarflokksins, Bjarni Ben., sagðist í vik­unni reikna með að afturköllunar-til­lagan kæmi fram á næstu dög­um, kemur það eins og skrattinn úr sauðarleggnum frá Gunnari Braga Sveinssyni, að til­laga hans um aft­ur­köll­un aðild­ar­um­sókn­ar að ESB "verði lögð fram eigi síðar en 26. mars nk." og svo bætt við fáránlegum fyr­ir­vara, orðrétt í þing­mála­skránni: „Til­laga til þings­álykt­un­ar um að draga til baka um­sókn um aðild að Evr­ópu­sam­band­inu, ef til kem­ur“ (!!!).

Það mætti halda, að þessum manni sé ekki sjálfrátt. Hvað í ósköpunum skýrir seinlæti hans og þær vöflur sem á honum eru? Af hverju drífur hann ekki í því strax að leggja fram tillöguna, á hann svona erfitt með að hugsa fáeinar setningar um málið og setja þær á blað, eða er hann undir stöðugri pressu frá innlimunarsinnum Samfylkingar eða hagsmunaöflum? Þarf hann ekki að fara að skýra sitt mál? Af hverju er hann aldrei tekinn á beinið í þessum efnum í Kastljósþætti – eiga þeir allir að ganga út á að hjálpa þeim aðilum, sem vilja koma okkur undir vald og fjarstýringu erlends stórveldis? Það hljóta allir að sjá það, að svona seinlæti er ekki eðlilegt, miðað líka við stefnu beggja stjórnarflokkanna.

Er utanríkisráðherrann að gera þessum fjendum íslenzks sjálfstæðis leikinn auðveldari með því að hafa nógan tíma til liðssafnaðar og þurfa ekki að berjast í vetrarveðri við sín fjarstýrðu mótmæli á Austurvelli? 

Svo er Esb-Fréttablaðið eins og fyrri daginn farið á fullt í innlimunar-baráttuna, nú í morgun með því að leggja sérstakar fyrirspurnir til sendiherra Evrópu­sambandsins hér á landi og gefa honum kost á ókeypis áróðri framan í alla í uppsláttar"frétt", jafnvel þótt sú svívirða hafi líka viðgengizt hér, að þetta stórveldi fekk mótþróalaust að komast upp með að dæla hundruðum milljóna króna í sinn áróður hér í gegnum sína rangnefndu "Evrópustofu" (hún er hvorki stofa Sviss né Úkraínu, Noregs né Rússlands, Georgíu né Azerbaidjan og að sjálfsögðu ekki "stofa" Íslands! og getur reyndar engan veginn talizt með fínni stofum hérlendis, enda er tilgangur hennar rotinn og beinist gegn okkar sjálfstæði og fullveldi og starfshættir hennar –– eins og hjá hinum finnska, fyrrv. sendiherra ESB –– í beinni andstöðu við Vínarsáttmálann um skyldur sendiráða).

Tími er til kominn fyrir Gunnar Braga Sveinsson að reka af sér slyðruorðið og sleppa sínum hræðslukenndu fyrirvörum!

Jón Valur Jensson.

ESB-tillaga lögð fram fyrir 26. mars

Fjarlægjumst ESB frekar eins og Bretar heldur en hitt

Bjarni Bene­dikts­son fjár­mála­ráðherra gefur lítið fyrir, að inn­an ESB sé "skjól og stöðug­leiki", og segir réttilega enga þörf fyrir Ísland að ganga í þetta ríkjasamband.

•   Bjarni sagðist ekki vita hvort sá stöðug­leiki sem væri til staðar inn­an sam­bands­ins væri endi­lega það sem Íslend­ing­ar sækt­ust eft­ir. Ekki væri eft­ir­sókn­ar­vert að búa við stöðnun. (Mbl.is)

Þetta kom fram í viðtali ráðherrans við bandarísku sjónvarpsstöðina CNBC í morgun. Þarna vísar ráðherrann til þess, að mikil stöðnun ríkir nú í efnahagslífi stórs hluta Evrópusambandsins.

Hvað varðar það, hvort kostir byðust innan þessa Evrópusambands, sagði Bjarni, að "Íslend­ing­ar nytu þegar helztu kosta þess að vera í ESB með aðild Íslands að innri markaði sam­bands­ins í gegn­um samn­ing­inn um Evr­ópska efna­hags­svæðið (EES). Hins veg­ar stæði þjóðin fyr­ir utan aðra hluti ESB sem hentuðu hags­mun­um henn­ar ekki líkt og sam­eig­in­lega sjáv­ar­út­vegs­stefnu sam­bands­ins."

Svo mætti reyndar fara í ýtarlega rannsókn á því, hvort Íslendingar hafi í raun nokkuð grætt á því að vera á Evrópska efnahagssvæðinu. Fortakslaust jákvætt svar við því blasir hreint ekki við. Hvor með sínum hætti gerðu dr. Hannes Jónsson sendiherra og Ragnar Arnalds, fv. fjármálaráðherra, athugun á þeim málum í bókum sínum undir lok 10. áratugar 20. aldar og fengu þar ekki út neinn heildar-ágóða Íslands af EES-samningnum (þótt vitaskuld hafi sumir grætt á honum, en þá á eftir að draga frá margvíslegan kostnað landsins). Síðan fengum við bankakreppuna undir lok næsta áratugar, og mikið af skaða okkar þá kom einmitt til af "fjórfrelsinu" á EES-svæðinu sem útrásarvíkingar hagnýttu sér til mikils tjóns fyrir land og lýð. En allt þetta lét Bjarni ógert að minnast á í sjónvarpsviðtalinu.

• Bjarni var enn­frem­ur spurður að því hvort hann teldi að ef Bret­um stæði til boða sama staða og Íslend­ing­ar hefðu gagn­vart ESB, hvort þeir myndu vilja hana. Hann svaraði því til að hon­um virt­ist þeir vera meira eða minna að óska eft­ir því sama. Vísaði hann þar til þess að bresk stjórn­völd hafa viljað end­ur­heimta vald yfir ýms­um mál­um frá sam­band­inu. (Mbl.is)

Athyglisvert! Þarna er stefna stórs hluta stjórnmálastéttar og meirihluta þjóðar í næsta stóra ríki í landsuðri frá Íslandi að hverfa frá samrunaþróuninni í hinu nýja Brussel-stórveldi og vill helzt endurheimta tapað vald sitt. Ætti sú afstaða, byggð á reynslu, ekki að segja Íslendingum sitthvað?

Jón Valur Jensson. 

Bjarni: Þurfum ekki aðild að ESB

ESB hefur allt vald yfir "reglunni um hlutfallslegan stöðugleika" fiskveiða hvers ESB-lands

"Stefán Már Stefánsson, prófessor í Evrópurétti við Háskóla Íslands, ... segir, að þar sem reglan um hlutfallslegan stöðugleika sé ekki hluti af lagalegum grundvelli Evrópusambandsins, heldur afleiddri löggjöf, þá megi taka hana upp og breyta henni hvenær sem er. Sú ákvörðun yrði alfarið í höndum Evrópusambandsins, ekki Íslendinga einna."*

 

* Sjá þessa grein: Íslendingar gætu þurft að greiða skaðabætur vegna þorskastríðanna, sem byggir á frétt í Ríkisútvarpinu 9. febrúar 2007. Fréttin er öll afar athyglisverð og langt frá því að vera úrelt, heldur kannski einmitt tímabærari lesning nú en nokkru sinni fyrr. Menn lesi hana alla, sér til upplýsingar (raunar er hún stutt), en ég tek hér upp lokaorð hennar:

• "Reglan um hlutfallslegan stöðugleika fjallar um fiskveiðiréttindi miðað við veiðireynslu þjóða en einnig um skaðabætur vegna tapaðra veiða. Stefán segir hugsanlegt að gangi Íslendingar í Evrópusambandið krefjist aðrar fiskveiðiþjóðir skaðabóta vegna tapaðra veiða þegar Íslendingar færðu út fiskveiðilögsögu sína."

(Endurbirt hér, hluti úr þessari grein JVJ: Sjávarmálastjóri Spánar: auðlindir „evrópusambandsvæddar" þegar ríki gengur í ESB.)

Bezt utan ESB

Að sjálfsögðu þjónar ekki hagsmunum Íslendinga að ganga í Evrópusambandið, eins og forsetinn segir réttilega í viðtali við St Petersburg Times. Við hefðum þar minnst allra að vinna (og alltaf í 6.000 millj.kr. nettó-mínus árlega vegna árgjaldsins til Brussel að frádregnum styrkjum frá Brussel, fyrir utan allan annan skaða af íverunni, sem engin þörf er á í þróttmiklu ríki sem hraðfara eykur þjóðartekjur sínar með ferðamannastraumi o.fl.) og mest að tapa: í fiskveiðiréttindum og almennt í mörgu öðru sem hljótast myndi af því að fá ESB í hendur æðsta löggjafarvald yfir Íslandi.

Þetta "mesta tap allra", sem félli okkur í hlut, tengist sérstaklega 1) okkar afar verðmætu fiskimiðum og jafnvel yfirráðum yfir olíuauðlindum undir Tjörnesi/Flatey á Skjálfanda og undir landgrunninu og 2) því, að allra ríkja hefðum við minnst atkvæðavægi í Evrópusambandinu. Frá 1. nóv. þ.á. kemst breytt atkvæðahlutfall í gildi í ESB skv. ákvæðum Lissabon-sáttmálans, og þá hrapar atkvæðavægi Möltu (með um 410.000 íbúa) um meira en 90% í hinu löggefandi (m..a. um sjávarútveg) ráðherraráði ESB og í leiðtogaráði þess og yrði 0,08%.

En okkar atkvæðavægi yrði ekki nema 0,06% !!! ---> Haraldur Hansson: Ísland svipt sjálfsforræði =http://maeglika.blog.is/blog/maeglika/entry/977585/

JVJ. 

Pútín vildi ekki ræða við Ólaf

Ekki akademískt frambærileg skýrsla Alþjóðastofnunar HÍ um sjávarútvegsmál Íslands og ESB

Sjávarútvegskaflinn er afar undarlegur, þar er ekki vísað í neinar heimildir að ráði, að öðru leyti en því að óþekktir og andlitslausir embættismenn í Brussel virðist koma þarna inn með heimildir sem skýrsluhöfundar treysta sér ekki til að upplýsa hverjir eru. Þetta er ekki í boði í háskólasamfélaginu að koma fram með svona órökstuddar fullyrðingar í skýrslu af þeim gæðum sem svona skýrsla á að hafa. Það er engin heimildarskrá um það hver segir hvað. Þetta er eiginlega skýrsla óþekkta embættismannsins,

segir Vigdís [Hauksdóttir um skýrslu Alþjóðamálastofnunar HÍ, sem birt var í dag] og bætir við að vitnað hafi verið í minnisblöð embættismanna sem ekki hafi verið lögð fram sem gögn í aðlögunarferlinu. (Mbl.is)

• „Það er ekki hægt að bjóða okkur uppá það að vitna í tveggja manna tal. Ég hef farið í gegnum háskólanám og veit að allt þarf að vera skothelt varðandi heimildir og rökstutt til að ritgerðir og skýrslur séu teknar gildar af háskólasamfélaginu. Ef að ekki er gefin upp ákveðin heimild fyrir ákveðnum fullyrðingum þá veit maður ekki hvort að þær séu réttar,“ segir Vigdís sem telur ekkert benda til þess í skýrslunni að tilefni sé til að draga tillöguna til baka um að slíta viðræðum við ESB. Í raun sé búið að draga umsóknina til baka með því að hætta viðræðum og slíta samninganefndum. (Mbl.is)

Vel mælt hjá Vigdísi og þarft verk að afhjúpa svo augljósa þverbresti í þessari skýrslu sem átti að heita akademískt frambærileg, en er það ekki! Það verður aldrei neitt traust byggt á orðum nafnleysingja í málum sem varða þjóðarhag. Ónafngreindir embættismenn hafa t.d. ekkert vægi til móts við sjálfan stækkunarstjóra Evrópusambandsins, Stefan Füle, einn af kommissörunum í sjálfri framkvæmdastjórn ESB og þannig með e.k. ráðherraígildi, en hann andmælti eindregið og leiðrétti á staðnum í Brussel fyrir nokkrum árum hjali Össurar Sarphéðinssonar um "klæðskerasaumaða lausn" handa Íslandi í sjávarútvegsmálum, --- sjá upptöku af orðaskiptum þeirra hér: fullveldi.blog.is/blog/fullveldi/entry/1359088/ --- en samt er þetta óábyrga klæðskerasaumstal endurtekið í þessari skýrslu Alþjóðastofnunar HÍ !! -- og vitaskuld án tilgreindrar heimildar!!

Jón Valur Jensson.

Skýrsla óþekkta embættismannsins

Ólafur Stephensen lýgur að þjóðinni

Í þágu ESB-innlimunar skrifar hann dag eftir dag í viðleitni til að framlengja Össurarumsóknina ólögmætu, þrætir ótrúverðugur fyrir upplýsingar sérfróðra um að engar undanþágur fást varanlega frá lagaramma ESB fyrir umsóknarríki og gætir þess að minnast hvergi á þvera höfnun Stefans Füle stækkunarstjóra ESB á hugmynd Össurar um "klæðskerasaumaðar sérlausnir" fyrir Ísland.

Í Fréttablaðinu í dag heldur Ólafur áfram þunnum áróðri sínum og blekkingum, við hliðina á lítilsvirðandi skopmyndum af utanríkisráðherra Íslands (og ekki þeim fyrstu í því blaði).

Hann heldur því fram, að "ótal dæmi" séu "um varanlegar undanþágur í aðildarsamningum ESB-ríkja, sem hafa verið veittar á grundvelli þjóðarhagsmuna," án þess að nefna eitt einasta dæmi um slíkt. Styrkirnir við landbúnað í Frakklandi, á Ítalíu og Spáni voru t.d. ekki varanlegir og hafa verið helmingaðir, í kringum inntöku austurevrópskra ríkja, og geta að lokum horfið. Varanlegt kann leyfi Dana að vera til að stugga við þýzkum sumarhúsum í hluta ríkis síns, en það leyfi fekkst aðeins af því, að þá þegar höfðu Danir neitunarvald í sambandinu, en engin ný umsóknarríki hafa slíka aðstöðu nú, fyrir utan, að það mál er einber tittlingaskítur í efnahag og stjórnkerfi þjóða.

Þvert gegn Ólafi Stephensen segir próf. Ágúst Þór Árnason, brautarstjóri við lagadeild Háskólans á Akureyri, í nýrri frétt hér á Mbl.is, "að ekki sé um neinar sérlausnir eða undanþágur að ræða, nema þá tímabundnar og þá ekki sem yrðu hluti af löggjöf Evrópusambandsins. Ágúst segir að í ljósi þess að ekki verði hægt að fá neinar varanlegar sérlausnir eða undanþágur sé aðildarviðræðum í raun sjálfhætt."

Ennfremur segir dr. Stefán Már Stefánsson, prófessor í Evrópurétti við lagadeild HÍ, í bók sinni Landbúnaðarlöggjöf Evrópusambandsins og Evrópska efnahagssvæðisins (2011, 108 bls.), á síðu 66: 

• "Um varanlegar undanþágur frá reglum ESB. Skoðun á aðildarlögum einstakra ríkja staðfestir að hingað til hefur ekki verið um varanlegar undanþágur að ræða, hvorki á sviði sjávarútvegsmála né landbúnaðarmála."

Það er kannski ráð fyrir Ólaf Stephensen að setjast á skólabekk á ný?

En meðan hann veltist um í vanþekkingu sinni (nema um beinar blekkingar sé að ræða), skrifar hann eins og sjá má í leiðaranum í dag: 

• "Í þriðja lagi eru sérlausnir, þar sem löggjöf ESB er breytt til að mæta hagsmunum umsóknarríkis. Slík lausn er til dæmis breyting á landbúnaðarstefnu ESB fyrir „heimskautalandbúnað“ Svía og Finna. Það er að sjálfsögðu varanleg lausn [SIC!!!]; hún hefur gilt í 20 ár og stendur ekki til að hrófla við henni."

Þvert gegn þessari meinloku ESB-predikarans Ólafs segir próf. Stefán Már í fyrrnefndri bók sinni, bls. 167:

"Breyting á reglum ESB í þágu einstakra aðildarríkja. Sem dæmi um þetta má nefna 142. grein fyrrnefnds aðildarsamnings en þar segir svo í lauslegri þýðingu:

• Framkvæmdastjórnin skal heimila Noregi, Finnandi og Svíþjóð að veita langtíma innanlandsstuðning með það að markmiði að tryggja að landbúnaður verði áfram stundaður á tilteknum svæðum. Þessi svæði eiga að ná til landbúnaðarsvæða norðan 62. breiddargráðu og nokkurra aðliggjandi svæða innan þeirrar breiddargráðu, sem búa við svipaðar veðurfarsaðstæður sem gera landbúnað erfiðan.

Stuðningur samkvæmt þessari grein er bundinn ströngum reglugerðarákvæðum sem framkvæmdastjórnin [í Brussel] setur. Sem dæmi má nefna að hámark er sett á heildarstuðning og tegund stuðnings er ákveðin eftir ströngum mælikvarða. Af þessu er ljóst að litið er á ákvæðið sem sérstaka útfærslu ESB-réttar. Það er ESB sem ákveður öll skilyrði fyrir stuðningnum og hann getur eftir atvikum alveg fallið í burtu með breyttri stefnu og löggjöf sambandsins í landbúnaðarmálum." (Tilvitnun lýkur í bók Stefáns Más; leturbr. JVJ.)

Hér er greinilegt, að Ólafur Stephensen fer með rakin ósannindi, þegar hann heldur því fram, að sérlausnin fyrir Finna og Svía sé "að sjálfsögðu varanleg lausn".

Þá reynir Ólafur í málefnafátækt sinni að nefna Möltu til sögunnar sem ríki sem fengið hafi "sérlausn ... til að mæta sérstöðu Möltu í sjávarútvegi." Þetta er allsendis hlálegt, því að Malta fekk ekki að halda sinni stóru landhelgi, nú mega stór skip Spánverja og annarra veiða þar upp að 25 mílna mörkum, en sjálfir halda Möltumenn um 1800 tonna ársafla í heild!!! Þar að auki var ákvæðið um 25 mílurnar eingöngu til að hafa þar sér-veiðisvæði fyrir litla báta, sem erfiðara er að gera út frá öðrum ríkjum, en hins vegar ekkert sem bannar öðrum ESB-borgurum (skv. fjórfrelsinu) að setjast þar að í samkeppni um þessi 1800 tonn (Ólafstonnin getum við kallað þau) eða að kaupa sig inn í maltneskar útgerðir.

Eitt er víst, að ekki er Ólafur Stephensen verjandi íslenzks sjávarútvegs, einnar undirstöðugreinar efnahags- og atvinnulífs hér á landi og gjaldeyrisskapandi öllum öðrum fremur.

Jón Valur Jensson. 

Viðræðunum við ESB sjálfhætt

Tveir sérfræðiprófessorar: Engar varanlegar undanþágur fengjust frá lögum ESB um landbúnað og sjávarútveg

Sumir ímynda sér, að undanþágur/sérlausnir fyrir ESB-ríki gagnvart lögum ESB séu varanlegar, ef ekki er tekið fram, að þær þær sé tímabundnar.

En ESB hefur það í hendi sér, hvenær þær verða afnumdar, úreltar eða þeim breytt.

Það er mjög upplýsandi að lesa orð dr. Stefáns Más Stefánssonar, prófessors í Evrópurétti við lagadeild HÍ, í bók hans Landbúnaðarlöggjöf Evrópusambandsins og Evrópska efnahagssvæðisins (2011, 108 bls.). Hann segir þar á síðu 66:

"Um varanlegar undanþágur frá reglum ESB. Skoðun á aðildarlögum einstakra ríkja staðfestir að hingað til hefur ekki verið um varanlegar undanþágur að ræða, hvorki á sviði sjávarútvegsmála né landbúnaðarmála." (Nánar þar.)

Ennfremur ritar hann á s. 66-67:

"Um tímabundnar undanþágur frá reglum ESB. Skoðun á aðildarlögum leiðir í ljós að unnt er að fá tímabundnar undanþágur frá regluverki Evrópusambandsins ef rök standa til þess. Er mismunandi og raunar samningsatriði hve hin tímabundna undanþága geti staðið lengi og hversu víðtæk hún getur orðið. Í aðildarsamningi Finnands, Svíþjóðar, Austurríkis og Noregs um aðild að Evrópusambandinu frá 1994 er m.a. gerð grein fyrir ýmsum aðlögunaraðgerðum sem giltu til ársloka 1999." (Nánar þar.)

Og í 3. lagi segir próf. Stefán Már (167):

"Breyting á reglum ESB í þágu einstakra aðildarríkja. Sem dæmi um þetta má nefna 142. grein fyrrnefnds aðildarsamnings en þar segir svo í lauslegri þýðingu:

• Framkvæmdastjórnin skal heimila Noregi, Finnandi og Svíþjóð að veita langtíma innanlandsstuðning með það að markmiði að tryggja að landbúnaður verði áfram stundaður á tilteknum svæðum. Þessi svæði eiga að ná til landbúnaðarsvæða norðan 62. breiddargráðu og nokkurra aðliggjandi svæða innan þeirrar breiddargráðu, sem búa við svipaðar veðurfarsaðstæður sem gera landbúnað erfiðan."

Og takið svo eftir beinu framhaldi texta Stefáns Más (leturbr. JVJ):

"Stuðningur samkvæmt þessari grein er bundinn ströngum reglugerðarákvæðum sem framkvæmdastjórnin [í Brussel] setur. Sem dæmi má nefna að hámark er sett á heildarstuðning og tegund stuðnings er ákveðin eftir ströngum mælikvarða. Af þessu er ljóst að litið er á ákvæðið sem sérstaka útfærslu ESB-réttar. Það er ESB sem ákveður öll skilyrði fyrir stuðningnum og hann getur eftir atvikum alveg fallið í burtu með breyttri stefnu og löggjöf sambandsins í landbúnaðarmálum."

JVJ tók saman, aðallega úr bók Stefáns.  Álit hins sérfræðiprófessorsins, Ágústs Þórs Árnasonar, sjá umfjöllun hans sem tekin er upp í 1. aths. hér neðar.

Fjöldi fólks á samstöðufundi

Útþenslukommissari Evrópusambandsins, Füle, skólaði Össur í "aðildarferlinu"! - Samt skrökvar Össur enn!

Össur, sem braut stjórnarskrána í meðferð tillögu um umsókn um inntöku Íslands í ESB, reynir enn að blekkja fólk* um afstöðu Stefans Füle til "klæðskerasaumaðra sérlausna" þrátt fyrir fræga lexíu sem Füle veitti Össuri (á myndbandi hér neðar) í Brussel. Skoðið hér stutt myndskeiðið, það er algerlega kostulegt (og takið eftir, að orðið 'derogations' í innleggi Füle merkir "það að víkja lögum að hluta til til hliðar" (Ensk-íslensk orðabók með alfræðilegu ívafi, Örn og Örlygur 1991).

 

* Í grein í ESB-Fréttablaðinu í dag, þar sem er að finna FIMM greinar MEÐ Evrópusambands-inntöku Íslands, en ENGA á MÓTI, enda er Ólafur ritstjóri ESB-maður rétt eins og eigandinn Jón Ásgeir eða öllu heldur kona hans, og þar er hinu billega (nei, ókeypis) aldreifingarblaði miskunnarlaust beitt í þágu samruna Íslands við Brussel-stórveldið

Jón Valur Jensson.