Endalaust reyna ESB-sinnar, á Bretlandi sem Íslandi, að halda áfram róðrinum í gremju sinni yfir Brexit. Rúv í sorgarlit!

Vesalings þingmaðurinn Dav­id Lammy, Verka­manna­flokknum, á ekki annað svar við Brexit-þjóðar­at­kvæðagreiðslunni á fimmtu­dag­inn en að óvirða hana. Átti hún þó að ákvarða um framtíð Bret­lands í eða utan Evr­ópu­sam­bandsins.

Seg­ir hann að mál­flutn­ing­ur þeirra sem hafi viljað úr sam­band­inu væri þegar að liðast í sund­ur og sum­ir óskuðu þess að hafa ekki kosið með því.

Þetta eru engin rök gegn nærri 1,3 milljónar meirihluta, enda hefur fjöldi manns áttað sig á því eftir á, að gróflega voru notuð fjarstæðukennd hræðslurök gegn úrsögninni, og voru þau engu skárri en Norður-Kóreu-einangrunarrök fylgis­manna Icesave á Íslandi.

Þrjátíu og þrjár og hálf milljón Breta tók þátt í atkvæðagreiðslunni, 71,8% atkvæðisbærra, og er það hæsta hlutfall þeirra í kosningum allt frá kosningu til brezka þingsins 1992 (BBC).

Brezki Verkamannaflokkurinn ætti nú fyrst að reyna að komast í sátt við sjálfan sig (samanber þessa frétt), áður en hann fer að taka lýðræðislegt vald frá almenningi.

En fóstbróðir þessarar ESB-eftirlegukindar í Verkamannaflokknum er meðal annarra Árni Páll Árnason í Samfylkingunni sem leggur ekki meira upp úr lýðræðinu, sem þarna býr að baki, en svo, að hann kallar það „furðuflipp“ af Cameron, forsætisráðherra Breta, að leyfa þessu að gerast! 

Menn hafa einnig veitt athygli undarlegum viðbrögðum Fréttastofu Rúv við tíðindunum frá Bretlandi. Þar hafa fréttamenn allt á hornum sér varðandi afstöðu almennings og voru reyndar í sorgarsjokki strax á föstudagsmorgun, eins og glöggt mátti heyra á fréttamönnum og dagskrárgerðarfólki þar!

Rúvarar finna ýmislegt sér til sárabóta eða öllu heldur til að bíta frá sér: slá því til dæmis upp, að Donald Trump sé ánægður með niðurstöðuna (og þá eigi hún náttúrlega ekki að geta verið góð, skv. forskriftum Rúv), ennfremur séu ISIS-samtökin ánægð með útkomuna! Engin uppsláttarfrétt um aðal-niðurstöðuna finnst á vefsíðu Rúv um Evrópusambandsmál, þess í stað reynt að hjakka í öllu því sem Rúvurum þykir við hæfi til að varpa rýrð á þessa ákvörðun almennings. Það er ekki eins og Rúv geti verið hlutlaust í þessu máli, svo heiftarlega hlutdrægir eru starfsmenn þess. Það hafa þeir einmitt verið líka gagnvart viðleitni sjálfstæðissinna á Íslandi til að bægja frá okkur ásókn ESB-þjóna í að gera land okkar að undirlægju Brussel-valdsins, og eiga þessir fjölmiðlamenn þó að heita starfsmenn lýðveldisins, ekki evrópska stórveldisins!

Jón Valur Jensson.

Vill hunsa þjóðaratkvæðið

Glæsilegur sigur brezkra sjálfstæðissinna: 52% fylgjandi úrsögn úr ESB

Baráttan var æsispennandi fram undir morgun, en er ótvíræð eftir talningu í nær öllum héruðum lands­ins. Cameron hefur boðað afsögn sína innan þriggja mánaða. Donald Trump fagnar úrslitunum.

16,8 millj­ón­ir kusu að segja skilið við ESB, en 15,7 millj­ón­ir vildu til­heyra sam­band­inu áfram. Skotar og Lund­únabúar kusu ESB-aðildina áfram, en landsbyggðarmenn, m.a. íbú­ar Wales og héraða á Suður-Englandi, vildu slíta á sam­bandið.

Nig­el Fara­ge, formaður UKIP, sem sl. 20 ár hef­ur bar­ist fyr­ir út­göngu Breta úr ESB, sagði á fundi með stuðnings­mönn­um „þetta vera sig­ur fyr­ir venju­legt fólk, fyr­ir al­menni­legt fólk.“

Hann hvatti Dav­id Ca­meron for­sæt­is­ráðherra til að segja af sér, en AFP frétta­stof­an hef­ur eft­ir Phil­ip Hammond ut­an­rík­is­ráðherra Bret­lands að Ca­meron muni áfram gegna embætti for­sæt­is­ráðherra. Bæði Bor­is John­son, fyrr­um borg­ar­stjóri Lund­úna, og Michael Gove sem til­heyra þeim armi Íhalds­flokks­ins sem vill segja skilið við ESB, hafa und­ir­ritað stuðnings­yf­ir­lýs­ingu við Ca­meron þar sem hann er hvatt­ur til að sitja áfram. (Mbl.is)

En með morgninum kom tilkynning frá Cameron, að hann hygðist segja af sér. Íhaldsflokkurinn er í augljósri kreppu.

Skotland er hér í erfiðri aðstöðu:

For­sæt­is­rá­herra Skota, Nicola Stur­geon, hef­ur sagt að úr­slit kosn­inga sýni það skýrt að Skot­ar telji framtíð sinni best borgið inn­an ESB, en ESB aðild var ofan í öll­um 32 héruðum Skot­lands. (Mbl.is)

Að frátöldu Grænlandi, sem sérstaklega var ástatt um og valdi úrsögn úr Evrópusambandinu 1985, verður Bret­land "fyrsta aðild­ar­ríkið í 60 ára sögu ESB til að yf­ir­gefa sam­bandið. Það mun þó ekki ger­ast sam­stund­is, en að sögn BBC mun úr­sagn­ar­ferlið taka að lág­marki tvö ár. Stuðnings­menn úr­sagn­ar úr ESB hafa sagt að ekki ætti að ljúka ferl­inu fyrr en 2020, þegar þing­kosn­ing­ar fara næst fram í Bretlandi." (Mbl.is)

Formlega mun for­sæt­is­ráðherra Bretlands "þurfa að ákveða hvenær hann eigi að virkja fimm­tug­ustu grein Lissa­bon-sátt­mál­ans, sem mun veita Bret­um tvö ár til að semja um úr­sögn úr sam­band­inu. Þegar búið er að virkja 50. grein sátt­mál­ans þá get­ur Bret­land ekki gengið í ESB  að nýju án samþykk­is allra aðild­ar­ríkja." (Mbl.is)

Og þetta hafði Ca­meron sagzt mundu gera, virkja grein­ina án tafar, ef kosn­ing­arnar færu á þennan veg, "en þeir Bor­is John­son og Michael Gove, sem hafa verið áber­andi í kosn­inga­bar­áttu Brex­it-liða hafa hvatt hann til að ana að engu. Þeir hafa þó einnig sagt að þeir vilji að viss­ar breyt­ing­ar verði strax gerðar m.a. að vald dóm­ara Evr­ópu­sam­bands­ins gagn­vart Bret­um verði tak­markað og að frjálsu flæði verka­fólks til lands­ins verði sett­ar höml­ur." (Mbl.is)

Hlutabréfavísitölur hafa fallið umtalsvert, einkum í brezkum bönkum. Stjórnandi Englandsbanka, Mark Carney, reynir í yfirlýsingu sinni að róa markaðinn, segir Englandsbanka "ekki hika við" að koma á stöðugleika markaða, og í því skyni verða 250 milljarðar punda lagðir til bankanna frá Englandsbanka (Guardian).

Jón Valur Jensson.

Bretar kjósa að ganga úr ESB

Naumur meirihluti, síðast er fréttist, fyrir BREXIT - og íslenzkar hliðstæður ofurmæla-umræðu

Spennan er í hámarki í Bretlandi: allt virðist geta gerzt: úrsögn úr Evr­ópu­sam­bandinu eða naumur sigur ESB-manna, en nýjustu tvær skoð­ana­kann­anir sýna að 45% vilji að Bret­land segi skilið við Evr­ópu­sam­bandið, en 44% vilja landið áfram inn­an sam­bands­ins (könnun fyr­ir­tæk­is­ins Op­ini­um), og skoð­ana­könn­un fyr­ir­tæk­is­ins TNS sýnir 43% hlynnt því að yf­ir­gefa Evr­ópu­sam­bandið, en 41% hlynnt áfram­hald­andi veru inn­an þess. (Mbl.is)

Hálfgerðar dóms­dags­spár hafa verið í fyrir­sögnum brezkra fjölmiðla margar síðustu vikur, en þetta er í raun mjög sambærilegt við endemis-hrakfara­spár manna eins og Gylfa Magnússonar, prófessors og ráðherra, Þórólfs Matthías­son­ar, prófessors og mikils ESB-sinna, og dr. Guðna Th. Jóhannes­son­ar, dósents í sagnfræði, vegna Icesave-málsins --- allir töldu þeir stórháska­legt fyrir Íslendinga að segja NEI við Svavarssamningnum um Icesave (!) og að það hefði kostað okkur einangrun og eymd (sem enginn hefur þó upplifað!). Hefur rétti­lega verið bent á þessa hliðstæðu ofurmælamanna í löndunum tveimur í Stak­steinum Morgunblaðsins.

Í báðum tilvikum virðist ætlunin hafa verið að hræða heilar þjóðir til að taka afstöðu á grundvelli ofurhræðslu. Þegar frá líður og raunverulegar afleiðingar atkvæða­greiðslunnar í Bretlandi liggja fyrir, þá er mjög líklegt, að þeir þing­menn og ráðherrar, hópar, fjöl­miðlar og stofnanir, sem með mestum ýkjum spáðu fyrir um afleið­ingarnar, verði teknir á beinið fyrir ábyrgðar­leysi, að efna til múgæsinga og blekkja kjósendur.

Það má segja, að hliðstæðir fullyrðingasmiðir hér á landi ættu að minnsta kosti að biðjast afsökunar, en sæta ella almennum átölum. En merkilegt nokk hafa þeir bara haldið sínu striki, einn þeirra (sá síðastnefndi, sem sagði að við myndum einangrast eins og Norður-Kórea og Myanmar herforingjanna) hefur jafnvel boðið sig fram til að verða forseti landsins! -- þaggað niður í einum mótframbjóðanda sínum og hnjóðað í hann fyrir að minnast á þessi mál opin­berlega, eins og sá hefði brotið velsæmis- og veizlu­reglur ("Davíð, hefurðu enga sómakennd?!" eru hans fleygu orð, sem nægðu til að stöðva umræðuna), en dr. Guðni á enn eftir að gera fræðilega grein fyrir rökum síns máls. Við bíðum og vonum!

Jón Valur Jensson.

Fleiri vilja úr Evrópusambandinu

Guðni Th. Jóhannesson MUN skrifa undir samþykkt Alþingis um að ganga í Evrópusambandið!

Ekkert í lögum okkar krefst þess, að þjóðar­at­kvæða­greiðsla verði um ákvörðun Al­þingis að ganga í Evr­ópu­sam­bandið. Verði það sam­þykkt á ný­skip­uðu þingi eftir haust­kosn­ingar, með ríkis­stjórn Pír­ata og ann­arra vinstri flokka við stjórn­völinn -- manna sem hafa lýst því yfir, að þeir taki ekki mark á bréfi Gunnars Braga Sveins­sonar til Brussel og að því sé umsóknin enn í fullu gildi (og samur er hugur Brussel-manna) -- þá yrði engin sjálfkrafa þjóðar­atkvæða­greiðsla næsta skrefið eftir þá samþykkt á Alþingi (jafnvel þótt samþykkt yrði með naumum, einföldum meirihluta).

Málið færi þó fyrir forsetann til undirskriftar (eða synjunar). En Guðni Th. Jóhannes­son hefur lýst því yfir í viðtali á Útvarpi Sögu, að hann MUNI skrifa undir, EF allar kröfur okkar verði upp­fylltar. En þá er hann að gefa það á vald ríkis­stjórnar, sem stendur þá að málinu, hverjar "allar kröfur" landsins (þ.e. HENNAR) verði. Guðni er þar með búinn að binda sig í báða skó með að fylgja þeirri ríkis­stjórn: hann MUNI skrifa undir!

Þetta er meiri háttar áhættu­mál í augum allra fullveldis­sinna. Guðni er EKKI okkar frambjóðandi, er það ekki algerlega ljóst?

Jón Valur Jensson.

Donald Trump er ekki hrifinn af ESB-þátttöku Breta

Hann segist frekar hallast að því að styðja út­öngu Bret­lands úr Evr­ópu­sam­band­inu, m.a. til að minnka skriffinnsku, og er í viðtali við Sunday Times í dag. Hann vill jafn­framt halda góðu sam­bandi við alþjóðlega leiðtoga, þar á meðal Dav­id Ca­meron, for­sæt­is­ráðherra Bret­lands, ef hann verður kjör­inn for­seti Banda­ríkj­anna.

En Ca­meron hef­ur reyndar gagn­rýnt Trump harkalega, einkum "hug­mynd­ir hans um að meina múslim­um að koma til Banda­ríkj­anna. Sagði hann hug­mynd­ina „sundr­andi, heimsku­lega og ranga“." (Mbl.is)

Trump kemur til Bret­lands 24. júní, degi eft­ir þjóðar­at­kvæðagreiðsluna um framtíð Breta í Evr­ópu­sam­band­inu, en erindi hans er meðal ann­ars að vitja um tvo golf­velli sem hann á í Skotlandi. 

J. byggði á Mbl.is.

Trump vill að Bretar yfirgefi ESB

Brexit gæti leitt til keðjuverkandi úrsagnar fleiri ríkja úr ESB

  Margot Wallström, utan­rík­is­ráð­herra Svía, telur nú hættu á að Evr­ópu­sam­band­ið lið­ist í sund­ur ef Bretar sam­þykkja úr­sögn (Brexit) í þjóðar­atkvæða­greiðsl­unni 23. nk. 

Keðju­verkun spáð.

Wall­ström seg­ir í viðtali við breska útvarpið BBC að verði það niður­staðan geti það leitt til keðju­verkunar, fleiri ríki kunni að feta í fótspor Breta og krefjast hag­stæð­ari samn­inga við Evrópu­sambandið og þjóðar­atkvæða­greiðslu. (Ruv.is)

55% Breta eru nú fylgjandi úrsögn úr Evrópu­sambandinu samkvæmt skoðana­könnun brezka blaðsins Independent, en hún birtist þar í gær.

Wallström sjálf kveðst vona að Bretar samþykki að vera áfram í Evrópu­sambandinu.

Telur hættu á að ESB liðist í sundur

J.

Samfylkingin er með stefnu sinni hættulegur flokkur, og það á við um fleiri flokka

Evrópusambandið er enn á dag­skrá Sam­fylk­ing­ar­innar, sbr. skýr orð Árna Páls þess efnis fyrir nokkr­um dögum í eld­hús­dags­um­ræðum. Hann telur Öss­urar­umsóknina enn í fullu gildi og myndi við nýja stjórnar­myndun eftir kosningar vilja fylgja þessu eftir!

Hvernig litist lesendum á það útlit, að hægt væri að færa klukkuna svo langt aftur, ef Samfylkingu, Pírötum, Vinstri grænum, "Viðreisn" og "Bjartri framtíð" (ef hún lognast ekki út af) tekst að mynda ríkisstjórn eftir næstu þing­kosningar og endurvekja allt þetta mál?

Er þá ekki betra að hafa varann á og forðast þá flokka sem taka fullveld­is­afsal til Evrópu­sambandsins í mál?

Ef þetta er í raun það mál, sem skeinu­hættast getur orðið Lýð­veldinu Íslandi og framtíðar-lífs­mögu­leikum þess sem eiginlegs sjálfstæðs og full­valda ríkis með fulla stjórn á eigin auðlindum, er þá ekki ljóst, að þeir flokkar eru beinlínis hættulegir sem líklegir eru til að styðja innlimun Íslands í Evrópu­sambandið?

Jón Valur Jensson.

Hallast að því að gefa kost á sér

Vilhjálmur Bjarnason alþm. er ESB-inntökusinni

Fullveldis­sinnaðir stuðnings­menn Sjálf­stæðis­flokks í Suð­vestur­kjör­dæmi geta með at­kvæðum sín­um stuðl­að að því að full­veldis­sinn­ar kom­ist á þing, en Vil­hjálmur er ekki einn þeirra, er jafnvel í fram­kvæmda­ráði hinna ESB-inn­limunar­sinn­uðu öfug­mælasamtaka "Já Ísland!" - situr þar með mönnum eins og Bene­dikt Jóhannes­syni (formanni "Viðreisnar", nýs flokks Evópu­sam­bands­sinna), Auðuni Arnórs­syni stjórn­mála­fræðingi, fyrrv. blaðamanni Fréttablaðsins (en nú starfsmanni sendiráðs hér á landi), Baldri Dýrfjörð og Baldri Þórhalls­syni, vara­þing­manni Samfyk­ingar­innar, "Jean Monnet-prófessor" og milljóna styrkþega Evrópu­sambandsins.

Þar eru einnig Bergur Ebbi Benediktsson lögfræðingur, Bolli Héðinsson hagfræðingur (skrifar iðulega í Fréttablaðið), Bryndís Ísfold Hlöðversdóttir stjórnmálafræðingur (ung), Brynhildur Pétursdóttir, alþingismaður Bjartrar framtíðar, sem er að hætta á þingi, Ellisif Tinna Víðisdóttir, lögfræðingur og fyrrv. forstj. Varnarmálastofnunar, nú frkvstj. Kirkjuþings, Elvar Örn Arason, stjórnsýslufræðingur, G. Pétur Matthíasson, upplýsingafulltrúi Vega­gerð­ar­innar, fv. fréttamaður, bróðir Þórólfs prófessors (sem sjálfur er óbreytt­ur félags­maður í þessum öfug­mæla­samtökum), G. Valdimar Valdemarsson, kerfis­fræðingur, var í Framsóknarflokki, síðast þegar fréttist.

Enn eru hér fleiri dæmi úr hinu 122 manna framkvæmdaráði ESB-sinnanna:

Grímur Atlason, framkvæmdastjóri, fv. bæjarstjóri (maður Helgu Völu).
Guðbjörn Guðbjörnsson, yfirtollvörður og söngvari ágætur.
Guðjón Sigurbjartsson, framkvæmdastjóri og ráðgjafi, skrifar mikið í blöð um landbúnaðarmál og hefur fengið mikla faglega gagnrýni vegna fullyrðinga hans um verðlagsmál.
Guðmundur Gunnarsson, fv. formaður Rafiðnaðarsambandsins, sat í "stjórnlagaráði!
Guðmundur Steingrímsson, alþingismaður "Bjartrar framtíðar"!
Guðrún Pétursdóttir (sendiherra Benediktssonar), lífeðlisfræðingur, fyrrv. forsetaframbjóðandi, ekkja Ólafs Bannibalssonar.

Og enn tökum við fleiri dæmi úr hinni opinberlega birtu skrá:

Gylfi Zoega, prófessor.
Hanna Katrín Friðriksson, framkvæmdastjóri, fv. blm. Mbl.
Helga Vala Helgadóttir lögfræðingur, m.a. hælisleitenda.
Helgi Jóhann Hauksson stjórnmálafræðingur.
Helgi Magnússon framkvæmdastjóri.
Helgi Pétursson tónlistarmaður.
Hilmar V. Pétursson, forstjóri CCP
Hörður Unnsteinsson stjórnmálafræðingur
Jón Karl Helgason bókmenntafræðingur.
Jón Sigurðsson, forstjóri Össurar.
Jón Sigurðsson, rekstrarhagfræðingur, fv. skólastjóri.
Katrín Júlíusdóttir, alþingismaður, varaform. Samfylkingar, Icesave-kona.
Lúðvík Emil Kaaber, lögmaður og endurskoðandi.
Margrét Kristmannsdóttir, frkvstj., formaður SVÞ, Icesave-greiðslusinni.
Oddný G. Harðardóttir alþm., frambjóðandi í formannskjöri Samfylkingar.
Óttarr Ólafur Proppé, alþingismaður Bjartrar framtíðar, formaður þingnefndar um frumvarp til útlendingalaga, sem samþykkt voru samhljóða á Alþingi í gær, en sennilega í andstöðu við vilja verulegs fjölda landsmanna.
Páll Rafnar Þorsteinsson, heimspekingur
Pawel Bartoszek stærðfræðingur, skrifar í Fréttabl., sat í "stjórnlagaráði".
Pétur Gunnarsson blaðamaður.
Pétur J. Eiríksson hagfræðingur.
Sema Erla Serdar, stjórnmála- og Evrópufræðingur, háttsett í Samfylkingu.
Svanborg Sigmarsdóttir stjórnmálafræðingur, (fv.?) blm. á Fréttablaðinu
Sveinn Hannesson, framkvæmdastjóri Gámaþjónustunnar.
Úlfar Hauksson stjórnmálafræðingur, var virkur í blaðaskrifum með ESB.

Í framkvæmdaráðinu, sem valið var á aðalfundi 30. september 2015, eru að endingu, meðal annarra, fleiri forvitnilegir aðilar eins og Vilhjálmur Þorsteinsson, frumkvöðull í CCP og Tortólamaður, fyrrv. gjaldkeri Samfylkingarinnar og fyrrv. stjórnarmaður Kjarnans (sagði af sér vegna Panamamálanna), sat þrátt fyrir ESB-kappsemi sína í "stjórnlagaráði" (!), Vilmundur Jósefsson, fv. formaður Samtaka atvinnulífsins, Svanborg Sigmarsdóttir stjórnmálafræðingur, Þorkell Helgason, fv. orkumálastjóri, sem einnig sat í "stjórnlagaráði", og Þorsteinn Pálsson, fv. forsætisráðherra.

Þjóðin á rétt á að vita um afstöðu þessa fólks. Áðurnefndur Vilhjálmur Bjarnason, fjárfestir og alþingismaður, hefur nú upplýst, að hann hyggist gefa kost á sér til áframhaldandi þingsetu í næstu kosningum. Naumast er hann valkostur fullveldissinna!

Jón Valur Jensson.

Vilhjálmur gefur áfram kost á sér

Endurspeglar ný könnun yfirburði fullveldissinna?

Útvarp Saga er með nýja aðferð skoð­ana­kann­ana, sem á að koma betur í veg fyrir ítrek­uð inn­legg sama manns/sömu fjöl­skyldu. Þar var að birt­ast niður­staða sem gefur Davíð Odds­syni mikla yfir­burði yfir Guðna Jóhannes­son.

Reyndar var einkum leitað eftir afstöðu þátt­takenda til þessara tveggja manna, þótt einnig væri hægt að velja þriðja val­kostinn. Spurt var (1.-2. júní): Hvern ætlar þú að kjósa sem for­seta Íslands? Gátu menn þá valið:

• Davíð Oddsson.
• Guðna Jóhannesson.
• Einhvern annan.

Niðurstaðan varð, að Davíð fekk 53,9% atkvæða, Guðni Th. 22,6%, og litlu færri fekk "einhver annar" valkostur: 22,3%.

Þetta er ekki í samræmi við ýmsar kannanir Gallup, MMR, Fréttablaðsins og Félagsvísindastofnunar HÍ, en raunar er vitað, að Davíð hefur verið í uppsveiflu, nær 1% á dag að meðaltali, en Guðni á niðurleið. En á vef Útvarps Sögu er þetta þó önnur könnunin sem sýnir yfirburði Davíðs. Fór sú fyrri fram 27.-30. maí, og þar voru allir frambjóðendurnir níu nafngreindir, en Davíð náði þar 39%, Sturla Jónsson 30,1%, Guðni 21,1%, Halla 3,7% og Andri Snær 3,2%. (Sjá nánar hér: Fyrsta skoðanakönnun sem sýnir DAVÍÐ ODDSSON efstan í forsetakjöri.) Þetta segir ekkert til um afstöðu þjóðarinnar, miklu fremur ákveðins hlustendahóps, þar sem menn taka sjálfir ákvörðun um þátttöku í skoðanakönnun, en á Útvarpi Sögu hefur Sturla þessi vörubílstjóri fengið margra ára góða kynningu vegna framlags hans til ýmissar umræðu.

En yfirburðir Davíðs í nýrri könnuninni er allnokkuð í þá átt að vera í samræmi við könnun MMR vorið 2015 þar sem spurt var hvort kjósendur vildu láta breyta stjórnarskránni þannig, að Alþingi verði heimilað að fram­selja hluta íslenzks ríkisvalds til alþjóðlegra stofnana. Niður­staðan var sú, að einungis 14% voru því hlynntir, en 69% andvígir, sjá nánar hér: Nær fimm sinnum fleiri andvígir framsali hluta íslenzks ríkisvalds en hlynntir!

Þá er þess að geta, að MJÖG hlynntir "aðild" að Evrópusambandinu eru bara 9,5% landsmanna skv. nýlegri könnun MMR birtri fyrir miðjan maí, en MJÖG andvígir eru 31,7%, meira en þrefalt fleiri. Þess vegna er þeim mun furðu­legra að Guðni Th. Jóhannesson ljái máls á því að Ísland verði partur af þessu stórveldi og nefni ranglega sem "kost", að þá getum við losnað við krónuna! ––Sjá hér: Guðni Th. Jóhannesson er ekki einarður verjandi landsréttinda.

Jón Valur Jensson.

Evrópusambandið tekur sér alræðisvald yfir fiskveiðilögsögu milli 12 og 200 mílna!

Auðskilin er viðvarandi andstaða þjóðar­innar gegn inntöku í evrópskt stór­veldi.

"Laga­setn­ing­arvald á sviði sjávar­útvegs er fyrst og fremst hjá stofn­unum ESB og aðild­ar­ríkin hafa fram­selt vald til stefnu­mót­unar á sviði sjávar­útvegs til sam­bands­ins.­[nmgr.244] Afleidd lög­gjöf á þessu sviði þarf aukinn meirihluta atkvæða í ráðherra­ráðinu til að hljóta samþykki, en Evrópu­þingið hefur eingöngu ráðgef­andi hlut­verk á þessu sviði.­[nmgr.245]"

Hér er engin miskunn hjá Magnúsi, en vitnað var með þessu í opinberan texta: Tengsl Íslands og Evrópu­sambands­ins, með undir­titlinum "Skýrsla Evrópu­nefndar um samstarfið á vettvangi EES og Schengen og um álita­efni varðandi hugsan­lega aðild Íslands að Evrópu­sambandinu", forsætisráðuneytið, Rv. 2007, bls. 96 (allar feitletranir mínar, JVJ). Og áfram segir í textanum (og TAKIÐ VEL EFTIR FYRSTU SETN­ING­UNNI):

• "Samkvæmt megin­reglunni um jafnan aðgang hafa öll aðildar­ríki ESB ótvíræðan rétt fyrir fiski­skip sín til veiða á öllum miðum aðildar­ríkjanna innan 200 mílna markanna.246
• Sá aðgangur er þó ekki ótak­markaður því reglur sambandsins um ákvörðun hámarks­afla og úthlutun afla­heimilda til aðildar­ríkjanna fela í sér „veigamikla takmörkun á megin­reglunni um jafnan aðgang“ þar sem fiskiskipum er einungis heimilt að veiða á þeim svæðum og úr þeim stofnum sem afla­heimildirnar eru bundnar við.[247]
• [Bls. 97:]
• Aðildarríkjunum er einnig heimilt að takmarka veiðar á svæðinu út að 12 mílum við eigin skip,[248] auk þess sem veiðar á nokkrum öðrum svæðum eru takmarkaðar vegna verndar­sjónarmiða.[249] Þá er aðildar­ríkjum heimilt að grípa til neyðar­ráðstafana og setja reglur til verndar fiski­stofnunum þegar ákveðnir fiskistofnar eða fiskimið eru í verulegri hættu og talið er að tafir myndu leiða til tjóns.[250] Loks ber að nefna að aðildarríkjum er heimilt að grípa til ráðstafana sem miða að verndun og stjórnun fiskistofna þegar um er að ræða fiskistofna sem eru staðbundnir og varða eingöngu skip frá viðkomandi aðildarríki. Þessar ráðstafanir verða þó að vera í samræmi við markmið sameiginlegu sjávar­útvegs­stefnunnar og mega ekki ganga lengra en löggjöf ESB segir til um."[251]

NEÐANMÁLSGREINAR við tilvitnaða textann hér fyrir ofan, í sama riti:

244 Sbr. m.a. 5. gr., 6. gr. og 7. gr. reglugerðar ráðherraráðsins nr. 2371/2002.

245 Sbr. 2. mgr. 37. gr. Rómarsáttmálans. Hingað til hafa eingöngu verið settar reglugerðir á sviði sjávarútvegs, en ekki tilskipanir. Það er meginregla að stofnanir ESB hafa valdheimildir til að setja reglur á sviði sjávarútvegs. Í dómi gegn Bretlandi nr. 804/79 kom fram að þótt ráðið hefði ekki sett reglur á því sviði sem valdframsal aðildarríkjanna tekur til hefðu aðildar­ríkin ekki heimild til að setja reglur á viðkomandi sviði. Því var einnig slegið föstu að vald til þess að setja reglur um verndar­ráðstafanir á hafinu féllu að öllu leyti undir valdsvið stofnana ESB en ekki undir valdsvið aðildar­ríkjanna.

246 Sbr. 17. gr. reglugerðar ráðherraráðsins nr. 2371/2002.

247 Óttar Pálsson og Stefán Már Stefánsson (2003), bls. 53-54.

248 Sbr. 1. mgr. 9. gr. og 2. mgr. 17. gr. reglugerðar ráðherraráðsins nr. 2371/2002.

249 Sérstakar reglur gilda t.d. í kringum Hjaltlandseyjar og Orkneyjar og um veiðar í Miðjarðarhafi og Eystrasalti.

250 Sbr. 8. gr. reglugerðar ráðherraráðsins nr. 2371/2002. Þessar ráðstaf­anir mega ekki vara lengur en 3 mánuði og þarf aðildarríki m.a. að tilkynna þær til framkvæmda­stjórnarinnar, sem þarf að samþykkja verndar­aðgerðirnar, breyta þeim eða hafna innan 15 vinnudaga frá tilkynningu.

251 Sbr. 10. gr. reglugerðar ráðherraráðsins nr. 2371/2002." (Tengsl Íslands og Evrópusambandsins, með undirtitlinum "Skýrsla Evrópunefndar um sam­starf­ið á vettvangi EES og Schengen og um álitaefni varðandi hugsan­lega aðild Íslands að Evrópu­sambandinu", forsætis­ráðuneytið, Rv. 2007, bls. 96-97, allar feitletranir mínar, JVJ.)

Og hér er margt fyrir Esb-sinnana að læra og tileinka sér!

Svo mæta hér Esb-erindrekar frá Möltu sem reyna að "heilaþvo" fullveldis-sinnaðan alþingismann, Vigdísi Hauksdóttur, með þeim orðum, að "Íslendingar þyrftu ekki að óttast neitt; lausn myndi finnast á sjávarútvegsmálum"!!!

En það er í 1. lagi ljóst, að "samkvæmt meginreglunni um jafnan aðgang hafa öll aðildarríki ESB ótvíræðan rétt fyrir fiskiskip sín til veiða á öllum miðum aðildarríkjanna innan 200 mílna markanna," í 2. lagi, að sú hugmynd sumra, að fiskveiðilögsaga, sem snerti ekki lögsögu annarra Esb-ríkja, sé alveg sér á báti og falli ekki undir þessa meginreglu, er einfaldlega villuhugmynd, sem hvergi sér stað í lögum Esb., og í 3. lagi, að Malta fræðir okkur ekkert um að óhætt sé að sogast inn í Evrópusambandið.

VIÐAUKI

Í þessu mikilvæga plaggi: FISKVEIÐISTEFNA ESB OG KVÓTAHOPP (utan­ríkis­ráðuneytið, ágúst 2008), kom m.a. þetta fram (auðk. hér, jvj):

• "Jafn aðgangur að hafsvæðum og auðlindum hafsins er megin­regla í fiskveiði­stefnu Evrópusambandsins. Meginreglan um jafnan aðgang (equal access) hefur gilt frá árinu 1970 þegar fyrsta reglugerð ESB um sjávar­útvegs­mál var samþykkt, [Nmgr.1: Reglugerð 2141/70 um sameiginlega stefnu í uppbygg­ingu sjávar­útvegsins, 5. gr.] en hún kemur nú fram í 1. mgr. 17. gr. grunnreglugerðar 2371/2002. [Nmgr.2: 1. mgr. 17. gr. grunn­reglugerðar 2371/2002 segir: Fiskveiðiskip sambandsins skulu hafa jafnan aðgang að haf­svæð­um og auðlindum á öllum haf­svæð­um sambandsins öðrum en þeim sem vísað er til í 2. mgr. (sérregla sem gildir innan 12 sjómílna lögsögu aðildar­ríkjanna) að virtum þeim reglum sem settar eru samkvæmt 2. kafla (hér er vísað til hvers konar verndar­ráðstafana).] Eftir 1983 hefur meginreglan um jafnan aðgang sætt verulegum takmörkunum en það ár var heildarstefna í sjávar­útvegs­málum lögfest með þremur reglu­gerðum ..." [Bls. 2, nánar þar, en þessar reglu­gerðir myndu ekki veita okkur neinn einka­rétt hér, þær horfa aðeins til stofn­verndunar og fiskveiði­takmarkana Esb. (innsk. JVJ)]
• "Við aðild Íslands að ESB yrðu fjárfestingar annarra ESB borgara og fyrirtækja í íslenskum sjávarútvegi heimilar. Ekki mætti mismuna erlendum aðilum í óhag, enda ættu allir að sitja við sama borð." (Bls. 9.)
• Með brezkri löggjöf árið 1983 var í varnarskyni fyrir sjómenn þar kveðið á um, að a.m.k. 75% hverrar fiskiskips-áhafnar "skyldi vera búsett í Bretlandi. Á þetta reyndi í Agegate-málinu," og var farið með það í Evrópudómstólinn, sem taldi "að með þessu væri brotið gegn ESB-rétti því þetta færi gegn tilgangi og markmiðum landskvótakerfisins." (Bls.5.)
• "Evrópudómstóllinn úrskurðaði í s.k. Factortame-máli að umrædd skilyrði bresku laganna [annarra brezkra laga, innsk. jvj] um búsetu eða ríkisfang væru andstæð lögum Evrópusambandsins, einkum 43. gr. Rs. (áður 52. gr.)[Rs. = Rómarsáttmálinn] um rétt þegns og fyrirtækja til að stofna og starfrækja sjálfstæðan atvinnurekstur í öðru aðildarríki og einnig 294. gr. Rs. (áður 221. gr.) sem varðar jafnan rétt til fjárfestinga í félögum. Dómstóllinn tók jafnframt fram að heimilt væri að setja reglur um fiskiskip sem gerð eru út frá aðildarríkjunum, en óheimilt væri að tengja þær á einhvern hátt lögheimili eða þjóðerni eigenda útgerðar." (Bls. 6.)
• "Rétturinn til að búa, starfa og fjárfesta hvar sem er í Evrópu­sambandinu er grundvöllur samstarfs aðildar­ríkjanna og því gefst lítið svigrúm til að banna einstakl­ingum og fyrir­tækjum að fjárfesta í sjávar­útvegs­fyrirtækjum annarra aðildar­ríkja." (Bls. 7.)

Um allt þetta má lesa mun nákvæmar og í fleiri atriðum í nefndri samantekt, sem er nú ekki nema tæplega 8 bls. texti + efnisyfirlit + heimildaskrá. Ég tel þó ekki nógu varlega ályktað þar sums staðar um áhættuna af því að Ísland láti sogast í Evrópusambandið.

Jón Valur Jensson.

Áður birt á Moggabloggi höfundar 13. marz 2012, en er í jafngóðu gildi og þá.

Varðandi könnun MMR (sjá fréttartengil á Mbl.is hér neðar) má geta þess, að MJÖG hlynntir "aðild" að Evrópusambandinu eru nú í maí 2016 einungis 9,5% landsmanna skv. þeirri skoðanakönnun, en MJÖG andvígir eru 31,7%, meira en þrefalt fleiri. Þess vegna er þeim mun furðulegra að forsetaframbjóðandinn Guðni Th. Jóhannesson ljái máls á því að Ísland verði partur af þessu stór­veldi og nefni ranglega sem "kost", að þá getum við losnað við krónuna!* (Sjá hér: Guðni Th. Jóhannesson er ekki einarður verjandi landsréttinda.)

* Margir segjast hafa það á móti krónunni, að henni fylgi háir vextir, en það er ekkert lögmál, að svo hljóti að vera, heldur er bankastjórn Seðlabankans (og þar með ríkisstjórn og Alþingi) ábyrg fyrir okurvaxtastefnunni, sbr. einnig upp­lýsingar frá Má Wolfgang Mixa í þessari samantekt: Hærri raunvextir hér en í nágrannaríkjum hafa ekkert með gjaldmiðil okkar að gera. -JVJ.

Rúmur helmingur á móti inngöngu