Fráleitt af ESB-hneigðum fjár­málaráðherra að þykjast verja sjávarútveginn

Þessi ESB-maður, Bene­dikt Jó­hann­es­son, þarf að fara að láta af sinni áreitni við Lýðveldið Ísland, gjaldmiðil þess og stofnanir.

• "Nefndi hann sem dæmi að krón­an lagaði sig ekki að þörf­um sjáv­ar­út­vegs­ins og jafn­vel held­ur ekki ferðaþjón­ust­unn­ar, eins og sjá mætti í dag.
• Þá væri ís­lenskt sam­fé­lag að missa til út­landa ýmis tæknistörf vegna geng­is krón­unn­ar." (Mbl.is)

Þetta er maður sem er í aðstöðu til þess að margfalda gjaldheimtu af ferða­mönnum til að halda aftur af offjölgun þeirra (með bæði skemmandi áhrifum á náttúruna og með skaðræðis­áhrifum á krónuna og stöðu útflutn­ings­greina); ennfremur yrði slík aukin gjaldtekja bein leið til að fá meiri tekjur af ferða­mönn­um fyrir ríkissjóð til að sinna krefjandi tímabærum skyldum, umfram allt í samgöng­umálum og til þyrlu­sveitar Landhelgis­gæzlunnar.

En nei, hann lætur sér nægja að kyrja sína gömlu möntru um að kasta krónunni! Þó getur hann líka reynt að hrista af sér slyðruorðið með því að ganga í það nauðsynjaverk með Bjarna frænda sínum að sjá svo um, að annaðhvort gefist Már seðlabankastjóri* upp fyrir kröfum jafnt verkafólks sem samtaka atvinnu­rekenda (þ.m.t. sjávarútvegs) að lækka stýrivexti duglega (niður í t.d. 2%), en það mundi minnka aðstreymi fjármagns frá vogunarsjóðum í bankakerfið og hafa þar með lækkandi áhrif á gengi krónunnar, sem ekki veitir af; eða að víkja Má frá störfum með eðlilegri lagabreytingu. Allur al­menningur, langþjáður af banka­arðráni launa sinna, tæki þessu líka fagnandi.

En Benedikt kaus frekar að velta sér upp úr "þeim [ímyndaða] vanda sem fæl­ist í krón­unni"! Allt þjónar þetta undir hans ESB-innlimunarstefnu. Og víst er, að sízt þarf íslenzkur sjávarútvegur á því að halda að Íslandi verði troðið inn í evrópska stórveldið, sem ekki aðeins hefur ráðizt á þjóð okkar í makríl- og Icesave-málum, heldur myndi gera okkur þá óbætanlegu skráveifu að "Evr­ópu­sambandsvæða" ("þjóðnýta" í þágu ESB) sjávarauðlindir okkar eins og spænskur sjávar­málastjóri ESB orðaði það.

En Benedikt ætti að horfa í tölurnar um hrapandi gengi flokks síns, "Viðreisnar", sem er ekki síður öfug­mæla­nafn en önnur fyrri skaðræðis­samtök Benedikts, "Áfram"-hópurinn (sem vildi leggja á okkur gríðarlegar, ólögmætar Icesave-skuldbindingar í þágu brezku og hollenzku ríkissjóðanna, að eindreginni ósk og kröfu Evrópusambandsins) og "Já Ísland"-hópur innlimunarsinnanna!

* Og þessi seðlabankastjóri hefur ekki aðeins áralanga okurvextina á sinni samvizku, heldur gerðist einnig, eins og fleiri, arfaslakur ráðgjafi í Icesave-málinu, svo að fjarri fer því, að þessi fyrrverandi Marxisti sé óskeikull. Hann er það ekki frekar en Hafrannsóknastofnun.

Jón Valur Jensson.

Krónan ekki heppileg til frambúðar

U-beygja 1. ráðherra Skotlands: vill EKKI Evrópu­sambands­aðild Skotlands, heldur EFTA-aðild :)

 Þessi fyrsti ráðherra, Nicola Stur­geon, hef­ur þar með

lagt á hill­una þá stefnu Skoska þjóðarflokks­ins, að landið sæki um inn­göngu í Evr­ópu­sam­bandið, öðlist það sjálf­stæði frá breska kon­ung­dæm­inu. Þetta kem­ur fram á frétta­vef breska dag­blaðsins Daily Tel­egraph í dag. (Mbl.is)

Framhald frétt­arinnar er ekki lítið áhugavert fyrir okkur Íslendinga:

Í stað [Evrópusambandsaðilar] vilji Stur­geon að Skot­land sæk­ist eft­ir aðild að Fríversl­un­ar­sam­tök­um Evr­ópu (EFTA), verði landið sjálf­stætt. Þar eru fyr­ir Ísland, Nor­eg­ur, Sviss og Liechten­stein. Stur­geon hef­ur boðað þjóðar­at­kvæði um hvort Skot­land skuli lýsa yfir sjálf­stæði en slíkt kosn­ing fór síðast fram 2014 þar sem sjálf­stæði var hafnað. (Mbl.is, leturbr. jvj)

Ákvörðun um þá þjóðaratkvæðagreiðslu um sjálfstæði er þó líka háð samþykki brezka þings­ins,

... en Th­eresa May, for­sæt­is­ráðherra Bret­lands, hef­ur sagt að ekki komi til greina að af slíkri kosn­ingu verði fyrr en viðræðum breskra stjórn­valda við Evr­ópu­sam­bandið um út­göngu Breta úr sam­band­inu verði lokið. Fyrr viti skosk­ir kjós­end­ur ekki hvaða val­kost­um þeir standi frammi fyr­ir. (Mbl.is)

Formlegt útgönguferli Bretlands hefst nú í loka þessa marzmánaðar, þegar 50. greinin verður virkjuð, eins og við sögðum frá hér.

Nicola Sturgeon, 46 ára, hefur verið 1. ráðherra Skotlands frá 2014.

Í fréttinni kemur einnig fram, að Skotar hafa verið að missa trúna á Evrópusambandið, "efasemdir" um það hafa "farið vax­andi í land­inu," og jafnframt hefur dregið úr stuðningnum við sjálfstæði landsins:

Þannig eru 57% nú and­víg sjálf­stæði sam­kvæmt könn­un­inni sem fyr­ir­tækið Yougov gerði fyr­ir breska dag­blaðið Times. 43% styðja hins veg­ar sjálf­stæði ... en 55% skoskra kjós­enda studdu áfram­hald­andi veru í breska kon­ung­dæm­inu 2014 á meðan 45% vildu að Skot­land lýsti yfir sjálf­stæði. (Mbl.is)

Ef svo færi, að Skotland yrði sjálfstætt, yrði ánægjulegt, ef skozka þjóðin sæi hag sínum betur borgið að ganga í Fríverslunarsamband Evrópu (EFTA) heldur en með ESB-aðild, sem m.a. leggur þunga byrði á skozka sjómenn varðandi meint fiskveiðiréttindi ESB-ríkja. EFTA þvingar lönd sín ekki til þess að taka á sig löggjöf um margvíslegustu málefni, löggjöf sem þar skuli njóta formlegs framgangs fram yfir landslög, ef hvað rekst þar á annars horn, og í EFTA er engin þróun í átt til ríkjasamruna og miðstýringar bandalagsins, hvað þá til stofnunar eigin hers o.s.frv., eins og nú er kominn greinilegur áhugi á í her­búðum Brussel-manna, sbr. umræðu um það sl. haust.

EFTA er þar að auki komið með fríverzlunarsamninga við fjöldamörg önnur ríki, m.a. Kanada o.fl. Vesturheimsríki. Þetta er þrifleg og jákvæð alþjóðasamvinna og útlátalaus fyrir aðildarríkin, ólíkt hinu þunglamalega Evrópusambandi, sem þjóðirnar þar, allt frá Eyjahafi til Norðursjávar, eru sífellt að verða óánægðari með, t.d. lýðræðishallann þar og stjórnsemina.

Þessi frétt frá Skotlandi er greinilega áfall fyrir ESB-innlimunarsinna á Íslandi.

Jón Valur Jensson.

Skotland standi fyrir utan ESB

Bretland mun ganga úr Evrópusambandinu, a.m.k. England! 50. greinin virkjuð í lok þessa mánaðar!

Neðri deild brezka þingsins hef­ur samþykkt frum­varp Th­eresu May um að hefja úrsögn Breta úr ESB. Tveim­ur breyt­ing­ar­til­lög­um, sem lá­v­arðadeild þings­ins hafði lagt fram, var hafnað.

Frum­varpið verður nú lagt í heild sinni fyr­ir lá­v­arðadeild­ina, en breyt­ing­ar­til­lög­ur henn­ar hljóðuðu upp á að vernda rétt­indi rík­is­borg­ara ESB í Bret­landi og að auka áhrif þings­ins á lok­aniður­stöðu samn­ingaviðræðna um brott­göng­una. (Mbl.is)

Frum­varpið verður nú sent til Elísabetar drottningn­ar "og gæti jafn­vel orðið að lög­um á morg­un," segir hér í frétt Mbl.is ...

For­sæt­is­ráðherr­ann gæti þá virkjað 50. grein Lissa­bon-sátt­mál­ans hvenær sem er og þannig hafið viðræður sem bú­ist er við að muni standa yfir í tvö ár. Að þeim lokn­um verður Bret­land fyrsta full­valda ríkið til að yf­ir­gefa sam­bandið.

En þessi löggilding þess að virkja 50. greinina verður þó ekki á morgun ...

Talsmaður May virt­ist hafna öll­um bolla­legg­ing­um um að laga­grein­in verði virkjuð á morg­un, eft­ir samþykki drottn­ing­ar­inn­ar.

„Við höf­um talað skýrt um það að for­sæt­is­ráðherr­ann muni virkja 50. grein­ina í lok mars­mánaðar,“ sagði talsmaður­inn fyr­ir at­kvæðagreiðslu þings­ins og lagði mikla áherslu á orðið „lok“. (Leturbr.jvj)

Þetta ætti nú að kæta alla Breta, sem losna vilja við Evrópusambandið, og eins verður því fagnað hér á Íslandi meðal andstæðinga þess að Íslandi verði rennt inn í þetta stórveldi eins og ekkert sé. Og eitt er víst, að áhugi þjóðarinnar á "ESB-aðild" hefur sjaldan eða aldrei verið minni en nú, enda eru áhangendur þessa fyrirbæris alveg hættir að krefjast þjóðaratkvæðagreiðslu um málið!

Jón Valur Jensson.

Bretar og Skotar stefna á sjálfstæði

"Ég mundi segja nei!" - Hressandi andblær af ESB-höfnun norska fjármálaráðherrans

Ekki eykst stuðningur við inn­göngu í Evrópu­sambandið í Nor­egi. Nú hefur Siv Jen­sen, leiðtogi norska Fram­fara­flokks­ins, lýst því yfir, að hún myndi segja NEI við tillögu um inn­göngu í Stór­þinginu.

Ljós­mynd M.Fröder­berg

 

Fari svo, að hennar afstaða verði ofan á á landsfundi flokksins í maí, yrði það í fyrsta sinn í sögu hans, sem tekin væri af­staða gegn inn­göngu lands­ins í Evr­ópu­sam­bandið.

Til þessa hef­ur flokk­ur­inn sem slík­ur ekki tekið form­lega af­stöðu til máls­ins en þess í stað lagt áherslu á að norska þjóðin ætti að taka þá ákvörðun í þjóðar­at­kvæðagreiðslu. (Mbl.is segir frá.)

Við könnumst við sama sönginn hjá sumum okkar eigin flokkum, sem þora ekki að opinbera eigin afstöðu í reynd. En ljóst er, að nú hefur þessi gamla afstaða Fram­fara­flokks­ins breytzt:

Fram kem­ur á frétta­vef norska dag­blaðsins Nati­on­en að efa­semd­ir um Evr­ópu­sam­bandið hafi hins veg­ar farið vax­andi inn­an Fram­fara­flokks­ins. Mál­efna­nefnd flokks­ins í ut­an­rík­is­mál­um legg­ur til að tek­in verði upp sú stefna að hafna inn­göngu Nor­egs í sam­bandið og enn­frem­ur að opnað verði á end­ur­skoðun samn­ings­ins um Evr­ópska efna­hags­svæðið (EES).

Lögð er áhersla á að EES-samn­ing­ur­inn hafi skipt miklu máli fyr­ir hags­muni Nor­egs. Hins veg­ar þyrfti að fram­fylgja hon­um með strang­ari hætti á sum­um sviðum, en að öðrum kosti þyrfti að end­ur­skoða hann, eins og seg­ir í drög­um mál­efna­nefnd­ar­inn­ar. (Mbl.is)

Og hér mega íslenzkir lesendur hafa hugfast, að það er einmitt Fram­fara­flokk­ur­inn sem mynd­ar nú­ver­andi rík­is­stjórn Nor­egs í sam­starfi við norska Hægri­flokk­inn.

Þó vill leiðtoginn Siv Jen­sen ekki kalla eft­ir því að EES-samn­ingn­um verði sagt upp. Flokk­ur­inn vilji ein­fald­lega betr­um­bæta hluta samn­ings­ins, sagði hún á fundi fram­kvæmdaráðs flokks­ins sl. laugardag.

Jen­sen lagði enn­frem­ur áherslu á að milli­ríkjaviðskipti væru Norðmönn­um mjög í hag. Henni hugnaðist ekki að tekn­ir yrðu aft­ur upp toll­ar í viðskipt­um við Evr­ópu­sam­bandið eða önn­ur ríki í heim­in­um. Þvert á móti vildi hún sjá meiri milli­ríkjaviðskipti.

Spurð hvort hugs­an­legt væri að samþykkt yrði á lands­fundi Fram­fara­flokks­ins sú stefna að segja EES-samn­ingn­um upp, sagði hún lands­fund­inn sjálf­stæðan í ákvörðunum sín­um en hins veg­ar teldi hún að breið samstaða væri um mik­il­vægi samn­ings­ins. (Mbl.is)

Hér er það reyndar spurning, hvort óvinsældir ESB-aðildarkostsins meðal norskra kjósenda hafi áhrif á afstöðu formannsins:

Jen­sen var einnig spurð að því hvort stefnu­breyt­ing Fram­fara­flokks­ins væri til­kom­in vegna þess að Miðflokk­ur­inn hefði verið auka fylgi sitt sam­hliða harðari af­stöðu gegn inn­göngu Nor­egs í Evr­ópu­sam­bandið. Sagði hún svo ekki vera.

„Þessi umræða hef­ur lengi farið fram inn­an Fram­fara­flokks­ins,“ sagði Jen­sen. Það kæmi því ekki á óvart að þess sæj­ust merki í drög­um að ut­an­rík­is­stefnu flokks­ins og þeirri umræðu sem átt hefði sér stað í aðdrag­anda lands­fund­ar­ins.

En það er líka ljóst, að sjálf hefur hún kúvent í málinu: Hún var var hlynnt því að fara inn í ESB fyrir 22 árum, en ekki lengur:

Sjálf sagðist Jen­sen hafa greitt at­kvæði með því að ganga í Evr­ópu­sam­bandið þegar Norðmenn kusu um það í þjóðar­at­kvæði 1994. Hins veg­ar væri hún annarr­ar skoðunar í dag. „Í dag myndi ég kjósa nei.“

Og hún bendir á þá uggvænlegu valdsamruna-þróun í stórveldinu, sem gætt hefur í stórum stíl í millitíðinni:

Evr­ópu­sam­bandið sner­ist [nú] ekki leng­ur um viðskipti og minna reglu­verk, held­ur laga­setn­ingu sem ríki sam­bands­ins hefðu ekki vald yfir. „Viðskipta- og friðar­verk­efnið hef­ur orðið að skriff­innsku­verk­efni.“

Það er hressandi andblær hreinskilni í orðum þessa formanns norræns stjórnmálaflokks, en Siv Jensen hefur verið fjármálaráðherra í norsku ríkisstjórninni síðan 2013.

 

Jón Valur Jensson.

„Í dag myndi ég kjósa nei“

Eftirminnileg orð leiðtoga Grænlendinga

Jonathan Motzfeldt, leið­togi græn­lenzku land­stjórn­ar­inn­ar, sagði þetta um mögu­leikann á því, að Græn­land færi aftur í ESB: "Haldið þið að ég ætli að fara að láta eitthvert ítalskt möppu­dýr segja mér til um það, hvort ég megi fara út á minni trillu að veiða þorsk í soðið?!"

Það er ágætt að minna á þetta nú, þegar ritstjóri Fréttablaðsins gleymir í leiðara sínum í dag, að Grænland gekk úr Evrópusambandinu eins fljótt og mögulegt var eftir að þjóðin fekk ráðin yfir eigin málum í hendur. "Margt er óljóst," skrifar ritstjóri Fréttablaðsins um Brexit-málið og útgöngu Breta, "enda hefur engin þjóð gengið úr Evrópusambandinu áður." En þetta er rangt. Grænlendingar gengu úr Evrópubandalaginu 1985, en höfðu farið inn í það nauðugir 1973, sem hluti af danska ríkinu ...

"þrátt fyrir að um 70% þjóðarinnar greiddu atkvæði gegn því. Grænlendingar sóttu fast að fá forsjá eigin mála. Þeir fengu heimastjórn 1979 og þá var jafnframt hafin formleg grasrótarbarátta fyrir því að segja Grænland úr Efnahagsbandalaginu. Eftir að góður meirihluti Grænlendinga hafði samþykkt í ráðgefandi þjóðaratkvæðagreiðslu 1982 að segja sig úr Efnahagsbandalaginu, hófust samningar um úrsögn sem lauk 1985 með formlegri útgöngu Grænlendinga.

Grænlendingar urðu þó að láta Efnahagsbandalaginu eftir tiltekin réttindi svo sem til veiða í grænlensku lögsögunni og ýmsar aðrar skuldbindingar sem sambandsríkin gáfu ekki eftir ..."

-- Jón Bjarnason, fv. sjávarútvegsráðherra (http://vinstrivaktin.blog.is/blog/vinstrivaktin/entry/1366342/)

Á breytilegu korti hér geta menn séð útþenslu/minnkun ESB á árunum 1957 til 2013:  http://fullveldi.blog.is/blog/fullveldi/entry/1359071/
Þar sést Grænland koma inn 1973 og hverfa út af kortinu 1986. Og innan fárra missera dettur Stóra-Bretland út!

Hér er svo góð mynd af Jonathan Motzfeldt með sinni íslenzku konu, Kristjönu Guðrúnu Guðmundsdóttur:

 Mynd: Morten Juhl

Jón Valur Jensson.

Eitt sinn ágjarnt ESB ávallt ágjarnt - vill halda öllum veiðirétti við Bretland!

Kröfur ESB til Breta vegna Brexit sanna hve vara­samt er að gefa þessu stór­veldi nokkuð eftir af fullveldi. ÖLL veiði­rétt­indi, sem Bretar urðu nauð­ugir* jafnt sem vilj­ugir** að gefa ESB-ríkjum, vill ESB halda í þrátt fyrir Brexit!

Þetta er ljóst af minn­is­blaði frá ESB-þing­inu sem lekið var til fjöl­miðla.

Von­ir breskra sjó­manna um að Bret­land gæti end­ur­heimt fiski­miðin í kring­um landið í kjöl­far út­göngu lands­ins úr Evr­ópu­sam­band­inu gætu orðið að engu í kjöl­farið. (Mbl.is)

En þetta hafði einmitt verið eitt af því, sem mælti með úrsögn: að þá myndu brezkir sjómenn end­ur­heimta miðin að fullu til sín, í stað þess að deila þeim með Spánverjum, Hollendingum o.fl. þjóðum.

Frá þessu er greint á frétta­vef breska dag­blaðsins Guar­di­an en minn­is­blaðið, sem blaðið hef­ur und­ir hönd­um, inni­held­ur upp­kast að sjö ákvæðum sem þing­menn á Evr­ópuþing­inu vilja að verði í fyr­ir­huguðum samn­ingi á milli Bret­lands og Evr­ópu­sam­bands­ins um út­göngu lands­ins. Stefnt er að því að viðræður um út­göng­una hefj­ist síðar á þessu ári.

Fram kem­ur í minn­is­blaðinu „ekki verði um að ræða aukn­ingu í hlut­deild Bret­lands í afla­heim­ild­um í sam­eig­in­leg­um fiski­stofn­um (nú­ver­andi skipt­ing afla­heim­ilda verði óbreytt í lög­sögu Evr­ópu­sam­bands­ins og Bret­lands)“. Enn­frem­ur að með til­liti til skuld­bind­inga á vett­vangi Sam­einuðu þjóðanna um sjálf­bær­ar veiðar sé „erfitt að sjá nokk­urn ann­an val­kost en áfram­hald­andi notk­un á sam­eig­in­legri sjáv­ar­út­vegs­stefnu sam­bands­ins“. (Mbl.is)

Þetta eru stóralvarlegar fréttir fyrir brezkan sjávarútveg, ef Brussel­mönnum tekst að þjösnast á Bretum í þessu efni. En hvaða trompspili getur Evrópu­sam­bandið spilað út í því reiptogi? Jú, sam­kvæmt minn­is­blaðinu vill sjáv­ar­út­vegs­nefnd Evr­ópuþings­ins að aðgang­ur Bret­lands að innri markaði sam­bands­ins verði háður því skil­yrði að Bret­ar "haldi áfram í heiðri rétt­indi og skyld­ur sam­kvæmt sam­eig­in­legu sjáv­ar­út­vegs­stefn­unni"!

Þarna stendur sem sé til að nota aðgang að innri markaðnum sem þumal­skrúfu á Breta að gefa áfram eftir fisk­veiði­réttindi sem ESB-ríki höfðu fengið í brezkri fiskveiðilögsögu vegna ESB-aðildar Breta! Nú vill Evrópusambandið í ágirnd sinni múra það inn sem óbreytanlegt, en kannski meðfram til að fæla önnur meðlimaríki frá því að endurtaka Brexit-leikinn. Frexit yrði, fá Frakkar hér með að vita, þeim ekki að kostnaðarlausu né til að endurheimta frelsi sitt að fullu.

Svo eru sumir hér á Íslandi sem ímynda sér, að veiði­réttur hér við land sé eða öllu heldur yrði ekki mikils virði fyrir Evrópu­sambands­ríki! Samt er árlegur afli hér við land margfaldur á við það sem veiðist í brezkri lögsögu! Og vitnisburður spænskra ráðherra*** var t.d. órækt vitni um það, hversu mikill ávinning Spán­verjar sáu í Össurar-umsókninni 2009 fyrir sinn eigin sjávarútveg.

Bresk­ir sjó­menn hafa lengi verið gagn­rýn­ir á sam­eig­in­lega sjáv­ar­út­vegs­stefnu Evr­ópu­sam­bands­ins. (Mbl.is) Ekki er við það komandi hjá sjáv­ar­út­vegs­nefnd ESB-þings­ins að þessir brezku sjómenn hafi sitt fram; aðgang­ur að innri mark­aði sam­bands­ins á áfram að vera háður þessu skil­yrði: að Bret­ar beygi sig fyrir sam­eig­in­legu sjáv­ar­út­vegs­stefn­unni, en ekki aðeins það, heldur þetta að auki:

Sjáv­ar­út­vegs­nefnd­in vill enn­frem­ur að fiski­skip frá ríkj­um Evr­ópu­sam­bands­ins geti áfram siglt und­ir bresk­um fána, en greint hef­ur verið frá því að hol­lenska út­gerðarfé­lagið Cornel­is Vr­olijk veiði 23% afla­heim­ilda í enskri lög­sögu að því er seg­ir í frétt­inni. Enn­frem­ur að fiski­skip frá Evr­ópu­sam­band­inu verði að njóta sömu rétt­inda í Bretlandi og bresk fiski­skip. Ekki verði heim­ilt að setja skil­yrði sem gætu hindrað starf­semi þeirra inn­an Bret­lands. (Sama frétt, leturbr. JVJ.)

Og það er hnykkt á öllu þessu í minn­is­blaði ESB-þingnefndarinnar, þ.e.

að framtíðartengsl Bret­lands og Evr­ópu­sam­bands­ins á sviði sjáv­ar­út­vegs­mála verði að skoða í sam­hengi við vilja Breta til þess að halda nán­um tengsl­um við sam­starfs­ríki inn­an sam­bands­ins og innri markað þess. „Sér­hver samn­ing­ur sem trygg­ir aðgang Bret­lands að innri mark­aði Evr­ópu­sam­bands­ins verður að tryggja aðgang að fiski­miðum Bret­lands fyr­ir fiski­skip sam­bands­ins. (Mbl.is)

Og nú geta ESB-innlimunarsinnarnir barið sér á brjóst í hugmóði yfir því, hvílíkt sé sjálfstraust og stærilæti Brusselmanna gagnvart gamla brezka ljóninu, sem þeir vilja gjarnan að lyppist niður í búri sínu og hími þar áfram undirgefið við svipuhöggin frá Brussel og Strassborg. En brezkir sjómenn eiga örugglega eftir að láta í sér heyra vegna þessa yfirgangs.

Jón Valur Jensson.

* Í dómsmálum, þar sem ESB-dómstóllinn í Lúxemborg hafði úrslitavaldið, ESB-ríkjum í hag. Sjá nánar: Tengsl Íslands og Evrópusambandsins. Skýrsla Evrópunefndar. Forsætisráðuneytið, Rv. 2007, bls. 99-100, sbr. einnig hér: ESB tekur sér alræðisvald yfir fiskveiðilögsögu milli 12 og 200 mílna!

** Í inntökusáttmála Stóra-Bretlands.

*** a) Ráðherra Spánverja í ESB-málum kallar fiskimið Íslands "fjársjóð" og ætlar Spánverjum að tryggja sér fiskveiðiréttindi hér í aðildarviðræðunum (29. júlí 2009).

b) Spænskur ráðherra Evrópumála staðfestir ásækni Spánverja í íslenzk fiskimið; segir Spánverja "himinlifandi" (30. júlí 2009).

c) Sjávarmálastjóri Spánar: auðlindir "evrópusambandsvæddar" þegar ríki gengur í ESB. 

LESIÐ ennfremur:

1) Jón Kristjánsson fiskifræðingur ritar (21.4. 2013): Fjarstæða að við fengjum að halda íslenskri stjórn á okkar miðum eftir inngöngu í ESB

2) Auðvitað yrði hvalveiðum, selveiðum og hákarlaveiðum útrýmt við Ísland – af ESB!

ESB vill veiða áfram við Bretland

Bretar strax komnir í fríverzl­un­ar­viðræður við 12 ríki um all­an heim

Brezka íhaldsstjórnin sýnir strax það sjálfstæði gagnvart Evrópu­sambandinu (enda á leið úr því) að virða að vett­ugi til­raun­ir ráða­manna í stór­veld­inu að fyr­ir­skipa Bret­um að standa ekki í nein­um form­leg­um við­ræð­um um við­skipti fyrr en Bret­land hef­ur yf­ir­gefið Evrópu­sam­bandið. Stefna Breta á þessar frí­verzl­unar­viðræður er skýr og skelegg í senn.

Þetta upp­lýsti Liam Fox, ráðherra alþjóðaviðskipta í rík­is­stjórn Bret­lands, í grein í breska dag­blaðinu Daily Tel­egraph fyrr í vik­unni. Mark­miðið sé að und­ir­búa fríversl­un­ar­samn­inga sem hægt verði að und­ir­rita um leið og Bret­ar segi sig form­lega úr Evr­ópu­sam­band­inu.

Fram kem­ur í frétt blaðsins að stefnt sé að því að Bret­land yf­ir­gefi Evr­ópu­sam­bandið árið 2019. Bresk stjórn­völd séu þegar í viðræðum við ríki eins og Kína, Ind­land, Ástr­al­íu, Suður-Kór­eu, Sádi-Ar­ab­íu og Óman. Th­eresa May, for­sæt­is­ráðherra Bret­lands, upp­lýsti í ræðu í fyrra­dag að Bret­land ætlaði að yf­ir­gefa innri markað Evr­ópu­sam­bands­ins enda væri það for­senda þess að landið gæti samið um sjálf­stæða fríversl­un­ar­samn­inga við önn­ur ríki. (Mbl.is)

Það verður ekkert tvínónað við hlutina. Ríkisstjórnin í Lundúnum ætlar ekki að láta landið gjalda neins vegna Brexit eða með því að bjóða heim refsiaðgerðum ESB í einhverri skelfingar-eftirvæntingu án sinna fyrir fram ákveðnu forvarna.

„Þegar við för­um [úr Evr­ópu­sam­band­inu] mun­um við koma á fót nýj­um tengsl­um við ríki eins og Ástr­al­íu, Nýja Sjá­land og Ind­land. Við erum að viðræðum um viðskipti við mörg ríki með það fyr­ir aug­um að kanna hvar hægt sé að fjar­lægja hind­arn­ir í vegi viðskipta og fjár­fest­inga með gagn­kvæma hags­muni í huga,“ seg­ir Fox í grein sinni og enn­frem­ur:

„Við þurf­um há­marks frelsi til þess að ná þess­um mark­miðum og fyr­ir vikið var það rétt hjá for­sæt­is­ráðherr­an­um að úti­loka fulla aðild að tolla­banda­lagi Evr­ópu­sam­bands­ins. Það er heill heim­ur sem við get­um átt í viðskipt­um við og það er ein­mitt það sem við ætl­um að gera.“

Glæsilegt, og þetta ryður jafnvel brautina fyrir fleiri ríki sem hugað gætu að því sama, hvort sem það verður undir vígorðinu Frexit eða einhverju öðru.

Þetta verður ennfremur aukin hvöt fyrir okkur Íslendinga til að halda okkur frá hinu valdfreka tollmúra-Evrópusambandi og beina fremur sjónum okkar að því að tengjast frjálsara fríverzlunarbandalagi sem gerir engar fullveldiskröfur til sinna aðildarríkja.

Jón Valur Jensson.

Viðræður hafnar við tólf ríki

Brezka ríkisútvarpið veit betur um ESB-stefnuna hjá ríkisstjórn BB heldur en ýmsir hér! - og af fleiri hættumerkjum

Vefsíða BBC grein­ir frá því að nýja rík­is­stjórn­in hér á landi ætli að setja spurn­ing­una um aðild að Evr­ópu­sam­band­inu aft­ur á dag­skrá með því að láta þingið kjósa um hvort hald­in verði þjóðar­at­kvæðagreiðsla um aðild­ina. (Mbl.is)

Þessi frétt er mjög ólík fullyrðingum í fréttastöðvum hér í gær um að ESB-umræða hafi verið "sett á ís" og að "Björt framtíð" og "Viðreisn" hafi ekki náð neinum árangri með ESB-markmið sín í þessu stjórnarsamstarfi. En þær full­yrðingar standast ekki, og Bjarni Benediktsson hefur í viðræðum flokkanna gefið allt of mikið eftir (sjá hér neðst), því að með því að beita ekki neitunar­valdi (sem felst í ráðandi stöðu stærsta flokksins í ríkisstjórn) til að útiloka þjóðaratkvæði um "framhald ESB-viðræðna", þá er Bjarni að ganga á bak fyrri orða sinna um að ESB-umsóknin hafi verið formlega dregin til baka með bréfi Gunnars Braga utanríkisráðherra fyrir hönd þeirrar ríkisstjórnar þeirra.

Reu­ters seg­ir einnig frá því í fyr­ir­sögn að Íslend­ing­ar ætli að spyrja þingið hvort halda skuli þjóðar­at­kvæðagreiðslu um aðild að ESB.

Einkennilega að orði komizt (er Reuters með vanhæfan fréttaritara hér á landi?), en á þó líklega að ganga í sömu átt og ESB-fréttin.

En svona eru ákvæði stjórnarsáttmálans í raun í þessu efni:

Ríkisstjórnin mun byggja samstarf við Evrópusambandið á samningnum um Evrópska efnahagssvæðið. Fylgjast þarf vel með þróun Evrópusambandsins á næstu árum og gæta í hvívetna hagsmuna Íslands í samræmi við aðstæður hverju sinni. Sérstakan gaum þarf að gefa mögulegri úrsögn Bretlands úr sambandinu.

Alþingi fylgist grannt með þróun mála í Evrópu og efli tengsl við systur­stofnanir í öðrum Evrópuríkjum.

Komi fram þingmál um þjóðaratkvæða­greiðslu um aðildar­viðræður við Evrópusambandið eru stjórnarflokkarnir sammála um að greiða skuli atkvæði um málið og leiða það til lykta á Alþingi undir lok kjörtíma­bilsins. Stjórnar­flokkarnir kunna að hafa ólíka afstöðu til málsins og virða það hver við annan. (Auðk. hér, jvj)

Svo er bara að vona, að ríkisstjórnin springi fyrr á limminu en að ná þeim aldri að koma þessu í verk. En jafnframt þarf að hafa auga með uppátækjum þessara þriggja flokka í stjórnarskrármálum (sbr. stefnu­yf­ir­lýs­ingu rík­is­stjórn­ar­inn­ar þar um) og að engin billeg heimild verði samþykkt sem auðveldar innlimun í Evrópusambandið (sbr. 111. gr. tillagna hins ólögmæta "stjórnlagaráðs") um leið og bundið er svo um hnútana, að þjóðin hafi ekkert færi á því að ógilda slíka innlimun (sbr. 67. gr. sömu tillagna hins ólögmæta "ráðs")!

Þar að auki þarf að koma í veg fyrir, að stofnað verði til embættis flokks­pólitísks varaforseta (eins staðgengils forseta Íslands, í persónu forseta Alþingis, sjá tillögur sama "ráðs", 82. gr.), og að 5/6 hlutum Alþingis verði gefið færi á því að snuða þjóðina um þjóðaratkvæða­greiðslu um stjórnarskrár­breytingar, skv. 113. gr. hinna dæmalausu tillagna hins ólögmæta "ráðs", sem allir eiga að vita (eins og Valgerður Bjarnadóttir, þáv. formaður eftirlits- og stjórnsýslunefndar Alþingis vissi upp á hár) að var ekkert annað en einber "ríkisskipuð nefnd", m.a.s. aðeins skipuð af 30 alþingismönnum (þvert gegn þágildandi lögum um stjórnlagaþing!) og ekki með neitt gilt þjóðarumboð að baki.

Jón Valur Jensson.

Fengu annan úr Panamaskjölum í staðinn

Evr­óp­usambandsmálin fjarri því að vera tryggilega útilokuð. Viðaukar (2) um háskaleg ákvæði í stjórnarsáttmála!

Ef Evr­ópu­sambands-sinn­inn Jón Stein­dór Valdimars­son, "sem var um ára­bil for­maður Já Ísland sem er vett­vang­ur þeirra sem vinna að Evr­ópu­sam­bands­aðild, er ... nokkuð sátt­ur við lend­ing­una í þeim mála­flokki" í nýjum stjórnar­sáttmála, skv. Mbl.is-frétt, þá er það full ástæða til að hafa áhyggjur af því, hvað verða kunni ofan á í því máli.

„Við vit­um að ann­ar sam­starfs­flokk­ur­inn er mjög á önd­verðum meiði við það, þannig að miðað við það þá er ég þokka­lega sátt­ur við þessa niður­stöðu og held að það sé ekki endi­lega slæmt fyr­ir efni máls­ins að það drag­ist.“ (JSV, í viðtali við Mbl.is)

Þótt þetta sé viss viðurkenning þess, að ESB-innganga Íslands sé gersamlega ótímabær, enda afar óvinsælt málefni skv. nýlegum skoðanakönnunum og vegna bágs ástands ESB -- og er raunar í fullkominni mótsögn við stjórnarskrá Lýðveldisins Íslands -- þá er vitað, hvernig þessir atlögumenn þjóðríkisins eru þenkjandi og við hverju megi búast af þeim.

Því skulum við enn vera á varðbergi og efla gengi þjóðríkisstefnunnar, sem nú styrkist einnig á alþjóðavettvangi, m.a. í Bretlandi, Danmörku, Hollandi, Frakklandi, Póllandi og Ungverjalandi.

VIÐAUKI I: Í hádegisfréttum Rúv kom meira fram um ákvæði hins nýja stjórnar­sáttmála um ESB-málin. Þar sagði, að ákvörðun um þau bíði seinni hluta kjörtímabilsins.

"Samkomulag stjórnarflokkanna gengur út á, að ríkisstjórnin taki ekki sameiginlega afstöðu gegn neinni tillögu sem fram komi á þinginu, t.d. um hvort greiða skuli atkvæði um framhald aðildar­viðræðna annars vegar eða einfaldlega inngöngu í Evrópu­sambandið hins vegar. Það verði síðan hverjum þingmanni í sjálfsvald sett, hvernig hann greiðir atkvæði, verði slík tillaga lögð fyrir þingið." (Einar Þorsteinsson sagði frá.)

Þetta sýnist undirrituðum alls ekki í góðu fari og að Sjálfstæðis­flokkurinn hafi hér fórnað þessu máli fremur en að tryggja fyrir fram fullveldi Íslands.

VIÐAUKI II: Hér eru textarnir um ESB-mál í Stefnuyfirlýsingu ríkisstjórnar Sjálfstæðisflokks, Viðreisnar og Bjartrar framtíðar:

Ríkisstjórnin mun byggja samstarf við Evrópusambandið á samningnum um Evrópska efnahagssvæðið. Fylgjast þarf vel með þróun Evrópusambandsins á næstu árum og gæta í hvívetna hagsmuna Íslands í samræmi við aðstæður hverju sinni. Sérstakan gaum þarf að gefa mögulegri úrsögn Bretlands úr sambandinu.

Alþingi fylgist grannt með þróun mála í Evrópu og efli tengsl við systur­stofnanir í öðrum Evrópuríkjum.

Komi fram þingmál um þjóðaratkvæða­greiðslu um aðildar­viðræður við Evrópusambandið eru stjórnarflokkarnir sammála um að greiða skuli atkvæði um málið og leiða það til lykta á Alþingi undir lok kjörtíma­bilsins. Stjórnar­flokkarnir kunna að hafa ólíka afstöðu til málsins og virða það hver við annan. (Auðk. hér, jvj)

 

Jón Valur Jensson.

Pawel ekki á ráðherrastól

Höfum gát á ríkisstjórn með tvo ESB-innlimunarsinnaða flokka, þótt flestir sjálfstæðismenn standi með fullveldinu

Full ástæða er til að hafa auga með ESB-stefnu hins hvikula Bjarna Bene­dikts­sonar og nýs ráðuneytis hans, sem er í burðarliðnum. Þótt ESB-málið verði svæft þar til „und­ir lok kjör­tíma­bils­ins,“ er ekki allt á hreinu í raun, og við verðum enn að bíða beinna yfirlýsinga frá hinni nýju stjórn; ekki er unnt að treysta á óstaðfestar fregnir.

En staða málsins mun nú vera þessi skv. Mbl.is og tilgreindri heimild:

Ný rík­is­stjórn Sjálf­stæðis­flokks, Bjartr­ar framtíðar og Viðreisn­ar mun ekki leggja fram til­lögu á Alþingi varðandi mögu­lega um­sókn Íslands um aðild að Evr­ópu­sam­band­inu á nú­ver­andi kjör­tíma­bili.

Þetta kem­ur fram í drög­um að stjórn­arsátt­mála sem for­menn flokk­anna þriggja hafa kynnt fyr­ir þing­flokk­um sín­um. Þó er með nokkuð al­mennu orðalagi opnað fyr­ir þann mögu­leika að þing­menn stjórn­ar­meiri­hlut­ans geti stutt þing­mál varðandi um­sókn­ar­ferli að Evr­ópu­sam­band­inu, komi slíkt mál fram „und­ir lok kjör­tíma­bils­ins,“ eins og það mun vera orðað í sátt­mála­drög­un­um. Ekki virðist þó liggja fyr­ir ná­kvæm skil­grein­ing á því við hvaða dag­setn­ingu skuli miðað með orðalag­inu und­ir lok kjör­tíma­bils­ins.

Samtök um rannsóknir á Evrópusambandinu og tengslum þess við Ísland óska landsmönnum öllum nær og fjær farsæls nýs árs.

Jón Valur Jensson.

Evrópumálin sett á ís