Föðurlandssvik: Umboðslaus aðlögun að ESB og upptaka evrunnar

Á fréttavef Evrópuvaktarinnar er vitnað í staðreyndablað 17.kafla um peninga- og efnahagsmál, þar sem samningsafstöðu Íslands er líkt á eftirfarandi hátt:

"Við aðild mun Ísland hafa lokið við innleiðingu á öllu regluverki ESB, fram til þess dags, sem ekki hefur verið innleitt, að teknu tilliti til niðurstöðu samningaviðræðna í þessum kafla.

Ísland mun taka þátt í Efnahags- og myntbandalaginu og hyggst uppfylla allar viðmiðanir varðandi samleitni og taka upp evruna eins skjótt og aðstæður leyfa."

Hérna kemur fram svart á hvítu, sem andstæðingar ESB-ferlisins hafa sagt allan tímann, að Samfylkingin/VG eru meðvitað að ljúga að þjóðinni, að samningaviðræður séu í gangi. Ríkisstjórnin – bæði VG og Samfylkingin – eru að INNLEIÐA ALLT REGLUVERK ESB á Íslandi. Þjóðinni er sagt að bíða og vonast eftir "samningum" og á meðan er komið aftan að fólki, stórnskipun breytt og fullveldið vélað af þjóðinni.

Hvenær hefur Alþingi/þjóðin veitt ríkisstjórninni umboð til að innleiða hér allt regluverk ESB?

Hvenær hefur Alþingi/þjóðin veitt ríkisstjórninni umboð til að ganga í Efnahags- og myntbandalagið?

Hvenær hefur Alþingi/þjóðin heimilað ríkisstjórninni að sækja um að taka upp evruna?!

Hvenær hefur forsetinn verið spurður um þann samning, að Ísland innleiði allt regluverk ESB á Ísland, gangi með í myntbandalagið og taki upp evruna?

Ekki að undra að gáfvitarnir í Stjórnlagaráði leggja til að ríkisráð verði lagt niður. Þessi pappír sýnir svik ríkisstjórnarinnar við Ísland og Íslendinga. Ríkisstjórnin á engar föðurlandstilfinningar eftir og reynir að breyta landsmönnum og auðlindum Íslands í söluvöru fyrir eigin persónulegan ávinning./GS

ESB er "skrímsli" sem verður að stöðva

Fréttir þurfa ekki að vera rangar af því að þær eru gamlar. Fyrir sjö árum hélt Vladimir Bukovsky, þá 63 ára, ræðu um ESB í boði Sjálfstæðisflokks Breta á pólskum veitingastað í Brussel.

Hann vísaði til leyniskjala, sem hann hafði aðgang að 1992 og innihéldu "áætlun" um að breyta ESB í sósíalísk samtök. Bukovsky hafði áður setið tólf ár í fangelsum í Rússlandi fyrir andstöðu við kerfið og var að lokum rekinn úr landi árið 1967. En árið 1992 var honum boðið af rússnesku ríkisstjórninni að vera viðstaddur réttarhöld til að bera vitni sem sérfræðingur í málaferlum um hvort kommúnistaflokkurinn væri glæpasamtök. Þá fékk hann aðgang að ýmsum skjölum, sem enn eru klössuð sem leyniskjöl. Honum tókst að ná afriti af mörgum skjölum t.d. skýrslu KBG til sovésku ríkisstjórnarinnar.

Gögnin sýndu, að Sovét var aðili að hugmyndinni um að breyta ESB í alríki gegnum samstarf vinstri flokka í Evrópu. Gorbatjov kallaði verkefnið "hið sameiginlega heimili Evrópu."

Kommúnistar og jafnaðarmenn í Evrópu óttuðust að styrkur Margrétar Thatcher kæmi í veg fyrir að vinstri flokkar ættu sér viðreisnar von. Sovétstjórnin hafði verið andstæðingur ESB en eftir samráð með jafnaðar- og kommúnistaflokkum víða að í Evrópu breytti Sovét alfarið um stefnu, þegar möguleikinn kom að breyta ESB í alríki í stað frjáls markaðar. 

Í ræðu sinni bar Bukovsky saman ESB og USSR og sýndi fram á, að lítill munur væri á valdauppbyggingu ESB og gamla Sovét. Hann líkir framkvæmdastjórninni við Pólítbýró kommúnistaflokksins þar sem ókjörnir menn sitja óábyrgir gerða sinna. Evrópuþinginu líkir hann við Supreme Soviet með svipaða hönnun og tilgang.  80 þúsund blaðsíðna regluverki ESB segir hann að líkist Gosplan, þar sem allt er ákveðið í smáatriðum niður í rær og skrúfur. Bukovsky meinar, að ESB sé Sovét light þar sem Europol hefur enn ekki náð sömu stöðu og KGB en varar við þróun, sem mun gera Europol valdmeiri en KGB.

Fyrir sjö árum spáði Bukovsky, að það yrði efnahagshrun í ESB, bæði vegna ofvaxtar báknsins og póítisks gjaldmiðils evrunnar.

"Ég er ekki í neinum vafa. Evrópusambandið mun hrynja á mjög líkan hátt og Sovétríkin hrundu."

"Þeim mun fyrr sem við hættum við ESB þeim mun betra."

Bukovsky telur, að tíminn sé orðinn naumur til að hægt sé að ná fram breytingum á friðsaman veg.

"Ég veit ekki hvernig staðan verður á morgun með fullfleygu Europool mönnuð með fyrri Stasi eða Securitate liðsforingjum. Allt getur gerst."

Hægt er að nálgst upplýsingar hér 

 

Holland: Ríki eiga að geta yfirgefið ESB, evruna og Schengen

Hollenska ríkisstjórnin segir að leyfa eigi ríkjum í Evrópu að ganga úr stofnunum í Evrópu eftir að hafa tekið þátt í starfi þeirra að meðtöldu ESB, evrusvæðinu og Schengen. 

Í bréfi til þingsins í vikunni skrifar Mark Rutte forsætisráðherra, að breytingarnar krefjist breytinga á Maastricht sáttmálanum, þar sem engar leiðir eru til um að yfirgefa evruna og Schengen.

Mark Rutte hafði áður á Efnahagsþinginu í Davos sagt, að ESB ætti ekki að vera eins og "Hótel Kalifornía" í lagi Arnanna (The Eagles), þar sem "hægt var að bóka sig út - en þú getur aldrei komist burt."

Eftir ræðu forsætisráðherra Breta David Cameron um aukið lýðræði og vald til baka til þjóðþinga eru skoðanir skiptar í Evrópu. Annars vegar þeir, sem vilja sífellt aukin völd til ESB og hins vegar þeir, sem vilja flytja völdin aftur til fólksins.

 Meira er hægt að lesa hér 

"Evrópa er að deyja" Ellefu menningarvitar telja sósíalisma bjarga ESB og evrunni.

Ellefu menningarvitar í Evrópu skrifuðu nýverið í norska Aftenposten grein undir fyrirsögninni "Evrópa er að deyja." Meðal þeirra er Salman Rushdie, sem er á aftökulista múslíma fyrir bók sína The Satanic Verses, Umberto Eco og heimspekingarnir Bernard-Henry Lévy og Julía Kristeva.

"Sú Evrópa, sem foreldrar okkar byggðu samkvæmt nýrri hugmynd eftir stríð færði fólki sérstakan friðarkost, velferð og lýðræði. Þessi Evrópa er enn á ný að leysast upp beint fyrir framan augum okkar."

"Við vorum vön að segja sósíalismi eða upplausn. Í dag er valkosturinn stjórnmálabandalag eða upplausn. Eða til að vera nákvæmari: alríki eða hrun - með félagslegri eymd, óöruggum vinnumarkaði og flóðbylgju uppsagna og fátæktar." 

Ellefumenningarnir telja, að Evrópa sem hugmynd, draumur og verkefni sé að glatast.  

"Það ríkir upplausnarástand í Aþenu, vöggu vestrænnar menningar." Evrópubúar líta niður á grísku bræðraþjóðina, svelti Grikki og ræni fullveldi, sem áður var sameiginlega barist fyrir. Upplausnarástand ríkir á Ítalíu, sem nú er í flokki PIGS-landanna Portúgals, Írlands, Grikklands og Spánar en á þau lönd líti samviskulausar og minnislausar fjármálastofnanir til með fyrirlitningu.

Þar sem endalaus evrukreppa valdi hruni Evrópu krefjast greinarhöfundar sameiginlegrar stjórnunar á gjaldmiðlinum. Annars muni gjaldmiðillinn geta tórað í tuttugu ár eða þar til hann hrynur vegna kreppu og stríðs.

Ekkert sé handan hins myrka sjóndeildarhrings og Evrópa sé að deyja. 

Byggt á grein í Svenska dagbladet

ESB vann beinlínis gegn íslenzkri þjóð frá upphafi til enda í Icesave-atganginum - viðurkennt af áhrifamönnum hér!

Fullnaðarsigur Íslands í Icesave-máli var "löðrungur fyrir Evrópusambandið [sem] ákvað, í fyrsta skipti, að troða sér inn í mál fyrir EFTA-dómstólnum og taka þátt í málshöfðuninni gegn Íslandi með svonefndri meðalgöngu og ... beitti ... sér mjög hart og lýsti því þannig yfir að ef Íslendingar ynnu málið fæli það í sér miklar hamfarir. Miðað við hvað það var langt seilst hjá þeim í þessum málaferlum dylst engum að niðurstaðan er mikið áfall fyrir sambandið," segir Sigmundur Davíð Gunnlaugsson, formaður Framsóknarflokksins (sjá tengil neðar á Mbl.is-viðtal).

Þetta sýndi sig ekki aðeins á seinni metrunum í þessu erfiða, langdregna máli, heldur vann ESB beinlínis gegn íslenzkri þjóð strax við upphaf atsóknar brezkra og hollenzkra stjórnvalda gegn okkur, eins og ráðamenn eru farnir að játa nú hver eftir annan.

Innanbúðarmaður í hópi ESB-innlimunarjarðýtna hér á landi, Ólafur Stephensen, ritstjóri ESB-Fréttablaðsins, dró þessar staðreyndir merkilega fljótt fram í dagsljósið og það á ólíklegasta stað: í leiðara í sjálfu Morgunblaðinu hinn 6. júní 2009, meðan hann enn var ritstjóri þar. Í þessari ritstjórnargrein réttlætti hann Svavarssamninginn umbúðalaust sem knýjandi nauðsyn með tilvísan til þvingana af hálfu Evrópusambandsins, eins og sést hér á neðar í orðum hans sjálfs. Þó gerði hann sér grein fyrir því, að krafan væri gígantísk: að íslenzka ríkið gæfi út "skuldabréf að andvirði 630 milljarða króna" með 5,5% ársvöxtum. "Ekki er gert ráð fyrir neinum afborgunum næstu sjö árin, en síðan greiðist upphæðin upp á sjö árum. Vextir fyrsta árið yrðu hátt í 40 milljarðar króna. Verði ekkert greitt af láninu næstu sjö árin verður skuldin komin í 989 milljarða króna með vöxtum og vaxtavöxtum," ritaði Ólafur, en frá myndu dragast eignir þrotabús Landsbankans, sem alls óvíst var þá, hve miklar eða litlar myndu reynast.

Ólafur sór sig ekki í hóp þeirra varnarmanna Íslands, sem höfnuðu kröfunum og voru ódeigir við að láta á rétt okkar reyna fyrir dómstólunum, heldur fann hann sér einmitt handhæga réttlætingu fyrir uppgjöf ríkisstjórnarsinna ... og í hverju? Jú, í fjárkúgun síns heittelskaða Evrópusambands á hendur okkur! Það er deginum ljósara í þessum orðum hans í leiðaranum 6. júní 2009 (feitletrun jvj): 

• "Efasemdir hafa komið upp um hvort skuldbindingin um innstæðutrygginguna stæðist, en Evrópusambandið kom því til skila svo ekki varð um villzt að ekki væri áhugi á að láta á það reyna – slíkar efasemdir gætu kallað fram áhlaup á banka um alla Evrópu.
• Því var komið á framfæri við íslenzk stjórnvöld að það væri sameiginleg afstaða allra aðildarríkja Evrópusambandsins að leggjast gegn því að Alþjóðagjaldeyrissjóðurinn aðstoðaði Íslendinga, yrðu kröfur Breta og Hollendinga ekki viðurkenndar og gengið til samninga um Icesave. Stjórnvöldum var því nauðugur einn kostur."

Hér vitnaði margsigldi ESB-innanbúðarmaðurinn blygðunarlaust um þessa nauðung, þessa fjárkúgun, af hálfu ESB, og samt hafa ESB-sinnar reynt að afneita þessari staðreynd hátt á fjórða ár í viðleitni sinni til að fela það fyrir þjóðinni, hvernig Evrópusambandið hefur unnið miskunnar- og sleitulaust gegn okkur í þessu Icesave-máli rétt eins og í makrílmálinu.

En ráðamenn ríkisstjórnarinnar eru sjálfir farnir að játa það nú -- sér til lokavarnar í veikri stöðu sinni vegna niðurstöðu EFTA-dómsmálsins, sem afhjúpar skrípaframferði þeirra 2009-2011 -- að þetta var allt rétt hjá Ólafi Stephensen 6. júní 2009: þau Steingrímur og Jóhanna voru undir beinum þrýstingi eða hótunum frá Evrópusambandinu, rétt eins og frá Alþjóðagjaldeyrissjóðnum, þótt fulltrúi hans hafi í Sjónvarpi í gær reynt með kattarþvotti að hreinsa AGS af allri ábyrgð. Þessar hávirðulegu stofnanir virðast síðan hafa þrýst á ríkisstjórnir Norðurlandanna í þeirri viðleitni að knébeygja Íslendinga í þágu tveggja aflóga nýlenduvelda (og í ESB eru slík tíu talsins og munu frá 1. nóv. á næsta ári ráða 73,34% atkvæðavægi í hinu volduga ráðherraráði, sem færi m.a. með æðstu löggjöf yfir sjávarútvegsmálum Íslands, ef við létum innlimast!).

Í Kastljósþætti 28. þ.m. sagði svartipéturinn Steingrímur J. Sigfússon orðrétt (2.23-): "Þá bið ég um það fyrst, að við ræðum þá bara þetta stóra mál í heild sinni, og við verðum þá að taka inn í myndina þær aðstæður sem Ísland var sett þarna í, og núna er kannski orðið skárra fyrir okkur að taka upp á borðið þegar við erum búin að fá þessa glæsilegu niðurstöðu ..."

Hann hefði betur tekið þetta "upp á borðið" hreinskilnislega gagnvart íslenzkri þjóð strax árið 2009, þ.e.a.s. að verið væri að þvinga stjórnvöld hér með ofríkisvaldi Evrópusambandsins, en hann steinþagði um það, þótt það hefði orðið til þess að efla Icesave-andstöðuna hér enn meira. Sami ráðherra var á sama tíma sjálfur illilega flæktur, þvert gegn sínum kosningaloforðum, í umsókn um inngöngu í það sama Evrópusamband; hann hefur sennilega ekki viljað "rugga þeim báti" þeirra Jóhönnu!

En hér eru orð hans sjálfs því til staðfestingar, að hann vissi þá þegar af þrýstingi ESB til að láta okkur borga í stað þess að reyna dómstólaleiðina (Kastljósþátturinn, þegar 9.50-10.12 mín. voru liðnar af honum). Steingrímur sjálfur, "straight from the horse's mouth":

• "Ég er enn þeirrar skoðunar, sem ég varð mjög fljótt eftir að ég kom að þessu þarna upp úr áramótunum 2008 og '9, að staða Íslands, því miður, bauð ekki upp á annað en að reyna einhvern veginn að koma málinu frá með samningum. Við áttum ekki kost á því að koma til dómstóla, þeir lögðust algerlega gegn því, Bretar og Hollendingar og allt Evrópubatteríið, sagði, að það væri stórhættulegt að skapa einhverja minnstu óvissu um það, að þetta væri svona."

Og fleiri ráðamenn vissu af þessari hörðu afstöðu Evrópusambandsins, sem seint og um síðir er loksins viðurkennd -- mestallan tímann vorum við snuðuð um fulla vitneskju þessa.

Nú er eðlilega talað um réttmæti vantrausts á ríkisstjórnina (sbr. forsíðufrétt Mbl. í dag) vegna vægast sagt óhreinnar handfjötlunar hennar á þessu sóknarmáli erlends valds á hendur íslenzkri þjóð. En er ekki líka kominn tími til þess, að almenningur þrýsti á um það, að Ólafur Stephensen segi af sér sem ritstjóri Fréttablaðsins eða verði sagt þar upp störfum? Þau eindregnu tilmæli eiga fyrst og fremst að vera frá alþýðu manna, sem þarf að þola ítroðslu þessa blaðs í bréfalúgur sínar daglega, með lítt duldum ESB-ítroðsluboðskap í hverri viku, ef ekki daglega. Eins ættu auglýsendur að taka undir þessa kröfu, þennan þrýsting, því að ljóst er, að þeir eru ella að kyngja því að styðja þennan Icesave-borgunarsinna, hinn meðvirka ESB-kúgunarsinna, og virða að vettugi fram komin rök fyrir brottvísun hans.

Aðalmálið hér er samt bein ábyrgð Evrópusambandsins á þeim þrýstingi á Steingrím og Jóhönnu að "fara samningaleiðina", ekki dómstólaleiðina, í Icesave-málinu. Þar eins og í makríldeilunni vinnur þetta stórveldasamband gegn okkar þjóðarhagsmunum, og skyldi engan undra.

Jón Valur Jensson.

„Löðrungur fyrir Evrópusambandið“

Æfur Barroso líkir þingkonu við Talíbana fyrir að biðja rannsóknarnefnd ESB um gögn

José Manuel Barroso forseti framkvæmdastjórnar ESB brást ókvæða við beiðni Inge Grässle þingkonu Kristilegra Demokrata nýlega um gögn frá rannsóknardeild ESB Olof sem sýna hvað fram fór á milli Barroso og fyrrum heilsuráðherra ESB John Dalli.

Dalli sagði af sér embætti eftir að upp komst, að fyrrum kosningastjóri hans reyndi að hafa 60 miljónir evra af Swedish Match til að múta Dalli svo framleiðsluákvæði um sænskt snús yrði ekki breytt. Dalli er ákærður fyrir mútubrot en segir, að allt sé misskilningur og honum hafi verið sparkað úr framkvæmdastjórninni. Íhugar hann málaferli gegn framkvæmdastjórninni. Framkvæmdastjórn ESB segir, að Dalli hafi hætt "af pólitískum ástæðum."

Barroso missti stjórn á sér á fundi þ. 15. jan. s.l. og sagði að spurningar þýzku þingkonunnar Inge Grässle jöfnuðust á við rógburð, þegar hún krafðist upplýsinga um hvað í raun og veru átti sér stað. Barroso vildi ekki fyrirskipa rannsóknardeildinni að láta frá sér gögnin og líkti þingkonunni við fundamentalistískan Talíbana að biðja um slíkt.

Sjá grein í þýzka Bild 

Vinnumálaráðherra Frakka: "Frakkland gjörsamlega gjaldþrota"

Vinnumálaráðherra Frakklands Michel Sapin lét þau orð falla í útvarpsviðtali í gær, að Frakkland væri orðið "algjörlega gjaldþrota." Franska þjóðin er ekki enn búin að jafna sig á yfirlýsingunni.

"Það er ríki en það er gjörsamlega gjaldþrota ríki," sagði Sapin. Ummælin koma á sama tíma og Hollande Frakklandsforseti reynir að laga ímynd Frakklands með því að minnka fjárlagahalla um 60 miljarða evra á næstu 5 árum og auka skatta um 20 miljarða evra.

Tölur frá Frakklandsbanka sýndu fyrr í mánuðinum fjármagnsflótta frá Frakklandi af ótta við áætlanir franskra sósíalista um að skinna fyrirtæki og efnað fólk. Leikarinn Gérard Depardieu hefur skilað ríkisborgararétti sínum og tekið upp rússneskan í mótmælaskyni og David Cameron segir að Bretar "rúlli út rauða teppinu" fyrir efnaða athafnamenn, sem vilja flytja til Bretlands.

Ráðherrar frönsku ríkisstjórnarinnar reyna í dag að bera blak af ummælum vinnumálaráðherrans, sem þeir telja vera vægast sagt óheppileg. 

Anna Kvaran: ESB er EKKI hugsað fyrir þjóðlega hagsmuni

Ég var að horfa á ZDF-fréttir rétt áðan og þar talaði hr. Westerwelle Außenminister (utanríkisráðherra Þýskalands) um "sérþarfir" Englands gagnvart ESB og hann sagði orðrétt: "EU ist NICHT für Nationale Interessen gedacht! Es ist eine Schicksals-gemeinschaft." !!!!!!! (Hann lagði áherslu á "NICHT")

Schicksal= Destiny= ÖRLÖG!!! Örlagabandalag!!!

Hahh! Hann er sko ekki til í að gefa "England oder andere Nationen" fleiri undanþágur á þeirra sérþörfum!!!!!!!!!!

Oder andere Nationen= Englandi og Íslandi!?! (erum við andere Nationen?)

Það var þungt í Westerwelle í kvöld.

Ekkert bros, þungar brúnir...

Anna Kvaran.

Við þökkum Önnu þessa ágætu sendingu, sem barst okkur í gær. 

Hægt verði að yfirgefa evrusvæðið

Unnur Brá Konráðsdóttir: Ísland já takk - ESB nei takk

Ísland er nú í aðildarferli að ESB vegna umsóknar Samfylkingar og VG. Í vor verður kosið til Alþingis. Í þeirri kosningabaráttu munu Evrópumálin og afstaða flokkanna og frambjóðenda til aðildarumsóknarinnar verða í brennidepli. Ég er algerlega sannfærð um að hagsmunum Íslands er betur borgið utan sambandsins en innan og vil halda áfram að vinna að því markmiði að tryggja áfram sterkt Ísland utan ESB.

Allar þær skoðanakannanir sem gerðar hafa verið frá því í byrjun ágúst 2009 segja okkur að mikill meirihluti landsmanna er andvígur inngöngu Íslands í ESB. Niðurstöður skoðanakönnunar sem Capasent Gallup gerði fyrir Heimssýn í október sl. eru þær að 57,6 prósent þjóðarinnar er andvígur aðild Íslands að Evrópusambandinu, hlynntir aðild eru 27,3 prósent og hlutlausir eru 15 prósent. Það er því einsýnt að meirihluti landsmanna hefur ekki áhuga á því að ganga í ESB.

Suðurland státar af öflugum landbúnaði og eigum við mikil sóknarfæri í þessari mikilvægu atvinnugrein. Ljóst er að hart verður sótt að íslenskum landbúnaði ef af aðild verður, það sýnir reynsla annarra þjóða. Bændur munu því skipa sér í fylkingarbrjóst þeirrar baráttu sem framundan er. Fullyrðingar um undanþágur frá regluverki ESB breyta ekki skoðun minni enda ljóst að allir aðlögunarsamningar í sögu ESB hafa allir verið tímabundnir. Hinir margumræddu norðurslóðastyrkir til landbúnaðar sem m.a. eru til staðar í Finnlandi eru greiddir úr ríkissjóði Finnlands en ekki af ESB og ekki er ljóst hversu lengi þeir verða leyfðir. Slíkir styrkir eru til þrátt fyrir ESB, ekki vegna ESB.

Ég hef á kjörtímabilinu lagt fram þingsályktunartillögu þess efnis að aðildarumsóknin verði dregin til baka. Ég óska eftir þínum stuðningi til þess að halda áfram að vinna að því markmiði að tryggja áfram sterkt Ísland utan ESB og sækist eftir 2. sæti á lista Sjálfstæðisflokksins í Suðurkjördæmi í prófkjöri flokksins sem fram fer 26. janúar n.k.

Höfundur er alþingismaður Sjálfstæðisflokksins í Suðurkjördæmi.

• Eftirmáli. Yfirgangur stjórnarþingmanna í ESB-máli sést m.a. af bolabrögðum þeirra í utanríkismálanefnd með brottrekstri Jón Bjarnasonar, sem nú skilur við þingflokk VG.
• En okkur er heiður að því að fá að birta hér grein eins traustasta fullveldissinnans á Alþingi, Unnar Brár. Nýbirt er hún í Sunnlenzka fréttablaðinu og er endurbirt hér með leyfi Unnar og hennar mynd. Það er sannarlega mikilvægt að sjálfstæðissinni sem þessi fái traust umboð til næsta þings. JVJ.

„Kornin sem fylltu mælinn“

Ólafur Ragnar Grímsson: Engin ESB-aðild fram undan í hans forsetatíð

Forsetinn, staddur á Alþjóða-efnahagsþinginu í Davos í Sviss, hélt ekki aðeins uppi harðri, verðskuldaðri gagnrýni á Gordon Brown vegna Icesave-afskipta hans, í viðtali við Sky í dag, heldur lét líka umhugsunarverð orð falla um ESB-málið.

• Ólafur Ragnar gaf einnig til kynna í viðtalinu að Ísland muni innan tíðar láta af fyrirætlunum sínum um aðild að Evrópusambandinu. Aðspurður hvort hann sjái fyrir sér að Ísland muni ganga í sambandið á kjörtímabili hans svaraði Ólafur: „Ef þú vilt að ég veðji á það, þá myndi ég tvímælalaust segja nei.“
• Hann bætti því við að það væri alveg ljóst bæði á Íslandi og annars staðar í Norður-Evrópu að efasemdir gagnvart þróun Evrópusambandsins væru vaxandi. „Á undanförnum þremur árum hefur evrusvæðið afhjúpað sjálft sig sem allt aðra skepnu. Við höfum tekið þá ákvörðun að staldra við og halda ekki áfram á næstu mánuðum, en taka málið aftur upp síðar.“ (Mbl.is.)

Eins er haft eftir Ólafi Ragnari í Stöð 2, að ekki verði af 'aðild' Íslands, meðan hann verður forseti. Má e.t.v. ætla, að gerist það nauðsynlegt, muni hann beita synjunarvaldi í 'ferlinu', ef áróðursstarfsemi Evrópusambandsins hér á landi leiðir til verulegs þrýstings í átt til 'aðildar' landsins að þessu bandalagi evrópskra stórvelda.

Þá sagði hann ennfremur í viðtali við Bloomberg-fréttastofuna, að Ísland sé dæmi þess að þjóðir geti blómstrað án atbeina Evrópusambandsins. Á Eyjunni er haft eftir honum, skv. Bloomberg-viðtalinu, að endurreisn íslensks efnahagslífs eftir bankahrunið sýni að þjóðir utan Evrópusambandsins geti notið velgengni án atbeina sambandsins. Þróun mála í Bretlandi sýni ennfremur aukna tortryggni í garð ESB þar í landi.

Þetta eru ánægjulegar fréttir af okkar einarða, málsnjalla forseta.

Jón Valur Jensson. 

Forsetinn ræðst að Gordon Brown