Menn (og sérstaklega ráðherrar) ættu að lesa þessa grein formanns Heimssýnar!

• Okkur sem stóðum í eldlínunni í stjórnmálum síðasta kjörtímabili er ljóst að barátta Framsóknar­flokksins gegn umsókn og aðild að Evrópu­sambandinu skóp þeim kosninga­sigurinn vorið 2013.
• Með andstöðu sinni við umsóknina að ESB náðu þeir til baka megin­hluta þess fylgis sem þeir höfðu áður tapað til Vinstri grænna á meðan forysta þess flokks var trú stefn­unni og andstöðunni við inngöngu í ESB.

Svo ritar Jón Bjarnason, formaður Heimssýnar og fyrrverandi sjávar­útvegs­ráðherra, á Moggavefsíðu sinni í dag og miðlar þar af reynslu sinni. Réttilega minnist hann líka á Icesave-málið sem þátt í kosningasigri Framsóknar, en sá flokkur var hinn eini á þingi, sem stóð órofa og heill gegn öllum sviksamlegum Icesave-frumvörpum Jóhönnustjórnar og Steingríms.

Samtengd eru þau mál reyndar órofa böndum, og valdstofnanir Evrópu­sambandsins börðust af fullkominni óbilgirni og hörku fyrir ósigri íslenzku þjóðarinnar í Icesave-málinu,* eins og ljóst er öllum, sem þekkja þá sögu. Jafnvel þrátt fyrir sína eigin tilskipun um innistæðutryggingar felldi "gerðar­dómur", skipaður að meirihluta af fulltrúum ESB, úrskurð um, að Íslendingar ættu að borga Icesave-kröfur ríkisstjórna Bretlands og Hollands upp í topp!

Það var síðla hausts 2008, sem þetta dómsmorð var framið, en fjármála­ráðherra Íslands, Árni Mathiesen, hafði borið gæfu til þeirrar ákvörðunar að Ísland skyldi ekki eiga fulltrúa í þeim ofstopafulla gerðardómi.

Það eru verulega góðir hlutir í áminnztri grein Jóns Bjarnasonar og réttmætt tiltal hans til núverandi forystu Framsóknarflokks og Sjálfstæðisflokks. Þið getið lesið grein hans HÉR!

Landsmönnum öllum óskum við á Fullveldisvaktinni farsældar á nýju ári og lausnar undan þeirri langvinnu óværu, sem hinn mikli sundurlyndisfjandi, Össurarumsóknin ólögmæta, hefur verið um allt of langan tíma á baki þjóðarinnar.

* Rétt eins og í makrílmálinu, en lögmætar makrílveiðar okkar í eigin landhelgi hafa gefið af sér rúma 100 milljarða króna í útflutningstekjur – nokkuð sem Evrópusambandið vildi ekki unna okkar heimildar til. Og hrópi nú allir áhangendur þess húrra fyrir þessum ofurgyllta gullkálfi sínum!

Jón Valur Jensson.

Athugasemdir

[Guðmundur Ásgeirsson, 3.1.2015 kl. 17:45]

Ríkisábyrgð á innstæðutryggingum er bönnuð samkvæmt tilskipuninni. Þeir sem brutu hana voru Bretar og Hollendingar. ESA gerðist svo meðsekt með þáttöku í yfirhylmingu og tilhæfulausri málshöfðun. Það er óskiljanlegt að íslenska ríkið hafi ekki sótt sér skaðabætur fyrir þetta. Þær mætti nota til að byggja hátæknisjúkrahús og borga starfsfólki þar sæmileg laun.

[Valdimar Samúelsson, 4.1.2015 kl. 12:53]

Jón Valur Þakka áminninguna og ötula baráttu þína fyrir okkur hin en maður er farin að slaka allt of mikið á þessa daganna.Við verðum að klára þetta ESB mál og koma á Persónukosningum og eða þjóðar kosninga kerfi eins og Svisslendingar eru með.