Lætur Sjálfstæðisflokkurinn ESB svínbeygja Alþingi til að samþykkja stórlega íþyngjandi persónuverndarlög?

Hneisa er það fyrir Alþingi og Ís­lendinga að hlusta á dóms­mála­ráð­herra tala um það á þingi í dag, að ekki sé ann­að hægt en að af­greiða lög um per­sónu­vernd í skyndi, þeim verði hvort sem er ekki breytt þar, Evr­ópu­sam­band­ið ætlist til að þau verði með­tekin sem slík!

Þetta eru ekki hennar beinu orð, en hlusta mátti á þetta á vef Alþingis nú eftir hádegið og í 4-fréttum Rúv.

PS: HÉR er þetta, 4. fréttin í fréttatíma kl.16 í dag (þegar 3 mín eru liðnar af upptökunni á Rúv-vefnum). Þar töluðu nokkrir þingmenn, vinnubrögðin voru harðlega gagnrýnd, m.a. kvað Þorsteinn Sæmundsson (Miðflokki) þetta ríkisstjórninni til vansa og annar, að hér væri verið að sýna þinginu fádæma-vanvirðingu, en Sigríður (ráðherrann) svaraði m.a.: "Og að lokum vil ég nefna það, að menn tala hér um að hér sé verið að leggja fram skjal til stimplunar fyrir ríkisstjórnina, þá vil ég ég vil bara benda á það, að þetta mál er hreinræktað mál frá Evr­ópu­sam­band­inu og verður litlu breytt hér í þingsal, verður litlu breytt hér í þingsal, vegna reglna sem Evr­ópu­sam­band­ið setur Íslandi."  

Ýmsir aðilar hafa nú þegar bent á, hve ill­framkvæm­an­leg þessi nýja 147 blaðsíðna ESB-löggjöf er í okkar litla samfélagi og hve íþyngjandi hún myndi verða þeim sjálfum, fyrir utan að hér verður um millj­arða-kostnað að ræða, sennilega einkum fyrir sveitar­félögin í landinu.

Þannig segir líka Þor­steinn Júlí­us Árna­son, héraðsdóms­lögmaður hjá PACTA lög­mönn­um, í Skin­faxa, tíma­riti UMFÍ (skv. frásögn Mbl.is)

að þessi nýja reglu­gerð sé það um­fangs­mik­il að það hef­ur tekið fyr­ir­tæki og stofn­an­ir lang­an tíma að und­ir­búa sig og að erfitt gæti verið fyr­ir íþrótta­fé­lög að fylgja ákvæðum reglu­gerðar­inn­ar.

Í sam­tali við mbl.is seg­ir Þor­steinn að þetta gæti einnig átt við fé­laga­sam­tök al­mennt, þó svo að ein­hverj­ar und­anþágur kunna að vera varðandi viss­ar teg­und­ir sam­taka. Nær reglu­gerðin til allra per­sónu­grein­an­legra upp­lýs­inga og meðferðar þeirra.

Hér er þetta Evrópusamband enn með sínar krumlur í okkar innanlandsmálum og hefur sjálft ekki af miklu að státa í sambandi við endurskoðun eigin reikninga, sem ekki hefur legið fyrir í meira en einn og hálfan áratug!

Svo erum við með jafnvel ráðherra flokks, sem kennir sig við sjálfstæði, sem á Alþingi ögrar þingmönnum með því að vilja keyra þetta mál í gegn á lokadögum þingsins, þegar enginn tími er að vinna málið að þing­legum hætti, eins og venja hefur verið eða á að vera til. Nokkrir þingmenn mótmæltu í dag þessum aðferðum ráðherra að bera þetta mál svo seint fram, og samtök hafa þar að auki bent á hve fráleit þessi laga­setning yrði, sbr. vefgrein sam­takanna Frjálst land: Ísland fær línuna, grein sem hefst þannig:

Evrópusambandið heimtar að persónuverndarlög ESB verði sett í lög hér án tafar "... called for its swift incorporation into the EEA-agreement ".

Eitthvert blað var með grein um þetta alvarlega mál...

Það er alveg ljóst, að jafnvel eitt sér er þetta mál af þeirri stærðargráðu, að það svo lítur út sem það mæli sterklega með því, að Íslendingar segi upp EES-samningnum, vilji þeir viðhalda fullveldi síns löggjafarvalds, eins og full ástæða virðist einnig til vegna fleiri þátta í þeirri EES-lagavinnu sem hefur á síðustu misserum verið að færast í enn meira óviðunandi horf en áður hefur sézt eða verið dæmi um, og er hrapallegast þar á blaði ACER-málið, sem færir sig inn á nýtt svið, orkumálin, sem áður voru utan EES-löggjafar, mál sem geta orðið þjóðinni afar dýr­keypt og illbæt­anleg, jafnvel þótt reynt yrði að snúa til baka. 

Því kalla æ fleiri nú eftir uppsögn EES-samningsins. Það er leitt að sjá ráðherra Sjálfstæðis­flokksins loka okkur hér af, þar sem þessi möguleiki er fyrir fram útilokaður, en boðið upp á áfram­haldandi inngrip stórveldisins og eftirlits­aðila þess inn í málefni sveitar­félaga, fyrirtækja og félagasamtaka!

Sízt eru þeir þingmenn hrósverðir sem ætla að samþykkja víðtækt valda­framsal lansins til býrókrata í Brussel og ofurselja æðsta dómsvald um þessi mál til ESB-dómstólsins í Lúxemborg!

Er ekki að því komið, að sjálf­stæðis­baráttan verði að virkjast hér af fullum krafti, eins og hún gerði áður fyrr í landhelgis­málinu, þegar Bretar, Belgjar og Þjóðverjar vildu ekki virða íslenzka lögsögu eftir útfærsluna í 12 mílur árið 1958, og þegar Evrópu­sambandið reyndi að þvinga Ísland til uppgjafar í Icesave-málinu, jafnvel með sínum falska gerðardómi haustið 2008? Er ekki full ástæða til að menn taki nú höndum saman um vörn íslenzkra landsréttinda?

Jón Valur Jensson.

Persónuverndarlög erfið félagssamtökum

Athugasemdir

[Bjarni Jónsson, 30.5.2018 kl. 10:47]

Með þessari nýju persónuverndargjörð ESB krystallast ókostir EES-aðildar fyrir Ísland.  Gjörðin er allt of stórskorin fyrir 0,35 M manna samfélag.  Það er engu líkara en Ísland sé orðið hluti af ríkjasambandi.  Eins og í ACER málinu, gellur við úr embættismannakerfinu íslenzka, að við verðum að samþykkja gjörðina strax, því að hin EFTA-löndin séu búin að samþykkja og bíði eftir okkar samþykki.  Enn einu sinni sannast, að aðferðarfræði ESB, "one size fits all" er hreint og beint frágangssök hér.  Frekar en að samþykkja einhvern "Kópavogssamning" nú, eiga þingmenn að fylgja sannfæringu sinni og synja persónuverndargjörðinni samþykkis.  Síðan verði leitað leiða til að innleiða einhvers konar lágmarksútgáfu hér.  Oft hefur viljað brenna við, að yfirhlaðnir íslenzkir embættismenn reynist kaþólskari en páfinn.  Íslenzk fyrirtæki munu enda sem algerlega ósamkeppnisfær vegna smæðar sinnar, þegar stöðugt er bætt á þau búrókratískum skyldum, sem kosta milljarða.  Þessi gæti kostað atvinnulífið 10 miaISK/ár.

[Tómas Ibsen Halldórsson, 30.5.2018 kl. 12:05]

Íslenska þjóðin með Alþingi í fararbroddi á ekki að gefa sig undir þvingunar aðferðir ESB. Við þurfum ekki og eigum ekki bara að þóknast þeim við eigum ekki að gefa þeim sjálfstæði okkar á silfurfati, jafnvel þó svo aðrar þjóðir hafi gert það. Nú reynir á að þingmenn, ég tala nú ekki um þingmenn Sjálfstæðisflokksins, hafi bein í nefinu og segi hingað og ekki lengra. Við látum ekki kúga okkur til að taka upp alla vitleysuna sem kemur frá Brüssel, þeir eru ekki með okkar hagsmuni í huga þegar þeir semja sín lög.

[Jón Valur Jensson, 31.5.2018 kl. 01:18]

Vel mælt hjá ykkur báðum, Bjarni og Tómas. Heilar þakkir fyrir glögg og gagnleg innleggin.