Ekkert verður af aðildarviðræðum ESB við Tyrki (og minnt hér á nauðsyn brýnnar aðgerðar Alþingis)

Leiðtogi vold­ug­asta rík­isins í Evrópu­sam­band­inu, Angela Merkel, var að lýsa vilja sín­um til þess að sam­bandið slíti aðild­ar­viðræðum við Tyrki.

Spenna hafði að undan­förnu aukizt milli Þýzkalands og Tyrklands. Erdogan, forseti Tyrklands, hvatti landsmenn sína, sem búsettir eru í Þýzkalandi til að kjósa gegn Kristilegum demókrötum, flokki Merkel, í komandi kosningum, 24. þessa mánaðar, sem og gegn  öðrum stjórn­ar­flokk­um lands­ins. Og nú segir Merkel sjálf:

„Ég sé ekki fyrir mér að þeir gangi nokkurn tímann í sambandið og ég trúði aldrei að svo yrði.“

Hún bætti því við að hún ætlaði að ræða við stjórn­mála­leiðtoga Evr­ópu­sam­bands­ríkj­anna um að „slíta þess­um aðild­ar­viðræðum“. Þessi orð féllu í sjón­varps­kappræðum hennar í kvöld við mótframbjóðandann Martin Schulz, fulltrúa sósíaldemókrata. Þjóðverjar ganga til kosninga 24. september. (Rúv.is, Mbl.is (tengill neðar), með myndum leiðtoganna).

Já, þetta hljómar auðveldlega, „að slíta þess­um aðild­ar­viðræðum“. Hvað um að hr. Bjarni Benediktsson fari nú loksins að vinda að því bráðan bug að láta Alþingi afturkalla formlega umsóknina ólögmætu, sem kennd er við Össur Skarðhéð­insson, um inngöngu Íslands í Evrópu­sambandið? Getur Bjarni ekki komið sér að því verki án frekari tafa? Eða hvað heldur aftur af honum? Er hann eitthvað tvöfaldur í roðinu? Eða ímyndar hann sér, að það sé ekki þing­meirihluti fyrir því, þótt ESB-Samfylkingin hafi kvarnazt niður í að verða þriggja manna þingflokkur?!

Sjálfstæðisflokkurinn stendur illa undir nafni, ef hann ætlar ekki að verða við þessari kröfu. Og hún kemur meðal annars frá góðum og gegnum meðlimum flokksins eins og Styrmi Gunnarssyni, fv. ritstjóra Morgun­blaðsins, Halldóri Jónssyni verk­fræðingi og Jóni Magnússyni hrl.

Jón Valur Jensson.

Merkel vill slíta viðræðum við Tyrki

Athugasemdir

[Jón Steinar Ragnarsson, 4.9.2017 kl. 19:13]

Það er merkilegt að þessi tillaga Merkel um slit viðræðna skuli byggjast á hennar persónulegu hagsmunum. Erdogan hvetur Tyrki í þýskalandi að hunsa Merkel í næstu kosningum, enda hefur hún með innflytjendastefnu sinni skapað ómæld vandræði í Tyrklandi. Merkel bregst við þessari andúð á henni með að heimta slit á viðræðum. Líklega hefði hún ekki brugðist svona við ef Erdogan hefði lagst gegn Schults. 

Þetta sýnir lýðræðishallann í Esb, þar sem herraþjóðin þýskaland ætlar sér að taka ákvarðanir fyrir allar þjóðir sambandsin, vitandi að eurocratarnir innan sambandsins munu bugta fyrir ægivaldi "foringjans" hvað sem hinn almenni kjósandi í löndunum vill. Ákvörðunin er í höndum evrópuþingsins og ráðsins án þess að bera það undir í lýðræðislegum kosningum. Þýskaland hefur í hótunum við Tyrki til að kúga þá til hlýðni á persónulegum forsendum fürher Merkel.

Framtíð þjóða er háð persónulegum duttlungum eurokratanna og ekki í fyrsta ainn sem slíkum kúgunaraðgerðum er beitt.

[Jón Valur Jensson, 4.9.2017 kl. 20:17]

Athyglisvert hvaða steinum þú veltir hér upp í málinu, nafni !