Færsluflokkur: Spilling í stjórnmálum

Kolbrún Bergþórsdóttir þæfist við í sínum ESB-predikunum sem ESB-sinnaður eigandi Frétta­blaðsins lætur útbýta fyrir hvers manns dyr!

Makalaust er að horfa upp á ein­hliða leiðara­skrif hins krón­íska ESB-mál­svara Kol­brún­ar í ESB-Frétta­blað­inu. Ekki minnsta við­leitni til að skilja, hvað þá virða and­stöðu meiri hluta Breta við ESB-"að­ild­ina" sem svo erf­itt er að losna við í reynd (hvern­ig væri það þá fyrir Ísland, ef við létum narrast inn í stór­veldið?!).

Ekki kemur heldur fram hjá henni í þessum nýjasta leiðara ESB-blaðsins, að brezka þingið hefur samþykkt útgöngu Bret­lands úr Evrópusambandinu, þannig að Boris Johnson hefur nú þegar unnið þann sigur í reynd, eins og Björn Bjarnason, fyrrv. mennta- og dómsmálaráðherra, rekur hér í grein sinni í gær : https://www.bjorn.is/dagbok/thingbrellur-gegn-boris-og-brexit 

Björn tekur þar á þeim óvandaða fréttaflutningi ýmissa fjölmiðla (þ.á m. Rúv og "Fréttablaðsins") sem hefur tekizt að leyna því, að Johnson hefur nú þegar borið sigurorð af ESB-aðildarsinnunum í brezka þinginu í sínu Brexit-máli, og Björn vekur athygli á því, að áframhaldandi deilur og tafir þar snúast aðeins um tæknileg mál, ekki um sjálfa ákvörðunina sem nú hefur verið tekin, bók­mennta­fræðingnum Kolbrúnu til ómældrar gremju!

Jón Valur Jensson.


mbl.is Bretar fái aðeins tveggja vikna frest
Tilkynna um óviðeigandi tengingu við frétt

Logi Már Einarsson kvartar yfir heimsókn Pence, varaforseta Bandaríkjanna, en unir vel við heimsókn Angelu Merkel

Ekki leyfir "Kjarninn" fólki að komast betur að kjarna máls með því að opna á umræður um "frétt" sína af við­horfum Loga. Hann mun áfram stefna í fár­án­legum til­raunum að mæla með innlimum lands okkar í Evrópu­sambandið og að leggja áþján allra orku­pakk­anna á þjóð­ina, þrátt fyrir aug­ljósa stöðn­un sem ríkir í ESB, með 0,2% hagvöxt (10,5 sinnum minni en í Banda­ríkjunum, en við með 6,9% hagvöxt á hverju einasta ári að meðaltali 2009-2017) og mikið atvinnuleysi í ESB-ríkjum (ungmenna allt upp í 40%).

 

Myndaniðurstaða fyrir Merkel Pence
Mike Pence hitti Angelu Merkel að máli. Mynd: The Times of Israel
 

Logi ætti að huga að því, eins og Angela Merkel, að víkja úr sessi í stað þess að þenja sig í utanríkis­málum. En miðað við fordóma hans er ekki undarlegt að hann átti sig engan veginn á mikilvægi heimsóknar Pence varaforseta (þeirri sem undirritaður færði hér í tal; en þar tala ég í eigin nafni, ekki þeirra samtaka sem reka þessa vefsíðu, Fullveldisvaktina).

JVJ.


mbl.is Pence til Íslands 3. september
Tilkynna um óviðeigandi tengingu við frétt

Lesið þessar merkilega afhjúpandi upplýsingar af Facebók Orkunnar okkar

Það hlýtur að vera erfitt að taka hlutlausa afstöðu gagnvart orku­pakk­anum þegar hagsmuna­öflin greiða reikninginn fyrir forseta­framboð manns.

Útdráttur úr endur­skoðuðu upp­gjöri Guðna Th. Jóhannes­sonar vegna þátttöku í kjöri til forseta Íslands árið 2016, sbr. lög nr. 162/2006.

Arctic Green Energy Geothermal ehf......................... 400.000 (Haukur Harðarson og Illugi Gunnarsson)

Askja hf................................................................ 100.000 (Ólafur Ólafsson)

Becromal Ísland ehf................................................. 50.000 (Eyþór Arnalds, oddviti XD)

Bláa Lónið ehf........................................................ 200.000 (Guðlaugur Þór Þórðarsson og Helgi Magnússon)

Borgun hf............................................................... 200.000 (Bjarni Benediksson, Benedikt Einarsson, Einar Sveinsson)

HS Orka hf.............................................................. 200.000 (lífeyrissjóðirnir og útrásargengið)

KOM ehf, kynning og markaður.................................. 400.000 (Friðjón R Friðjónsson)

Samskip hf.............................................................. 400.000 (Ólafur Ólafsson, sá eini sanni)

Ursus ehf................................................................ 400.000 (félag Heiðars Guðjónssonar forstjóra Sýn, Stöðvar 2, Visis.is og Bylgjunnar og tengdasonur Björns Bjarnasonar, sæstrengs- og vindmyllumaður)

Vogabakki ehf........................................................ 400.000 (Ólafur Ólafsson, sá eini sanni)

Wow air ehf........................................................... 400.000 (Skúli Mogensen)

Einar Sveinsson...................................................... 300.000 (föðurbróðir Bjarna Ben)

Helgi Magnússon.................................................... 400.000 (eigandi Fréttablaðsins, einn af stofnendum Viðreisnar)

 
RIKISENDURSKODUN.IS
 
 

Sendiherra brýtur gegn skyldum sínum með áróðursgrein fyrir innlimun Íslands í stór­veldi sitt!

Ófyrirleitið er af sendi­herra Evr­ópu­sam­bands­ins að endur­taka sinn fyrri leik að brjóta Vínar­samþykkt um skyldur sendiráða, með ein­hliða gyll­ingar­grein um evrópska stór­veldið, í raun með áróðri fyrir því, að Íslend­ingar láti innlimast í Evrópu­sambandið.

Þetta samrýmist ekki skyldum hans sem sendiherra, ekki frekar en að Evrópu­sambandið dæli styrkjum og mútufé í fyrir­tæki, samtök og einstak­linga hér á landi.

Vísa ber manninum úr landi, eins og ætla má, að gert hafi verið við fyrir­rennara hans Timo Summa 2012, ef hann var þá ekki beinlínis kallaður til baka af yfir­mönnum sínum í Brussel, eftir að hitna tók undir honum eftir skelegga gagnrýni Tómasar Inga Olrich (fyrrv. ráðherra og sendiherra í París) á framferði hans, m.a. með áróðurs­ferðum hans um landið. Sjá einnig hér (15.11. 2018): https://fullveldi.blog.is/blog/fullveldi/entry/2225873/

Er ekki eitthvað brogað við fullyrðingar Michaels Mann um "frelsi og velmegun" í borgum eins og Ríga, Aþenu og Lissabon? -- eru það vel valin dæmi, eftir að þýzkir og franskir bankar fengu að leika þjóðarhag Grikkja grátt í boði ESB og Evrópubanka þess? Litlu skárra er ástandið í Portúgal, en fólksflótti hefur verið þaðan frá atvinnu­leysi og þó um enn lengri tíð frá Lettlandi, og ekki er fæð­ingar­tíðnin þar í landi til að hrópa húrra yfir: 1,52 börn á hver hjón! -- örugg leið til útþurrkunar þjóðar á 6-7 kynslóðum!

Mann þessi geipar af því, að hinn verðandi forseti fram­kvæmda­stjórn­ar ESB, Ursula von der Leyen, hafi "sett fram metnaðar­fulla og hvetj­andi áætlun til næstu fimm ára," en "gleymir" alveg að nefna, að þessi fráfarandi varnar­mála­ráðherra Þýzkalands hefur af elju og hörku hvatt til þess (rétt eins og herra Macron Frakk­lands­forseti), að uppfyllt verði fyrir­heiti Lissabon­sáttmálans um stofnun öflugs Evrópu­sambands­hers, til að ESB verði síður háð Banda­ríkj­unum um liðveizlu. Af hverju sleppir hr. Mann að nefna það, en kemur svo með smjör­klípuna um að "NATO verði ávallt hornsteinn varna Evrópu"? Mátti sannleik­urinn ekki koma skýrar í ljós, eða hentaði það ekki að upplýsa Íslendinga um, að ef þeir láta narrast inn í Evrópu­sambandið, þá bíður ungmenna landsins hugsanlega her­skylda og ríkissjóðs okkar óefað það hlutverk að leggja um það bil 2% af lands­framleiðslunni í her­apparat og hergögn handa ESB-bossum og generálum að leika sér við, til dæmis til að fara út í áhættu­samar ögranir við Rússa.

Jón Valur Jensson.


Glæsileg málsvörn Vilhjálms Birgissonar og Mið­flokksmanna fyrir þjóðina, en Helga Vala fimbul­fambar "óhrædd", sæl með sitt fullveldis­framsal

Þúsundir manna sem starfa við stærstu verk­smiðjur landsins eiga á hættu að missa lífs­viður­væri sitt vegna stefnu Lands­virkj­unar og stjórn­valda sem kærulaus stefna að stór­hækkun raforku­verðs, bæði með verðstefnu LV og þriðja orku­pakkanum sem bundið gæti enda á starfsemi Álversins í Straums­vík, verk­smiðjanna á Grundar­tanga og jafnvel Fjarðaáls, sem verið hefur máttar­stólpi atvinnu­lífs og samgangna á Austfjörðum og skapað fjölda af­leiddra starfa í þjón­ustu, iðnaði og menningu, en að fjölskyldum þessara starfsmanna meðtöldum er þar um stóran hluta Austfirðinga að ræða.

Svo er komið fyrir álveri Rio Tinto í Straumsvík, að það hefur verið rekið með tapi í 8-9 ár (sjá viðtengda Mbl.is-frétt), og Vilhjálmur Birgisson, vara­forseti ASÍ og formaður Verkalýðsfélags Akraness, tel­ur "að litlu hafi munað, að því hefði verið lokað 2015." Á síðasta ári var fyrirtækið rekið með 42,1 milljón dala tapi, þ.e. upp á 5,2 milljarða króna, en árið áður, 2017, með 3,3 milljóna dala tapi [1], þannig að ljóst er, að þar hefur hallað mjög undan fæti.

Sú orkustefna stjórnvalda að láta skeika að sköpuðu um atvinnu­mál þessara verk­smiðju-kjarna­svæða og spá frekar í það að leyfa því að gerast, að rafmagn verði selt eins og hráefni úr landi (til að byggja upp atvinnulíf erlendis, ekki íslenzkra manna!), einfaldlega í þeirri von, að mikið verð fáist fyrir raforkuna, sú stefna er greini­lega ekki byggð á mikilli fyrirhyggju. Með því að tengjast orkukerfi ESB yrði allur almenningur að sætta sig við evrópskt verðlag á raforku, jafnvel allt að þreföldun þess, en hingað til hefur verð á rafmagni og hitaveituvatni verið meðal þeirra útgjaldapósta fjölskyldunnar, sem bezt koma út í samanburði við önnur lönd og haldið okkar lífskjörum nær meginlands­lífskjörum en oft er látið í veðri vaka.

Með þreföldun orkuverðs til álvera og annarra málmvinnslna á Íslandi væri verið að greiða þeim banahögg flestum hverjum eða öllum. Hvað ætlar ríkisstjórnin þá að gera fyrir það vel launaða starfsfólk, sem þar hafði vinnu? Kasta í það atvinnuleysisbótum eins og þessi úrræðalausa ríkisstjórn "gerði fyrir" starfsfólkið sem missti vinnuna hjá Wow?!

Það er ekki að undra, að glöggur Vilhjálmur Birgisson lætur til sín taka í þessu máli. Hann er traustur umboðsmaður verkafólks og verjandi hags­muna þess. Og það er alveg orðið ljóst af umræð­unni um orkupakka 3 og dýpkun hennar á síðustu viku til tíu dögum, að stjórnvöld hér hafa enga trúverðuga tryggingu fyrir því, að sá orkupakki mundi "ekki breyta hér neinu", eins og jafnvel hefur heyrzt af vörum fáfróðra þingmanna!

Uppskipting stór­fyrir­tækja í raforkuframleiðslu, Lands­virkjunar umfram allt, yrði meðal afleiðinga þess að staðfesta hér þriðja orku­pakkann undan­þágna­laust. Innlend gróðaöfl virðast nú þegar ágirnast þessa ríkiseign, sem þjóðin hefur í reynd byggt upp á mörgum áratugum og tekizt hefur að fjármagna og láta bera drjúgan arð eftir uppgreiðslur framkvæmda­lána. Þetta eru mjólk­ur­kýr samfélags okkar, LV skilaði 11 milljarða arði á síðasta ári og hann aðeins líklegur til að aukast. En bersýnileg fíkn leiðandi manna í Landvirkjun eftir sölutekjum af raforku­sölu til annarra landa á ekki að móta stefnu land­stjórnarinnar -- og heldur ekki augljós fjölskyldu­tengsl fjármála­ráðherrans við eigendur virkjana­réttinda á Norðausturlandi.

Vindmyllugarðar, sem víða gætu spillt fögru útsýni, ásamt fjöl­mörgum minni háttar virkjunum vatnsfalla, gætu spillt hér náttúru landsins, og er undarlegt að horfa upp á Vinstri græna styðja slíka stefnu. Áberandi er þar hin æpandi þögn umhverfisráðherra þeirra, hins umboðslausa utanþings­manns Guðmundar Inga Guðbrandssonar, sem hefur ekki sagt aukatekið orð um orku­pakkann, jafn-afdrifaríkt og inngrip hans yrði í íslenzka náttúru!

Raunalegt var að horfa á Helgu Völu Helgadóttur, sem fyrr í kvöld var nefnd skoppara­kringla Evrópu­sambandsins, réttlæta á eldhúsdegi á Alþingi og í stofum fólks augljósa andstöðu sína við allar tilraunir til að stöðva löggildingu þriðja orkupakkans. Paþetískan myndu sumir kalla þann fagurgala hennar um það fullveldis­framsal í orkumálum, sem felst í orkupakka flokks hennar, Samfylkingarinnar, ríkisstjórnarflokkanna þriggja, "Við­reisnar" og Pírata. Og ekki yrði það minna með fjórða orku­pakkanum, regluverki upp á þúsund blaðsíður, sem myndi flækja okkur enn meira í fjar­stýringuna frá Brussel og frá ACER-stofnun ESB, sem fær auknar valdheimildir í þeim fjórða pakka! Og merarhjörtun í Helgu Völu og öðrum ESB-sinnum myndu ekki standast þann þrýsting, að "halda verði áfram alþjóðlega sam­starf­inu" með evrópska stórveldinu, þegar að því drægi að innleiða þann pakka hér á Íslandi að frumkvæði þessara sex hugsanlegu landsölu­flokka!

Hér er aftur á móti sönn og góð þingræða hins augljóslega þreytta, en skarpa og skelegga Þorsteins Sæmundssonar, þing­manns Miðflokksins, í þessum eldhúsdags­umræðum Alþingis þetta miðvikudagskvöld (horfið og hlustið þegar 1 klst. og 50 og hálf mínúta er liðin af upptökunni):

https://www.ruv.is/sjonvarp/spila/eldhusdagsumraedur-a-althingi/28615?ep=8gsjbh

Margsinnis er komið fram, að Steingrímur J. hefur sem forseti Alþingis fullt vald til að færa önnur dagskrármál þingsins fram fyrir það mál, sem þar hefur verið lengi rætt [2]. Makalaus er því sú hræsni hans og formanns þingflokks VG, Bjarkeyjar Olsen Gunnarsdóttur, að kenna Miðflokknum um að "stöðva" störf Alþingis að öðrum málum! Steingrímur hefur það alveg í hendi sér að skipa dagskrá Alþingis með öðrum hætti, þannig að orku­pakka­málið verði ekki eitt rætt í ræðu­stóli Alþingis. Jafnvel kom  í gær fram tillaga fjögurra stjórnar­andstöðu­flokka (Samfylkingar, "Við­reisnar", Pírata og Flokks fólksins) um að gera nákvæm­lega þetta, og það viðurkenndi Steingrímur J. jafnvel í viðtali við Sjónvarpið í gærkvöldi, þ.e. að þetta væri í raun það sama sem Mið­flokk­urinn hefði lagt til! Samt þrjózkast hann enn við að breyta dagskránni, en ber þá líka mesta ábyrgð á þessum töfum á þingstörfum, meiri en nokkur annar þingmaður!

Já, þetta væl VG-manna (þ.m.t. Ara Trausta) yfir meintu málþófi Miðflokksins (þ.e. þingræðum sem eru reyndar einstak­lega fræðandi og málefna­legar) hefur innan­tóman hljóm hræsninnar.

[1] Markaður Fréttablaðsins 29. maí, frétt á baksíðu: Álver Rio Tinto tapaði ríflega fimm milljörðum.

[2] Sjá t.d. pistil Jóns Magnússonar, hrl. og fyrrverandi varaþingmanns: Blekkingar forseta Alþingis og málþófið.

Jón Valur Jensson.


mbl.is Fyrirtækjum „slátrað“ fyrir sæstreng?
Tilkynna um óviðeigandi tengingu við frétt

Evrusvæðið hættulega berskjaldað gagnvart efnahagskreppum

Þetta er nú mat Alþjóðagjald­eyr­is­sjóðsins og sagt komið til af pólit­ískum mistökum sem gerð hafa verið í tengsl­um við evru­svæðið.

Christine Lagarde, forstjóri AGS. Fram­kvæmda­stjóri AGS, Christ­ine Lag­ar­de, sagði á fimmtu­dag­inn að bank­ar á evru­svæðinu stæðu ekki nógu styrk­um fót­um kæmi til frek­ari efna­hagserfiðleika.

Lausn­ina sagði Lag­ar­de, sem er fyrr­ver­andi fjár­málaráðherra Frakk­lands, auk­inn samruna inn­an Evr­ópu­sam­bands­ins og meðal ann­ars með einni sam­eig­in­legri inni­stæðutrygg­ingu. (Mbl.is)

Það er ekkert nýtt, að krísur og áföll í Evrópusambandinu þyki þar jafnóðum vera tilefni til enn meiri samrunaþróunar -- handhæg réttlæting fyrir því að stórríkið fái enn og aftur að belgja sig enn meira út, með meiri valdheimildum o.s.frv., en þá um leið með enn meira í húfi fyrir öll evrusvæðis-ríkin, skyldi þetta mikla hrófatildur verða fyrir nýjum áföllum, sem ekki voru fyrirséð eða gert ráð fyrir í skólabókadæmum tilraunasmiðanna í Brussel og í Evrópubankanum.

Og þetta er það sem íslenzkir ESB-sinnar hafa verið að mæla með eins og trúarjátningu, sem sjálfu akkeri stöðugleikans!

Jón Valur Jensson.


mbl.is Evrusvæðið hættulega berskjaldað
Tilkynna um óviðeigandi tengingu við frétt

Ekki fyrir okkar hönd! Embættismaður getur ekki skuldbundið þjóðina til að lúta ofríki starfshóps SÞ um innflytjendamál

Í vel falinni smá­frétt hád.útv. Rúv* þennan örlaga­dag 10. des. segir að "150 ríki SÞ, Ísland þar á meðal," hafi stað­fest fólks­flutninga­sátt­mála SÞ!

Sátt­mál­inn var ALDREI kynnt­ur hér af hálfu stjórn­valda,** ALDREI kynntur Alþingi né borinn undir atkvæða­greiðslu í þinginu og ALDREI nefnd­ur á nafn í kosn­inga­kynn­ingu flokk­anna fyrir þing­kosning­arnar 2017!

Þessi sáttmáli var EKKI undir­rit­aður fyrir hönd íslenzku þjóð­ar­innar, hún á enga aðkomu að honum, og allar skoðana­kann­anir hér hafa sýnt yfir­gnæfandi andstöðu við hann, m.a. nú síðast sú sem birt var nú kl. 12 í Útvarpi Sögu. 92,9% sögðu þar NEI við spurningunni hvort Ísland ætti að undir­rita sátt­mál­ann, aðeins 5,8% sögðu já, en 1,2% hlutlausir! Í skoðanakönnun, sem staðið hefur yfir á Stjórnmálaspjalli Facebókar, vilja 237 manns, að fram fari þjóðaratkvæðagreiðsla um málið, en aðeins 21 er þar andvígur því.

Það ber ótvírætt að hafna þessum samningi sem m.a. felur í sér fullveldis­framsal yfir landamærunum og alvarleg brot á ákvæðum 73. gr. stjórnar­skrárinnar um tjáningar­frelsi, en miklu fleiri ákvæði hans fela í sér stóralvarlegar byrðar á þjóð okkar, efnahag og velferðar­kerfið og sjálfa samsetningu "þjóð­ar­innar" eða öllu heldur íbúatölu landsins, með margföldun innflutnings hælisleitenda og farandfólks. Þetta er t.d. langtum alvar­legra mál en jafnvel hinn hrikalegi Þriðji orkupakki Evrópu­sambandsins! 

Mál þetta stenzt ekki stjórnar­skrá Lýðveld­isins Íslands -- og hvergi neina vestræna stjórnar­skrá í raun, m.a. vegna málfrelsis­ákvæða þeirra. Afglöp þess ráðherra, sem mun hafa sent ráðu­neytis­stjóra forsætisráðuneytisins til óheilla­verks þessa, eru mikil.

* Þessi frétt, sem falin var á eftir umfjöllun um 70 ára afmæli Mann­rétt­inda­yfir­lýsingar SÞ) var enn ekki talin nógu merkileg kl. 17.00 í dag á Rúv til þess að hún hafi náð inn á vefsíðuna Ruv.is, og er það í fullu samræmi við þá ÞÖGGUN sem hefur ríkt um þetta mál víða í Evrópu, en kannski hvergi meiri en hér!

** Jafnvel á fundi í Valhöll 28. nóvember sl. kom fram, að utan­ríkisráðherra hafði ekki kynnt sér sáttmálann (sem er 34 blaðsíður þéttprentaðar), en að hann ætlaði að láta embættismenn sína gera það, áður en hann tæki afstöðu! Sáttmálinn hefur enn ekki verið þýddur á íslenzku, hvað þá kynntur þjóð og þingi! Samt er undir­maður forsætisráðherra látinn uppáskrifa samninginn án umboðs frá þjóð og þingi!

Jón Valur Jensson.


Enn eykst skefjalaus útaustur úr ríkissjóði vegna EES-báknsins

Fram­lög Íslands til upp­bygg­ing­ar­sjóðs EES vegna aðild­ar Íslands að EES-samn­ingn­um verða 566 millj. kr. 2019, eru 276,5 millj. 2018, verða 899 millj. 2020 og einn millj­arður og 26 millj­ón­ir árið 2021.

Þvílík aukning, hátt í fjór­földun á þremur árum! En hvað kemur okkur við einhver upp­bygg­ing í Búlgaríu eða Rúmeníu, Lettlandi eða Slóveníu? Jú, millj­arður skal það verða! En Fjölskyldu­hjálp Íslands og hennar fátæku skjólstæðingar fá engar þrjár milljónir, hvorki úr ríkissjóði né borgar­sjóði, þá skal frekar kastað milljarði austur fyrir gamla járntjaldið, handa fátækum sem Brussel-liðið getur ekki annazt, og lokað fleiri götum í Reykjavík, svo að hver bílstjóri fari að átta sig á því að hann er persona non grata, enda beri borgin meiri ábyrgð á útlendum en innlendum borgarbúum.

Þá stendur til "að veita 162 millj­.kr. auka­lega til sendi­ráðs Íslands í Brus­sel á næsta ári til þess að styrkja starf­semi þess og fjölga full­trú­um fagráðuneyta þar vegna aðild­ar Íslands að samn­ingn­um um Evr­ópska efna­hags­svæðið (EES)" (mbl.is).

Já, þetta verður Gósentíð hvítflibbanna í ráðuneytunum, ESB-þotuliðsins:

Enn­frem­ur seg­ir í fjár­laga­frum­varp­inu að und­ir­bún­ing­ur sé þegar haf­inn að því að efla sendi­ráðið í Brus­sel og fjölga full­trú­um fagráðuneyta inn­an þess.

Þetta fer að minna á ljóð Steins Steinarr:

... Húsameistari ríkisins, ekki meir, ekki meir!

Jón Valur Jensson.


mbl.is Hundruðum milljóna meira vegna EES
Tilkynna um óviðeigandi tengingu við frétt

Verður ESB-fáninn nú dreginn að húni við Ráðhús Reykjavíkur?

Nú þegar Viðreisn er komin í samstarf við Samfylkinguna og Pírata-vinstrið í Reykjavík, þá má gera ráð fyrir að ESB-flokkurinn geri kröfur um að ESB-fáninn verði notaður sem mest í stað þess íslenska.

Fólk man eflaust að Viðreisn flaggaði ekki íslenska fánanum á síðasta landsfundi sínum, þess í stað flögguðu þau ESB-fánanum. Spurning hvort borgin sæki um aðild að ESB eða reyni aftur að setja viðskiptabann á Ísrael.

Gunnlaugur Ingvarsson


mbl.is Væta og sólarglennur þjóðhátíðardaginn
Tilkynna um óviðeigandi tengingu við frétt

Ný ríkisstjórn Ítalíu tekst á við Evrópusambandið strax frá fyrsta degi

Margir hafa undrazt hvernig ESB-stór­veld­ið neyddi í raun meiri­hluta­flokka Ítal­íu til að falla frá skipan Paolos Sa­vona sem fjár­mála­ráðherra (forsetinn Mattar­ella hafn­aði honum, í þægð við Evrópu­sam­bandið). En það er verð­ugur mót­leikur þegar nýr forsætis­ráðherra landsins, Giuseppe Conte, skipar nú hinn sama Savona sem ráðherra Evr­ópu­mála, "en hann er harður efa­semda­maður um Evr­ópu­sam­starfið" (mbl.is)! Hér er fullt tilefni til að vitna í styttri leiðara Morgun­blaðsins þennan föstudag:

"Breytt í þágu Brussel

Þriðja stærsta hagkerfi evrusvæðisins gæti þrátt fyrir allt fengið að mynda ríkisstjórn sem hefur efasemdir um evruna. Forseti Ítalíu hafði, eftir mikla andstöðu í Brussel og Berlín, hafnað fjármála­ráðherraefni flokkanna sem sigruðu í ítölsku þingkosningunum og mynda meirihluta á þingi. Fjármálaráðherraefnið þótti of gagnrýnið á evruna til að hægt væri að leyfa lýðræðinu að hafa sinn gang.

Í gærkvöld var greint frá því að meirihlutaflokkarnir hefðu ákveðið að gefa eftir og velja nýtt fjármálaráðherraefni. Þetta var gert undir hótunum um utanþingsstjórn þóknan­lega ESB og nýjar kosningar til að lagfæra þær sem elítan í ESB taldi hafa gefið ranga niðurstöðu.

Þegar þetta er skrifað er búist við að ný stjórn á Ítalíu taki við í dag, föstudag. Sú stjórn verður ekki eins og meiri­hlutinn á ítalska þinginu vildi helst hafa hana, en hún gæti engu að síður ruggað báti Evrópu­sambandsins og evrunnar verulega. Fróðlegt verður að sjá hver næstu viðbrögð elítunnar í Brussel og áhangenda hennar verða ef ríkis­stjórnin fylgir þeim málum eftir sem ítalskir kjósendur ætlast til." (Tilvitnun lýkur.)

Ekki hafa þessir atburðir aukið traust manna á lýðræðisást Brusselmanna og leiðtoga Evrópusambandsins, svo sem hinna valdamestu, Frakklandsforseta og Þýzkalandskanzlara. Greinilega vilja þau, eins og í tilfelli Grikklands, Ungverjalands og Póllands áður, takmarka frelsi þjóða og þjóðþinga til að ráða málum sínum sjálf.

Jón Valur Jensson.


mbl.is Conte nýr forsætisráðherra Ítalíu
Tilkynna um óviðeigandi tengingu við frétt

Næsta síða »

Innskráning

Ath. Vinsamlegast kveikið á Javascript til að hefja innskráningu.

Hafðu samband